Read Hmong Njua Tsiv Dlim 18 Bible Online

Tsiv Dlim 18 - Hmong Njua bible

Tsiv Dlim 18

¹Mauxes yawmtxiv Yethoos kws yog tug povthawj huv tebchaws Midias, nov txug tej kws Vaajtswv ua paab Mauxes hab paab cov Yixalayees thaus nwg coj puab tawm nraag tebchaws Iziv lug.

²Yethoos coj Mauxes tug quaspuj Xipaulas kws thaus Mauxes xaa rov qaab moog nrug nwg nyob,

³hab xaa Nkesoos, Eli-exes kws yog Xipaulas ob tug tub tuaj rua Mauxes. (Mauxes has tas, “Kuv yog tuabneeg txawv tebchaws, moog nyob rua huv lub tebchaws kws kuv ibtxwm tsi tau paub dlua”; yog le ntawd, nwg txhaj tis nwg tug tub hlub npe hu ua Nkesoos).

⁴Mauxes tseem has ntxiv tas, “Kuv txiv tug Vaajtswv paab kuv hab cawm kuv dlim ntawm cov Iziv tug vaajntxwv raab ntaaj kws yuav tua kuv povtseg”, nwg txhaj tis tug tub yau npe hu ua Eli-exes. )

⁵Mauxes yawmtxiv Yethoos, coj Mauxes tug quaspuj hab Mauxes ob tug tub tuaj rua Mauxes huv taj suabpuam, ntawm thaaj chaw kws Mauxes lug tsuam yeej nyob ze rua ntawm Vaajtswv lub roob dlawbhuv.

⁶Yethoos khaiv tuabneeg moog has rua Mauxes has tas, “Kuv kws yog koj yawmtxiv Yethoos, kuv tuaj saib koj hab kuv coj koj quaspuj hab nwg ob tug tub tuaj txug lawm.”

⁷Mauxes txhaj tawm moog ntsib nwg yawmtxiv hawm hab nwj nwg. Ces puab txawm sis nug txug kev noj qaab nyob zoo, hab puab moog rua huv Mauxes lub tsevntaub lawm.

⁸Mauxes pav txhua yaam kws tug TSWV tau cawm cov Yixalayees ua ntu zug ntawm Falaus hab cov Iziv rua nwg yawmtxiv Yethoos noog. Mauxes tseem pav tej kev nyuaj sab kws cov Yixalayees raug thaus puab taug kev lug hab tej kws tug TSWV cawm puab dlim rua Yethoos noog huv tuabsi.

⁹Thaus Yethoos nov txhua yaam nuav, nwg zoo sab kawg le

¹⁰hab nwg has tas, “Ua tug TSWV tsaug kws nwg tau cawm mej dlim ntawm Falaus hab cov Iziv lug! Ua tug TSWV tsaug kws nwg tau cawm nwg tsaav tuabneeg dlim ntawm txujkev ua luas qhev lug lawm!

¹¹Nwgnuav kuv paub has tas tug TSWV yog tug kws muaj fwjchim luj tshaaj plawg tej vaajtswv huv tuabsi, rua qhov nwg tau ua tej nuav rua cov Iziv, thaus kws puab tsimtxom cov Yixalayees nyaav heev.”

¹²Yethoos coj tsaj tuaj tua hlawv kheej hab coj khoom tuaj fij rua Vaajtswv, ces Aloos hab cov Yixalayees tej thawjcoj txhaj tuaj nrug nwg noj rooj mov tseemceeb kws ua Vaajtswv tsaug ntawd.

¹³Nub tom qaab Mauxes txawm moog nyob tu cov pejxeem tej plaub, hab nwg tu plaub thaus sawv ntxuv moog txug thaus tsaus ntuj.

¹⁴Thaus Yethoos pum txhua yaam kws Mauxes ua ntawd, nwg txawm nug has tas, “Koj ua dlaabtsi le nuav rua cov pejxeem? Vim le caag koj tuab leeg yuav tu plaub rua cov pejxeem, hab nrug cov pejxeem sawv ntawm nuav thaus sawv ntxuv moog txug thaus tsaus ntuj le?”

¹⁵Mauxes teb has tas, “Kuv yuavtsum ua le nuav, rua qhov cov pejxeem tuaj cuag kuv, mas yog puab xaav paub qhov kws ua hum Vaajtswv sab nyam.

¹⁶Thaus muaj ob tug tuabneeg sis caav sis tshe, obtug tuaj cuag kuv, kuv ua tug taug obtug tej lug, hab txav txim rua obtug saib leejtwg yog tug muaj cai, hab kuv muab Vaajtswv tej lug saamfwm hab kevcai lug qha rua obtug.”

¹⁷Yethoos teb has tas, “Koj ua le nuav tsi yog lawm.

¹⁸Koj hab cov pejxeem kws tuaj cuag koj yuav qaug zug heev. Tej num nuav nyaav heev rua koj, koj ib leeg xwb yuav tsi muaj peevxwm ua tau.

¹⁹Koj noog kuv has, kuv yuav paab tswvyim qee yaam rua koj, hab thov Vaajtswv nrug nraim koj. Koj yuavtsum ua tug sawv cev cov tuabneeg rua ntawm Vaajtswv hab coj puab tej plaub ntug moog cuag nwg xwb.

²⁰Koj yuavtsum qha Vaajtswv txuj kevcai rua puab, hab qha rua puab ua puab lub neej kuas lawv le kevcai.

²¹Tabsis koj yuavtsum xaiv ib cov txivneej kws muaj peevxwm huv cov Yixalayees hab tsaa puab ua cov thawj kaav cov pejxeem: tsaa cov kws kaav ib txheeb leej, ib puas leej, tsib caug leej hab kaum leej. Puab cov nuav yuavtsum yog cov kws fwm Vaajtswv, yog cov kws suavdlawg ca sab tau rua hab yog cov kws tsi yuav luas tej nyaj xab.

²²Ca puab ua cov tu plaub ntug rua cov pejxeem moog le. Tej plaub ntug luj maam kuas puab coj tuaj cuag koj, tabsis tej plaub ntug miv, ca rua puab tu. Ua le nuav koj lub nraa txhaj yuav sib, rua qhov puab yuav paab koj ris koj lub nraa.

²³Yog koj ua lawv le Vaajtswv has, koj lub zug yuav tsi ntaug, hab cov pejxeem yuav rov moog tsev zoo sab hlo.”

²⁴Mauxes noog nwg yawmtxiv tej lug qha

²⁵hab xaiv cov tuabneeg kws muaj peevxwm huv cov Yixalayees. Nwg muab puab tsaa ua cov thawj kaav ib txheeb leej, ib puas leej, tsib caug leej, hab kaum leej.

²⁶Puab ua cov tu tej plaub ntug miv rua cov pejxeem moog le, tabsis tej plaub ntug luj puab coj tuaj rua Mauxes tu.

²⁷Ces Mauxes txawm xaa nwg yawmtxiv Yethoos sawv kev, hab Yethoos moog tsev lawm.