Read Hmong Njua Tsiv Dlim 15 Bible Online

Tsiv Dlim 15 - Hmong Njua bible

Tsiv Dlim 15

¹Thaus ntawd Mauxes hab cov Yixalayees hu nkauj ua tug TSWV tsaug has tas: “Kuv yuav hu nkauj ua tug TSWV tsaug, rua qhov nwg tau kovyeej cov yeebncuab; nwg tau muab cov neeg hab cov tuabneeg caij neeg pov rua huv havtxwv.

²Tug TSWV yog kuv tug zug hab yog tug tiv thaiv kuv; nwg yog tug kws cawm kuv dlim. Nwg yog kuv tug Vaajtswv, kuv yuav hu nkauj ua nwg tsaug, Nwg yog kuv cov yawmkoob tug Vaajtswv, kuv yuav hu nkauj qhuas nwg lub fwjchim kws luj kawg nkaus.

³Tug TSWV yog tug thawj tubrog; nwg lub npe hu ua tug TSWV.

⁴“Nwg muab cov tubrog Iziv hab puab tej tsheb neeg pov rua huv havtxwv; puab tej thawj tubrog kws tseemceeb tau tog hab tuag taag rua huv plawv Havtxwv Lab.

⁵Havtxwv tub nphau lug npug nkaus puab; puab tog rua huv qaab thu ib yaam le pobzeb.

⁶“Tug TSWV, koj saab teg xis muaj fwjchim heev; koj nyem tej yeebncuab tawg txua lawm.

⁷Koj lub fwjchim kws luj kawg nkaus ua rua koj cov yeebncuab tawg ua saab ua sua; koj txujkev chim hlawv puab kub nyab taag ib yaam le tej quavnyaab.

⁸Koj tshuab paa rua sau havtxwv ua rua dlej faib ua aav qhuav qhawv; dlej sawv tau le tug ntsaa yeej; huv qaab thu havtxwv aav qhuav qhawv le sau nruab nqhuab.

⁹Cov yeebncuab has tas, ‘Kuv yuav caum puab qaab hab nteg kuas tau puab; kuv yuav muab puab tej nyaj txag lug sis faib hab fuab txhua yaam kws kuv xaav tau; kuv yuav rhu kuv raab ntaaj hab txeeb taagnrho tej kws puab muaj.’

¹⁰Tabsis tug TSWV, koj tshuab ib paas xwb, ua rua cov Iziv tog taagnrho rua huv qaab thu dlej ib yaam le tej quav txhuas.

¹¹“Tug TSWV, puas muaj lwm tug tswv kws yuav zoo npaum le koj? Leejtwg txhaj ua tau tej txujci tseemceeb le koj?

¹²Koj tsaa hlo koj saab teg xis, ces aav txawm nqog kag peb cov yeebncuab.

¹³Koj ncu ntsoov tej lug kws koj cog tseg, koj coj cov tuabneeg kws koj txhwv lawm, txhua leej tsiv tawm lug; koj lub fwjchim tsomkwm puab moog nyob lub tebchaws kws zoo kawg nkaus.

¹⁴Txhua tsaav tuabneeg kws nov tej nuav, puab ntshai hab poob sab ua ib ce tshee nyo; cov tuabneeg Filitees ntshai kev puamtsuaj ua ib ce tshee nyo.

¹⁵Cov tuabneeg Edoos tej numtswv los puavleej ntshai; Mau-am cov thawj tubrog ntshai ua ib ce tshee quas nyo; cov tuabneeg Kana-aas tsi muaj kev ca sab.

¹⁶Tej kev poob sab tau ua rua puab ntshai kawg. Tug TSWV, puab pum koj lub fwjchim, puab ib ce txhaav taag ib yaam le phaab zeb ca moog txug thaus koj tsaav tuabneeg moog dlhau lawm, yog tsaav tuabneeg kws koj tau coj tawm huv txujkev ua luas qhev lug.

¹⁷Koj coj puab lug hab tso puab nyob rua sau koj lub roob, qhov chaw ntawd yeej yog koj qhov chaw, tug TSWV, koj xaiv qhov chaw ntawd ua koj lub tsev, lub Tuamtsev kws koj tau ua.

¹⁸Tug TSWV, koj yuav ua Vaajntxwv moog ibtxhis tsi kawg le.”

¹⁹Cov Yixalayees taug kev qhuav qhawv huv havtxwv moog rua saab tim u, tabsis thaus cov tubrog Iziv tej tsheb hab cov tuabneeg tsaav tsheb neeg moog huv havtxwv, tug TSWV ua kuas dlej nphau lug npug puab tuag taag huv tuabsi.

²⁰Milias kws yog tug cev Vaajtswv lug, nwg yog Aloos tug muam, nwg nqaa ib lub nruag npuaj moog ua ntej, cov quaspuj ib leeg nqaa ib lub nruag npuaj seev cev lawv nwg qaab.

²¹Milias hu nkauj rua puab noog has tas: “Hu nkauj ua Vaajtswv tsaug, rua qhov nwg tau kovyeej yeebncuab; nwg tau muab cov neeg hab cov tuabneeg caij neeg pov taag rua huv qaab thu havtxwv.”

²²Mauxes txawm coj cov Yixalayees sawv kev tawm ntawm ntug Havtxwv Lab moog rua tom taj suabpuam Sules. Puab moog tau peb nub ke rua tom taj suabpuam, tabsis nrhav tsi muaj dlej haus le.

²³Puab moog txug ntawm ib qhov chaw npe hu ua Malas, tabsis lub qhovdlej kws nyob ntawd ab heev, puab haus tsi taug le. Vim le ntawd, txhaj tis npe rua qhov chaw ntawd hu ua Malas.

²⁴Cov Yixalayees ywg Mauxes hab nug has tas, “Peb yuav haus dlaabtsi?”

²⁵Mauxes thov tug TSWV hab tug TSWV qha ib yaav ntoo rua Mauxes, ces Mauxes muab yaav ntoo ntawd pov rua huv lub qhovdlej, dlej txawm zoo haus tsi ab lawm. Tug TSWV tau muab kevcai rua puab hab nwg sim puab sab ntawm qhov chaw ntawd.

²⁶Tug TSWV has rua puab tas, “Yog mej noog kuv lug hab ua lawv le kuv lub sab nyam, hab muab sab npuab kuv tej kevcai txhua nqai huv tuabsi, kuv yuav tsi rau txim rua mej kuas muaj mob muaj nkeeg le kws kuv tso rua cov Iziv. Kuv yog tug TSWV, tug kws khu mej tej mob tej nkeeg.”

²⁷Tom qaab ntawd puab lug txug rua ntawm Elimes, nyob rua qhov ntawd muaj kaum ob lub qhovdlej cag, hab muaj xyaa caum tsob toovlaaj; puab tsuam chaw su ze rua ntawm cov qhovdlej ntawd.