Read Hmong Njua Tsiv Dlim 19 Bible Online

Tsiv Dlim 19 - Hmong Njua bible

Tsiv Dlim 19

¹Cov Yixalayees tawm huv Lefidees lug txug rua ntawm taj suabpuam Xinais, yog nub xab ib lub peb hli ntuj tom qaab kws puab tsiv nraag tebchaws Iziv lug. Puab tsaa tsevntaub nyob rua ntawm taw Roob Xinais,

³hab Mauxes nce moog cuag Vaajtswv sau roob, tug TSWV hu sau roob tuaj rua Mauxes hab qha kuas nwg moog has rua cov Yixalayees kws yog Yakhauj cov xeebntxwv has tas,

⁴“Mej tub pum kuv kws yog tug TSWV, ua rua cov Iziv hab kuv tau puag rawv mej lug ib yaam le tug dlaav puag rawv nwg cov mivnyuas huv nwg ob saab qaab tis.

⁵Nwgnuav, yog mej noog kuv lug hab ua lawv le kuv tej lug cog tseg, mej txhaj yuav yog kuv tsaav tuabneeg. Taagnrho lub nplajteb nuav yeej yog kuv le, tabsis mej yog cov kws raug xaiv lug ua kuv tsaav tuabneeg,

⁶mej yog cov kws yuav tau ua povthawj ua kuv teg num hab yog ib tsaav tuabneeg dlawbhuv. Ntawm nuav yog tej lug kws koj coj moog has rua cov Yixalayees.”

⁷Yog le ntawd, Mauxes txhaj nqeg lug hab hu taagnrho cov pejxeem hab cov thawjcoj tuaj ua ke, nwg pav tej lug kws tug TSWV has rua nwg rua puab noog.

⁸Ces puab txawm thooj txhij teb has tas, “Peb yuav txaus sab ua txhua yaam le tug TSWV has,” Mauxes txhaj pav tej lug kws puab leeg ntawd rua tug TSWV.

⁹Tug TSWV has rua Mauxes tas, “Kuv yuav lug cuag koj huv tauv fuab kws dlub tsaus nti, kuas cov pejxeem txhaj le nov kuv lub suab nrug koj thaam hab txij nuav moog yaav tom ntej puab txhaj yuav ntseeg koj tej lug.” Mauxes pav cov pejxeem tej lug rua tug TSWV noog,

¹⁰hab tug TSWV has rua Mauxes has tas, “Ca le moog cuag cov pejxeem hab has rua puab tas, puab muab nub nua hab pigkig lug tu puab lub sab kuas zoo moog pehawm Vaajtswv, puab yuavtsum ntxhua puab tej khaub dluag huv tuabsi,

¹¹hab quasneeg puab tu cev kuas txhij. Nub ntawd kuv yuav lug sau Roob Xinais rua suavdlawg pum kuv.

¹²Koj yuavtsum kem nrim ncig lub taw roob, kuas cov pejxeem tsi xob hlaa tug nrim ntawd, hab has rua puab kuas tsi xob nce moog sau roob lossis moog ze lub taw roob. Yog leejtwg cev taw moog tsuj lub taw roob, tug ntawd yuav raug tua povtseg;

¹³yuavtsum muab pobzeb ntaus lossis muab neevnti tua nwg kuas tuag, tsi pub ib tug twg moog chwv nwg le. Txawm yog tuabneeg lossis tsaj los yuavtsum raug muab tua kuas tuag. Thaus nov suab raaj nrov lawm, maam pub cov pejxeem nce moog sau roob.”

¹⁴Ces Mauxes nqeg sau roob lug hab has rua cov pejxeem kuas puab npaaj moog pehawm Vaajtswv. Yog le ntawd, puab txhaj le ntxhua puab tej rig tsho,

¹⁵hab Mauxes has rua puab tas, “Mej suavdlawg tu cev hab npaaj kuas txhij rua quasneeg, hab tsi pub leejtwg nrug quaspuj pw le.”

¹⁶Nub peb thaus sawv ntxuv txawm muaj xub nroo hab tsaglig xub lab pis vog, fuab pus tsaus nti npug nkaus sau roob, hab nov ib lub suab raaj nrov heev. Ua rua cov tuabneeg kws nyob huv puab lub yeej ntshai ib ce tshee nyo.

¹⁷Mauxes coj puab tawm huv yeej moog ntsib Vaajtswv, puab moog sawv rua ntawm taw roob.

¹⁸Paa nchu auv nab tsaus nti puv nkaus sau Roob Xinais, rua qhov tug TSWV ua suavtawg lug sau roob. Tej paa nchu auv nab ib yaam le ib cub suavtawg, hab lub roob cu ua zug koog.

¹⁹Lub suab raaj txawm nrov heev zuj zug tuaj. Mauxes has rua Vaajtswv, hab Vaajtswv teb Mauxes huv lub suab xub tuaj.

²⁰Tug TSWV lug rua sau Roob Xinais hab nwg hu Mauxes moog cuag nwg rua sau roob. Mauxes txhaj nce moog rua sau roob

²¹hab tug TSWV has rua Mauxes has tas, “Koj rov qaab moog rua nraag cov pejxeem hab ceebtoom rua suavdlawg kuas tsi xob hlaa tug nrim tuaj cuag kuv, yog puab tsi noog, coob leej yuav raug tua tuag.

²²Txawm yog cov povthawj los puab yuavtsum ua kevcai ntxuav puab kuas huv tsaiv, puab maam tuaj cuag kuv, yog puab tsi ua le ntawd, kuv yuav rau txim rua puab.”

²³Mauxes has rua tug TSWV has tas, “Cov pejxeem tuaj tsi tau, rua qhov koj tub saamfwm rua peb suavdlawg kuas kem nrim ncig lub roob, ca ua qhov chaw tseemceeb lawm.”

²⁴Tug TSWV has rua Mauxes has tas, “Koj ca le nqeg moog coj Aloos nrug koj tuaj, tabsis tsi xob pub cov povthawj hab cov pejxeem hlaa dlhau tug nrim tuaj cuag kuv, yog puab tsi noog kuv lug, kuv yuav rau txim rua puab.”

²⁵Ces Mauxes nqeg rov qaab lug rua nraag cov pejxeem hab qha rua puab paub tej kws tug TSWV tau has rua nwg lawm.