Read Hmong Njua Tsiv Dlim 2 Bible Online

Tsiv Dlim 2 - Hmong Njua bible

Tsiv Dlim 2

¹Thaus ntawd muaj ib tug txivneej kws yog xeem Levis, moog yuav nwg xeem ib tug ntxhais lug ua quaspuj,

²hab tug quaspuj ntawd yug tau ib tug tub rua nwg. Thaus tug quaspuj ntawd pum has tas, tug tub nuav ntxim hlub heev, nwg txawm muab zais tau peb lub hlis.

³Tabsis thaus kws nwg yuav zais tsi tau tug tub ntawd ntxiv lawm, nwg txhaj muab ib lub tawb kavtheej lug hab muab roj ntoos leem tsi pub kuas dlej txheem tau rua saab huv. Nwg muab tug tub ntawd tso pw rua huv lub tawb hab nqaa moog tso rua huv cov lojkov nraag ntug dlej.

⁴Tug tub ntawd tug muam txhaj moog sawv ib caag dleb tsawv saib tuaj, saib puas muaj xwm dlaabtsi rua tug tub ntawd.

⁵Falaus tug ntxhais moog dlaa dlej nraag haav dlej, thaus kws nwg cov ntxhais qhev ncig ua si ntawm ntug dlej. Taamsim ntawd nwg txawm pum ib lub tawb nyob huv cov lojkov, nwg txhaj kuas ib tug nkauj nqe moog nqaa lug rua nwg saib.

⁶Thaus tug ntxhais qhev nqaa lug txug, Falaus tug ntxhais muab qheb hlo saib, ua cav muaj ib tug mivnyuas tub pw huv. Tug tub ntawd quaj heev, ua rua Falaus tug ntxhais hlub nwg kawg le; nwg has tas, “Tug tub nuav yog cov Henplais mivnyuas.”

⁷Tug tub ntawd tug muam txhaj lug has rua Falaus tug ntxhais has tas, “Koj puas xaav khaiv kuv moog nrhav ib tug quaspuj kws yog cov Henplais tu tug tub nuav rua koj?”

⁸Falaus tug ntxhais teb has tas, “Thov koj ca le moog nrhav.” Yog le ntawd, tug ntxhais txhaj moog coj tug tub ntawd leej nam tuaj.

⁹Falaus tug ntxhais has rua tug quaspuj ntawd tas, “Koj coj tug mivnyuas nuav moog tu rua kuv, kuv yuav muab nqe zug rua koj.” Yog le ntawd, nwg txhaj coj tug mivtub ntawd lug tu.

¹⁰Thaus tug mivnyuas ntawd luj hlub lawm, leej nam txhaj coj moog cob rua Falaus tug ntxhais kws yuav tug mivnyuas ntawd ua nwg tug tub. Vaajntxwv tug ntxhais has tas, “Kuv muab tug tub nuav huv dlej lug, yog le ntawd, kuv yuav tis tug tub nuav lub npe hu ua Mauxes.”

¹¹Thaus Mauxes hlub tav txiv lawm, Mauxes txhaj moog ncig saib nwg tsaav tuabneeg, hab nwg pum puab raug luas quab yuam ua num nyaav kawg le. Hab nwg tseem pum cov Iziv ib tug txivneej muab ib tug Henplais kws yog Mauxes tsaav tuabneeg ntaus.

¹²Thaus Mauxes pum le ntawd, Mauxes xaam ncig leeg thaaj tsaam ntawd tsi muaj leejtwg nyob ze, nwg txawm muab tug tuabneeg Iziv ntawd tua kag. Nwg muab hai moog faus rua huv cov xuabzeb.

¹³Nub tom qaab Mauxes rov tawm moog hab pum ob tug tuabneeg Henplais taabtom sis ntaus. Mauxes has rua tug kws ua txhum has tas, “Ua caag koj laam ntaus tug kws yog koj tsaav tuabneeg Henplais?”

¹⁴Tug txivneej ntawd teb has tas, “Leejtwg tsaa koj ua nom tuaj txav txim rua wb le nuav? Koj yuav muab kuv tua povtseg ib yaam le koj tua tug tuabneeg Iziv hab los?” Ces Mauxes ntshai heev hab nwg xaav has tas, “Muaj tuabneeg paub zaaj kws kuv ua taag lug lawm lauj.”

¹⁵Thaus Falaus nov dlheev zaaj nuav, nwg txhaj nrhav Mauxes tua povtseg, tabsis Mauxes tub xub tsiv moog rua tim tebchaws Midias lawm. Muaj ib nub, thaus Mauxes taabtom nyob ntawm ib lub qhov tshij,

¹⁶Yethoos kws yog tug povthawj huv tebchaws Midias, xyaa leej ntxhais tuaj ntaus dlej laub rua huv dlaab rua puab txiv cov yaaj hab cov tshis haus.

¹⁷Tabsis cov tuabneeg yug yaaj muab Yethoos cov ntxhais lawv tsiv. Ces Mauxes txhaj moog paab puab hab ntaus dlej rua puab cov tsaj haus.

¹⁸Thaus cov ntxhais rov lug txug tsev, puab txiv nug puab has tas, “Ua caag nub nua mej lug tsev ntxuv dlua txhua nub?”

¹⁹Cov ntxhais teb has tas, “Muaj ib tug tuabneeg Iziv paab peb, tsi pub cov yug yaaj ua phem rua peb, hab nwg tseem ntaus dlej rua peb hab ntaus dlej rua peb tej tsaj haus huv tuabsi, peb txhaj tau lug tsev ntxuv.”

²⁰Yethoos nug nwg cov ntxhais has tas, “Tug txivneej ntawd nyob qhov twg? Ua le caag mej tsi coj nwg lug tsev? Mej ca le moog hu nwg lug nrug peb noj mov.”

²¹Yog le ntawd Mauxes txhaj ua ib sab nyob huv tebchaws Midias, hab Yethoos muab nwg tug ntxhais Xipaulas rua Mauxes yuav,

²²Xipaulas yug tau ib tug tub rua Mauxes. Mauxes has tas, “Rua qhov kuv yog tuabneeg txawv tebchaws nyob huv lub tebchaws nuav, yog le ntawd, kuv tis kuv tug tub nuav lub npe hu ua Nkesoos.”

²³Tau ntau xyoo tom qaab kws cov Iziv tug vaajntxwv tuag lawm, tabsis cov Yixalayees tseem pheej quaj ntsuag rua txujkev ua qhev hab quaj thov Vaajtswv paab. Puab tej suab quaj moog txug Vaajtswv,

²⁴Vaajtswv nov puab tej suab quaj hab ncu txug tej lug kws nwg tau cog tseg rua Anplahaas, Ixaj hab Yakhauj lawm.

²⁵Vaajtswv pum cov Yixalayees txujkev kws ua luas qhev hab nwg hlub puab kawg nkaus le.