Read Hmong Njua Tsiv Dlim 17 Bible Online

Tsiv Dlim 17 - Hmong Njua bible

Tsiv Dlim 17

¹Cov Yixalayees sawv kev ntawm taj suabpuam Xees lug, puab tshais chaw ib qho rua ib qho ua ntu zug lawv le tug TSWV has. Puab lug tsuam chaw rua ntawm Lefidees, tabsis thaaj tsaam ntawd tsi muaj dlej haus hlo le.

²Puab txhaj tuaj ywg Mauxes has tas, “Ca le nrhav dlej rua peb haus!” Mauxes teb puab has tas, “Vim le caag mej yuav ywg le ko? Ua caag mej yuav sim tug TSWV sab?”

³Tabsis cov tuabneeg nqhes dlej heev, mas puab txhaj pheej ywg Mauxes tsi tseg le. Puab ywg has tas, “Vim le caag koj txhaj coj peb tawm nraag tebchaws Iziv lug? Koj puas paub has tas, peb cov mivnyuas, peb tej tsaj txhu hab peb tub yuav tuag dlej?”

⁴Mauxes thov tug TSWV has tas, “Kuv yuav ua le caag rua cov tuabneeg nuav txhaj le zoo? Puab tub yuav muab pobzeb ntaus kuas kuv tuag.”

⁵Tug TSWV has rua Mauxes has tas, “Coj cov Yixalayees tej thawjcoj qee leej nrug koj, hab mej ca le moog ua suavdlawg ntej. Nqaa koj tug paas nreg kws koj nplawm tug dlej Niles nrug koj moog.

⁶Kuv yuav sawv sau lub pobzeb kws nyob sau roob Xinais. Ca le ntaus lub pobzeb ntawd, dlej yuav tawm huv lug rua cov tuabneeg haus.” Mauxes ua le ntawd rua cov Yixalayees tej thawjcoj saib ntsoov.

⁷Txhaj tis npe rua qhov chaw ntawd hu ua Maxas hab Melinpas, rua qhov cov Yixalayees tau ywg hab sim tug TSWV sab thaus puab nug has tas, “Tug TSWV nrug peb nyob los tsi nrug?”

⁸Cov tubrog Amalej tuaj tua cov Yixalayees ntawm Lefidees.

⁹Mauxes has rua Yausuas has tas, “Pigkig koj ca le xaiv peb cov txivneej ibtxha moog tua cov Amalej. Kuv yuav moog sawv sau ncov roob hab tsaa tug paas nreg kws Vaajtswv kuas kuv nqaa.”

¹⁰Yausuas ua lawv le Mauxes tau saamfwm rua nwg hab tawm moog tua cov Amalej. Mauxes, Aloos, hab Hules puab nce moog sau roob.

¹¹Thaus Mauxes tsaa nwg txhais teg, cov Yixalayees tua yeej, tabsis thaus nwg tso teg, cov Amalej tua yeej zuj zug.

¹²Thaus Mauxes tsaug npaab lawm, Aloos hab Hules obtug txhaj moog nqaa pobzeb lug rua Mauxes nyob, obtug ib leeg sawv ib saab tuav Mauxes ob txhais npaab, hab tsaa moog txug thaus nub poob qho.

¹³Puab ua le ntawd, Yausuas txhaj tua yeej cov Amalej.

¹⁴Ces tug TSWV has rua Mauxes has tas, “Koj ca le sau zaaj nuav tseg ca, suavdlawg txhaj le yuav ncu ntsoov moog ibtxhis. Qha rua Yausuas paub has tas, kuv yuav ua kuas cov Amalej puamtsuaj taag huv tuabsi moog.”

¹⁵Mauxes ua tau ib lub thaaj hab tis npe rua lub thaaj ntawd hu ua, “Tug TSWV yog kuv tug Chij.”

¹⁶Mauxes has tas, “Tsaa tug TSWV tug chij kuas sab! Tug TSWV yuav tawmtsaam cov Amalej ib tam dlhau ib tam moog ibtxhis!”