Read Hmong Njua Tsiv Dlim 16 Bible Online

Tsiv Dlim 16 - Hmong Njua bible

Tsiv Dlim 16

¹Cov Yixalayees sawv kev ntawm Elimes lug, yog nub kaum tsib, lub ob hlis ntuj tom qaab kws puab tawm nraag tebchaws Iziv lug. Puab txhaj lug txug rua huv lub taj suabpuam Xees kws nyob ntawm Elimes hab lub roob Xinais ntu nruab nraab.

²Puab ywg Mauxes hab Aloos obtug tom taj suabpuam kawg le

³hab has rua obtug tas, “Peb txaus sab ca tug TSWV muab peb tua kuas tuag taag rua nraag tebchaws Iziv. Peb nyob nraag, peb yeej tau zaub, tau nqaj, hab tau mov noj lawv le peb sab xaav. Tabsis meb coj peb lug nyob rua ntawm taj suabpuam nuav, kuas peb tuag tshaib taag huv tuabsi xwb.”

⁴Ces tug TSWV has rua Mauxes has tas, “Nwgnuav kuv yuav tso mov poob sau ntuj lug rua mej noj ib yaam le naag lug. Cov tuabneeg naj nub yuav tau moog khaws, hab khaws ib zag kuas txaus noj ib nub xwb. Kuv ua le nuav, yog kuv sim saib puab puas ua lawv le kuv tej lug.

⁵Nub rau, puab yuavtsum khaws kuas tshaaj qhov kws puab naj nub khaws ib npaug ntxiv npaaj tseg ca.”

⁶Mauxes hab Aloos obtug txhaj has rua cov Yixalayees has tas, “Nub nua thaus tsaus ntuj, mej yuav paub has tas tug TSWV yog tug kws coj mej tsiv tawm nraag tebchaws Iziv lug.

⁷Thaus sawv ntxuv mej yuav pum tug TSWV tug tshwjchim kws ci ntsaa ab, nwg tub nov tej lug kws mej ywg nwg lawm, qhov tseeb, yeej yog mej ywg tug TSWV, rua qhov wb tsuas yog ob tug kws cev nwg tej lug xwb.”

⁸Mauxes has ntxiv tas, “Tug TSWV yog tug kws yuav muab nqaj lug rua mej noj mo nuav, hab thaus sawv ntxuv los mej yuav tau mov noj tsi taag le, rua qhov nwg nov tej lug kws mej ywg nwg lawm. Thaus mej ywg wb, tub yog mej ywg tug TSWV ntaag.”

⁹Mauxes has rua Aloos has tas, “Koj has kuas suavdlawg ca le tuaj sawv taabmeeg tug TSWV, rua qhov nwg tub nov puab tej lug ywg lawm.”

¹⁰Thaus Aloos tseem taabtom has rua suavdlawg, puab txawm tig moog saib tom taj suabpuam, hab taamsim ntawd puab txawm pum tug TSWV tug tshwjchim ci ntsaa ab tshwm sau cov fuab tuaj.

¹¹Tug TSWV has rua Mauxes has tas,

¹²“Kuv nov cov Yixalayees tej lug ywg lawm. Ca le qha rua puab has tas, thaus tsaus ntuj zuag puab yuav tau nqaj noj, hab thaus sawv ntxuv puab yuav tau ncuav noj txaus nkaus le puab lub sab nyam. Ces puab yuav paub has tas kuv yog tug TSWV kws yog puab tug Vaajtswv.”

¹³Thaus tsaus ntuj zuag txawm muaj ncuab coob heev yaa ua npoj ntwg lug tsaws puv nkaus rua huv puab lub yeej, hab thaus sawv ntxuv muaj lwg ntsu thoob plawg puab lub yeej.

¹⁴Thaus lwg yaaj taag lawm, muaj tej dlaim zoo le te khov dlawb paug rua sau tej suabpuam.

¹⁵Thaus cov Yixalayees pum tej ntawd, puab tsi paub sov yog dlaabtsi hab puab sis nug zum zawg has tas, “Cov nuav yog dlaabtsi?” Mauxes teb has tas, “Cov ntawd yog tej mov kws tug TSWV tso lug rua mej noj ntaag.

¹⁶Tug TSWV kuas mej nyag moog khaws kuas txaus nyag tsev tuabneeg noj. Khaws ib leeg ob taig kuas txhua nwg tsev tuabneeg xwb.”

