Read Hmong Njua Tsiv Dlim 22 Bible Online

Tsiv Dlim 22 - Hmong Njua bible

Tsiv Dlim 22

¹“Yog leejtwg nyag luas ib tug nyuj lossis ib tug yaaj hab muab tug tsaj ntawd tua lossis muab muag lawm, nwg yuavtsum them tsib tug nyuj pauj ib tug nyuj, hab plaub tug yaaj pauj ib tug yaaj.

²“Yog muaj tubsaab tuaj tsoo tsev mo ntuj hab raug tua tuag, tug kws tua tug tubsaab ntawd tsi txhum;

³Tabsis yog nwg tua nruab nub, mas nwg txhum. “Tug tubsaab yuavtsum raug them tej kws nwg moog nyag lug. Yog nwg tsi muaj nyaj them, nwg yuavtsum muab nwg muag moog ua luas qhev hab muab cov nyaj lug them tej nqe kws nwg nyag ntawd.

⁴“Yog tug tubsaab ntawd nyag tsaj, tsi has nyuj, neeg luav, lossis yaaj kws moog nrhav tau tseem caj sa hab nwg caab rawv ntawm nwg teg, mas nwg yuavtsum them ob tug pauj ib tug.

⁵“Yog leejtwg tso nwg tej tsaj moog noj zaub huv teb lossis vaaj txiv maab, hab cov tsaj ntawd moog noj luas lwm tug tej qoob huv luas thaaj teb, nwg yuavtsum muab tej qoob kws zoo tshaaj plawg huv nwg thaaj teb lossis huv nwg lub vaaj txiv maab moog them.

⁶“Yog leejtwg hlawv nwg thaaj teb hab kis moog kub luas tej pawg nplej huv luas tej teb, hab kub luas tej nplej kws tsi tau sav lossis tub hlais taag hab muab sau ua pawg lawm, tug kws ua suavtawg kub ntawd yuavtsum them tej kws nwg ua suavtawg kub ntawd.

⁷“Yog leejtwg zoo sab khaws lwm tug tej nyaj lossis tej khoom muaj nqes ca rua huv nwg tsev hab muaj tubsaab tuaj nyag tej ntawd huv nwg tsev lawm, yog nwg nteg tau, mas tug tubsaab ntawd yuavtsum them ob npaug.

⁸Tabsis yog nteg tsi tau tug tubsaab ntawd, mas yuav tau coj tug kws ca cov nyaj ntawd moog rua tom qhov chaw kws pehawm Vaajtswv, hab kuas nwg twv has tas, nwg yeej tsi tau nyag cov nyaj ntawd.

⁹“Txhua rooj plaub kws yog sis txeeb tej cuabtxhaj cuabtaam, xws le nyuj, neeg luav, yaaj, rig tsho lossis lwm yaam kws pluj lawm, yuavtsum coj ob tug txivneej kws sis txeeb tej ntawd moog sawv tim ntsej tim muag rua ntawm Vaajtswv. Yog Vaajtswv txav txim rua tug twg, tug ntawd yuavtsum them ob npaug rua tug kws yeej cai.

¹⁰“Yog leejtwg pum zoo coj lwm tug tej neeg luav, nyuj, yaaj lossis lwm yaam tsaj lug tu, yog tug tsaj ntawd tuag lossis raug mob lossis muaj lwm tug muab lawv tsiv lawm, hab tsi muaj tuabneeg ua timkhawv pum,

¹¹ces nwg yuavtsum moog rua ntawm qhov chaw pehawm Vaajtswv hab tsaa teg twv has tas, nwg tsi tau nyag. Yog tsi muaj tuabneeg nyag tug tsaj ntawd, mas tug tswv tsaj yuavtsum zoo sab ca tug tsaj ntawd pluj moog, hab tug kws saib tug tsaj ntawd txhaj tsi tau them,

¹²tabsis yog muaj tuabneeg nyag tug tsaj ntawd lawm, nwg yuavtsum them rua tug tswv tsaj.

