Read Hmong Njua Tsiv Dlim 21 Bible Online

Tsiv Dlim 21 - Hmong Njua bible

Tsiv Dlim 21

¹“Muab cov kevcai nraag nuav rua cov pejxeem Yixalayees:

²Yog mej yuav cov Henplais lug ua qhev, nwg yuavtsum ua mej qhev kuas txwm nkaus rau xyoos. Xyoo xyaa, nwg maam le nyob ywj sab hab tsi raug them nqe txhwv dlaabtsi.

³Yog nwg tsi tau yuav quaspuj ua ntej kws nwg lug ua mej qhev, thaus nwg rov qaab moog nwg yuavtsum tsi xob coj tug quaspuj nrug nwg moog, tabsis yog nwg muaj quaspuj ua ntej nwg lug ua mej qhev, thaus nwg rov qaab moog nwg yuavtsum coj nwg tug quaspuj nrug nwg moog.

⁴Yog has tas, tug tswv yuav quaspuj rua nwg hab nwg tug quaspuj yug tau tub lossis ntxhais rua nwg, mas tug quaspuj hab cov mivnyuas yog tug tswv le tuabneeg, ces tug qhev nwg tsuas tawm moog tuab leeg xwb.

⁵Tabsis yog tug qhev has tas, nwg hlub nwg tug tswv, nwg tug quaspuj, nwg cov mivnyuas hab tsi xaav tawm moog nyob ywj sab,

⁶ces ca nwg tug tswv coj nwg moog rua ntawm qhov chaw pehawm Vaajtswv. Kuas nwg sawv ntawm qhovrooj lossis ntawm tug ncej qhovrooj hab muab nwg lub nploojntseg tho qhov. Ces nwg yuavtsum ua nwg tug tswv qhev moog taag nwg lub neej le.

⁷“Yog leejtwg muag nwg tug ntxhais moog ua luas qhev, mas tug ntxhais ntawd yuav tsi tau tawm moog ywj sab le tug txivneej.

⁸Yog muab tug ntxhais ntawd muag rua lwm tug kws xaav yuav nwg moog ua quaspuj, tabsis yog tug txivneej ntawd tsi nyam, nwg yuavtsum muab tug quaspuj ntawd muag rov rua nwg txiv, tug txivneej ntawd tsi muaj cai muab nwg muag rua cov tuabneeg txawv tebchaws, rua qhov nwg tau ua tsi ncaaj rua tug quaspuj ntawd lawm.

⁹Yog tug tswv twg yuav ib tug ntxhais lug ua qhev hab muab txis rua nwg tug tub, nwg yuavtsum saib taug tug ntxhais ntawd ib yaam le yog nwg yug.

¹⁰Yog tug txivneej ntawd yuav nam yau, nwg yuavtsum pub tug nam hlub kuas muaj noj muaj naav hab pub rua nwg muaj cai ib yaam le yaav taag lug.

¹¹Yog nwg tsi ua le tej kws tau has lug sau nuav rua nwg tug nam hlub, nwg yuavtsum xaa tug nam hlub ntawd rov qaab hab tsi pub kuas them nyaj rua tug quasyawg le.

¹²“Leejtwg ntaus hab tua ib tug tuabneeg twg tuag, ca le muab tug ntawd tua kuas tuag hab.

¹³Tabsis yog tua yuam kev raug, tsi yog nwg txhobtxwm tua tug tuabneeg ntawd, nwg yuavtsum tsiv moog nyob huv qhov chaw kws kuv xaiv rua mej lawm, nwg txhaj yuav dlim.

¹⁴Tabsis yog tug txivneej ntawd chim hab txhobtxwm tua lwm tug, txawm yog nwg tsiv moog cawm sav rua ntawm kuv lub thaaj los ca le muab nwg tua kuas tuag.

¹⁵“Yog leejtwg ntaus nwg nam lossis nwg txiv, yuavtsum muab tug ntawd tua povtseg.

¹⁶“Yog leejtwg moog nyag ib tug tuabneeg coj moog muag rua luas lwm tug lossis ca nyob ua nwg qhev los ca le muab tug kws nyag ntawd tua povtseg.

¹⁷“Yog leejtwg foom phem rua nwg nam lossis nwg txiv, ca le muab tug ntawd tua povtseg.