¹⁷Cov Yixalayees ua lawv le Mauxes has, muaj ibtxha khaws tau ntau ibtxha khaws tau tsawg.

¹⁸Thaus puab muab lug luj, cov kws khaws tau ntau kuj tsi muaj tshaaj, cov kws khaws tau tsawg kuj muaj txaus. Suavdlawg nyag khaws txaus nyag noj xwb.

¹⁹Mauxes has rua puab tas, “Tsi xob khaws lug npaaj ca rua pigkig.”

²⁰Tabsis muaj qee leej tsi noog Mauxes lug, puab txawm qee ib nraab ca npaaj rua pigkig. Taagkig kaaj ntug tej mov ntawd ua kaas hab lwj lawm, Mauxes chim rua puab heev.

²¹Cov Yixalayees naj taagkig sawv ntxuv moog khaws, puab nyag khaws txaus nyag noj; thaus tshaav ntuj tuaj kub lawm, tej mov kws puab khaws tsi taag yaaj huv tuabsi lawm.

²²Thaus txug nub rau, puab ib leeg khaws plaub taig kuas txaus txhua tug huv tsev tuabneeg. Cov Yixalayees tej thawjcoj tuaj pav zaaj nuav qha rua Mauxes noog,

²³Mauxes teb puab has tas, “Tej lug nuav yog tug TSWV saamfwm ca: pigkig yog nub su kws yog tug TSWV nub. Yog le ntawd, tej kws zoo ci, ca le muab ci hab tej kws zoo hau, ca le muab hau. Tej kws seem ca le muab khaws tseg ca rua pigkig.”

²⁴Cov Yixalayees ua lawv le Mauxes has, puab khaws tej mov ntawd ca txug taagkig los cov mov ntawd tsi lwj lossis tsi ua kaas le.

²⁵Mauxes has rua puab tas, “Nub nua mej yuavtsum noj tej mov ntawd, rua qhov nub nua yog nub Xanpataus kws yog tug TSWV nub, hab mej yuav tsi pum muaj mov nyob tom tshaav puam lawm.

²⁶Mej tsuas tau khaws rau nub xwb, tabsis nub xyaa, yog nub Xanpataus, yuav tsi muaj mov rua mej khaws lawm.”

²⁷Nub xyaa muaj qee leej tseem moog nrhav khaws mov, tabsis tsi pum muaj ib lub mov nyob qhov twg le.

²⁸Tug TSWV has rua Mauxes has tas, “Mej tseem yuav tawv tsi ua lawv le kuv tej lug hab kuv tej kevcai moog txug thaus twg?

²⁹Mej yuavtsum ncu ntsoov has tas tug TSWV pub mej muaj nub Xanpataus, yog le ntawd, nub rau kuv txhaj pub mov kuas txaus mej noj ob nub. Nub xyaa txhua tug nyag yuavtsum nyob tuabywv huv nyag tsev, nwg yuavtsum tsi xob tawm moog nrau zoov hlo le.”

³⁰Yog le ntawd, nub xyaa cov tuabneeg suavdlawg txhaj su, tsi ua ib yaam num dlaabtsi le.

³¹Cov Yixalayees hu cov mov ntawd ua manas. Cov mov ntawd ua tej lub dlawb dlawb luaj le noob zaub txhwb qab, qaab ib yaam le mov xyaw zib ntaab.

³²Mauxes has tas, “Tug TSWV saamfwm rua peb, kuas peb khaws ib co manas tseg ca rua peb tej xeebntxwv tau saib, puab txhaj le pum tej mov kws tug TSWV pub rua peb noj tom taj suabpuam thaus nwg coj peb tawm nraag tebchaws Iziv lug.”

³³Mauxes has rua Aloos has tas, “Muab ib lub hub lug yawm ob taig manas ntim rua huv, hab nqaa moog txawb rua huv tug TSWV lub tsevntaub, khaws tseg rua peb tej xeebntxwv tau saib.”

³⁴Lawv le tug TSWV tau saamfwm rua Mauxes lawm, Aloos txhaj muab lub hub kws ntim cov manas ntawd coj moog txawb rua ntawm lub Phijxaab kws ntim Vaajtswv tej lug cog tseg.

³⁵Cov Yixalayees noj cov manas ntawd tau plaub caug xyoo, puab txhaj lug txug rua huv tebchaws Kana-aas qhov chaw kws puab lug ua vaaj ua tsev nyob.

³⁶(Lub thoob kws ibtxwm yeem nplej ntim tau neeg nkaum taig.)