¹³Yog muaj tsaj qus tum tug tsaj ntawd lawm, tug kws saib tug tsaj ntawd tsuas nqaa cov nqaj kws seem moog qha rua tug tswv paub xwb, yog tsaj tum tuag ces nwg tsi tau them.

¹⁴“Yog leejtwg moog qev lwm tug ib tug tsaj lug ua raug mob lossis ua tuag thaus tug tswv tsi nyob ntawd pum, tug qev yuavtsum them tug tsaj ntawd.

¹⁵Tabsis yog tuag thaus tug tswv pum ntsoov, tug qev yuav tsi tau them. Yog nwg ndlav, ces cov nqe ntawd yeej npug tug tsaj nqe lawm.

¹⁶“Yog leejtwg moog ntxag ib tug nkaujxwb kws tsi tau muaj tuabneeg qhab hab moog nrug nwg pw lawm, tug ntawd yuavtsum them tug ntxhais ntawd nqe tshoob hab yuav nwg ua quaspuj.

¹⁷Tabsis yog leej txiv tsi kaam muab nwg tug ntxhais rua tug ntawd yuav ua quaspuj los nwg yuavtsum them nyaj kuas txaus nkaus tug ntxhais ntawd cov nqe tshoob.

¹⁸“Cov quaspuj kws txawj ua khawvkoob hab saib yaig, yuavtsum muab tua povtseg.

¹⁹“Tug txivneej twg ntxag tsaj, mas yuavtsum muab tug ntawd tua povtseg.

²⁰“Yog leejtwg fij khoom rua lwm tug vaajtswv kws tsi yog tug TSWV, yuavtsum muab tug ntawd tua povtseg.

²¹“Mej tsi xob tsimtxom lossis quab yuam cov tuabneeg txawv tebchaws kws nrug mej nyob, rua qhov thaus mej nyob nraag tebchaws Iziv, mej tub yog tuabneeg txawv tebchaws hab.

²²Mej tsi xob tsimtxom ib tug puj ntsuag lossis ib tug mivnyuas ntsuag twg.

²³Yog mej tsimtxom puab, thaus puab quaj thov kuv, kuv kws yog tug TSWV nov puab tej suab quaj,

²⁴kuv yuav npautawg rua mej hab kuv yuav tua mej huv tshaav rog. Mej cov quaspuj yuav ua puj ntsuag hab mej cov mivnyuas yuav ua mivnyuas ntsuag.

²⁵“Yog mej qev nyaj rua kuv cov tuabneeg kws yog cov pluag, tsi xob tsub paaj rua nwg them.

²⁶Yog leejtwg muab nwg lub tsho ntev tuaj yuam nqe rua koj hab nwg coglug yuav txhwv rov qaab, thaus tsaus ntuj koj yuavtsum xaa rua nwg,

²⁷rua qhov nwg muaj tuab lub tsho ntawd naav kuas suv xwb. Nwg yuav ua le caag pw tsaug zug? Thaus nwg quaj thov kuv, kuv yuav teb nwg tej lug thov, rua qhov kuv yog tug kws muaj lub sab taabncuab.

²⁸“Mej tsi xob has lug phem rua Vaajtswv, hab tsi xob foom phem rua tej numtswv kws tswjfwm mej.

²⁹“Muab mej tej qoobloo, mej tej txiv maab, hab mej tej roj txiv ntoo, coj tuaj fij rua kuv thaus kws tej ntawd sav lawm. “Muab mej cov tub hlub pub rua kuv.

³⁰Muab mej tej nyuj hab tej yaaj thawj tug mivnyuas kws yog tug txiv coj tuaj fij rua kuv. Thawj tug mivnyuas kws yog tug txiv, mas ca nrug tug nam nyob xyaa nub xwb, nub yim yuavtsum coj tuaj fij rua kuv.

³¹“Mej yog kuv tsaav tuabneeg, mej tej tsaj kws raug tsaj qus tum tuag rua huv tshaav zaub, mej tsi xob muab tej nqaj lug ua noj, ca le muab pov rua dlev noj xwb.