¹⁸“Yog muaj ob tug txivneej sis tshe, hab muaj ib tug muab pobzeb ntaus ib tug lossis nkaug nrig rua, tabsis nwg tsi tuag, tsuas yog raug mob hab pw xwb, tug ntawd yuav tsi raug txim,

¹⁹tabsis tom qaab kws tug raug mob sawv taug nreg paas tawm moog rua nrau zoov, tug kws ntaus tug ntawd yuavtsum them nqe rua nwg lub sijhawm kws nwg raug mob hab tu nwg moog txug thaus nwg zoo.

²⁰“Yog tug txivneej twg muab paas ntoo ntaus nwg tug tubqhe lossis ntxhais qhev tuag taamsim ntawd, tug txivneej ntawd yuav raug txim.

²¹Tabsis yog tug qhev ntawd tseem nyob tau ib nub lossis ob nub, maam le tuag, mas tug tswv yuav tsi raug txim; rua qhov tug qhev ntawd yog nwg yuav lug.

²²“Yog muaj tej txivneej sis ntaus raug ib tug quaspuj kws suab mivnyuas huv plaab, ua rua nwg tug mivnyuas pob, tabsis nwg tsi mob ntxiv, mas yuavtsum muab tug kws ntaus raug tug quaspuj ntawd nplua lawv le nwg tug quasyawg xaav tau hab lawv le cov tu plaub pum zoo.

²³Tabsis yog tug quaspuj ntawd raug mob ib qho twg, mas yuavtsum rau txim sav pauj sav,

²⁴qhovmuag pauj qhovmuag, nav pauj nav, teg pauj teg, kutaw pauj kutaw,

²⁵qhov kub nyab pauj qhov kub nyab, qhov txhaab pauj qhov txhaab, hab qhov nqaj pauj qhov nqaj xwb.

²⁶“Yog tug txivneej twg ntaus nwg tug tubqhe lossis nwg tug ntxhais qhev qhovmuag dlig, nwg yuavtsum tso tug ntxhais qhev ntawd moog ywj sab, vim nwg muab ntaus dligmuag lawm.

²⁷Yog nwg ntaus nwg tug tubqhe lossis tug ntxhais qhev luv nav, nwg yuavtsum muab tso moog vim nwg muab ntaus luv nav lawm.

²⁸“Yog nyuj nrau ib tug tuabneeg twg tuag, yuavtsum muab pobzeb ntaus tug nyuj ntawd kuas tuag, hab tsi xob noj tug nyuj ntawd tej nqaj, tabsis tsi xob rau txim rua tug tswv nyuj.

²⁹Yog tug nyuj ntawd tub yeej txeev nrau tuabneeg lug lawm hab tub muaj tuabneeg moog has rua tug tswv nyuj paub lawm, tabsis nwg tsi ceev tug nyuj ntawd rua huv nkuaj, txhaj moog nrau tuabneeg tuag, yuavtsum muab pobzeb ntaus tug nyuj hab tug tswv nyuj kuas tuag huv tuabsi.

³⁰Tsi taag le ntawd xwb, yog tug tswv txaus sab muab nyaj txhwv nwg txujsa, mas nwg yuavtsum them lawv le luas kuas nwg them.

³¹Yog tug nyuj ntawd nrau tug tub lossis tug ntxhais twg tuag los yeej ua lawv nraim le tuab txuj kevcai nuav hab.

³²Yog tug nyuj ntawd nrau tug tubqhe lossis tug ntxhais qhev twg tuag, tug tswv nyuj yuavtsum them peb caug dlaim nyaj nqe taubhau rua tug qhev ntawd tug tswv, hab yuavtsum muab pobzeb ntaus tug nyuj ntawd kuas tuag.

³³“Yog leejtwg qheb qhov lossis khawb qhov ca tsi muab npug, ib tug nyuj lossis ib tug neeg luav poob rua huv lub qhov ntawd,

³⁴nwg yuavtsum them tug nqe tsaj ntawd. Nwg them nyaj rua tug tswv tsaj hab nwg yuav tug tsaj ntawd.

³⁵Yog leejtwg tug nyuj moog nrau lwm tug, tug nyuj tuag, mas muab tug nyuj ntawd muag hab muab cov nyaj lug faib rua obtug ob leeg, hab muab tug nyuj tuag lug faib ib leeg ib saab.

³⁶Tabsis yog tug tswv nyuj tub paub has tas, nwg tug nyuj txeev nrau lwm tug lug lawm, tabsis nwg tsi ceev rua huv nkuaj, nwg yuav tau muab ib tug nyuj pauj tug nyuj kws tuag ntawd, hab nwg yuav tug nyuj kws tuag ntawd.