Read Hmong Njua Tsiv Dlim 23 Bible Online

Tsiv Dlim 23 - Hmong Njua bible

Tsiv Dlim 23

¹“Tsi xob coj tej zaaj tsi tseeb moog has rua nrau toj nrau peg, hab tsi xob ua timkhawv tsi tseeb paab tug tuabneeg txhum.

²Tsi xob nrug paab tuabneeg coob moog ua txhum lossis nrug feem coob ua timkhawv tsi ncaaj huv tsev tu plaub,

³hab tsi xob xaiv cov tuabneeg pluag ntsejmuag huv tsev tu plaub.

⁴“Yog koj moog pum koj tug yeebncuab, tug nyuj lossis tug neeg luav kws pluj lawm, koj ca le caab rov qaab lug rua nwg.

⁵Yog koj pum nwg tug neeg luav thauj nraa qaug, koj yuavtsum moog paab tsaa tug neeg luav ntawd sawv; tsi xob dlhau moog.

⁶“Tsi xob txav txim tsi ncaaj rua tug tuabneeg pluag thaus nwg tuaj rua huv tsev tu plaub.

⁷Tsi xob laam nrhav lug tsi tseeb lam rua lwm tug, hab tsi xob tua cov tuabneeg kws tsi muaj txim dlaabtsi povtseg. Kuv yuav rau txim rua txhua tug kws ua phem le ntawd.

⁸Tsi xob yuav luas tej nyaj xab, rua qhov tej nyaj ntawd ua rua cov numtswv qhovmuag faam, txav txim tsi ncaaj hab ua rua cov tuabneeg ncaaj nceeg swb cai.

⁹“Tsi xob tsimtxom cov tuabneeg poob tebchaws; mej yeej paub has tas, ua tuabneeg txawv tebchaws zoo le caag, rua qhov thaus u mej yeej tau moog ua tuabneeg poob tebchaws nyob nraag tebchaws Iziv lawm hab.

¹⁰“Mej muab rau xyoo lug tseb nplej hab sau mej tej qoobloo huv mej tej teb.

¹¹Tabsis xyoo xyaa ca tej teb su, hab tsi xob sau ib yaam dlaabtsi kws tuaj huv mej tej teb ntawd le. Cov tuabneeg pluag yuav noj tej khoom kws tuaj huv tej teb ntawd, hab tej tsaj qus yuav tau noj tej kws seem. Mej tej vaaj txiv maab hab mej tej txiv ntoo roj los ua ib yaam le ntawd.

¹²“Mej ua mej tej num rau nub, tabsis nub xyaa mej su tsi xob ua num, ca mej tej tubqhe hab cov tuabneeg txawv tebchaws kws ua num rua mej hab mej tej tsaj tau su.

¹³“Ncu ntsoov txhua yaam kws kuv has rua mej lawm. Tsi xob thov lwm tug Vaajtswv; hab tsi xob has txug puab tej npe hlo le.

¹⁴“Yuavtsum ua kevcai ua kuv tsaug ib xyoos twg peb zag.

¹⁵Lub hli Anpis, yog lub hli kws mej tawm nraag tebchaws Iziv lug, mej ua kevcai noj Ncuav Tsi Xyaw Keeb lawv le kuv tub tau saamfwm tseg rua mej lawm. Xyaa nub kws mej ua kevcai ntawd mej tsi xob noj tej ncuav xyaw keeb hlo le. Mej tsi xob tuaj pehawm kuv teg dlawb teg nplag.

¹⁶“Ua Kevcai Sau Qoobloo rua thaus lub caij kws mej pib sau mej tej qoob. “Ua Kevcai Nyob Tsev Pheebsuab rua lub caij nplooj ntoos zeeg hab thaus mej dle mej tej txiv maab txiv ntoo huv mej tej vaaj.

¹⁷Mej yuavtsum ua kevcai ib xyoos peb zag hab taagnrho mej cov txivneej ca le tuaj pehawm kuv kws yog tug TSWV mej tug Vaajtswv.

¹⁸“Tsi xob muab ncuav xyaw keeb fij rua kuv thaus mej muab tsaj tua hlawv fij rua kuv. Cov roj tsaj kws tua theej txhoj fij rua kuv thaus mej ua cov kevcai nuav, tsi pub seem moog txug taagkig sawv ntxuv le.

¹⁹“Txhua xyoo mej yuavtsum coj tej qoob kws mej xub sau tau lug tuaj fij rua huv tug TSWV kws yog mej tug Vaajtswv lub tsev. “Tsi xob muab mivnyuas yaaj lossis mivnyuas tshis cov nqaj lug hau nrug leej nam cov kua mig.

²⁰“Kuv yuav khaiv ib tug timtswv moog ua mej ntej, tsomkwm mej thaus mej taabtom taug kev hab nwg yuav coj mej moog kuas txug qhov chaw kws kuv tub tau npaaj tseg rua mej lawm.

²¹Mej yuavtsum noog nwg lug hab fwm nwg. Tsi xob ntxeev sab tawmtsaam nwg, rua qhov kuv yog tug tso nwg lug, hab nwg yuav tsi zaam txim rua mej.

²²Tabsis yog mej fwm nwg hab ua lawv le kuv tej lug saamfwm, kuv yuav tawmtsaam mej tej yeebncuab.

²³Kuv tug timtswv yuav moog ua mej ntej hab coj mej moog kuas txug huv lub tebchaws kws cov Amaules, cov Hitis, cov Pelixes, cov Kana-aas, cov Hivis hab cov Yenpus nyob, hab kuv yuav ua kuas puab puamtsuaj taag.

²⁴Mej tsi xob pe puab tej mlom, hab tsi xob moog xyum coj puab tej kevcai. Muab puab tej mlom rhuav povtseg hab muab puab tej ncej zeb tseemceeb tsoo povtseg.

²⁵Yog mej pehawm kuv kws yog tug TSWV, mej tug Vaajtswv, kuv yuav foom koob moov kuas mej muaj mov noj hab dlej haus nplua mag hab yuav tshem mej tej kaab mob kev nkeeg moog huv tuabsi.

²⁶Nyob huv mej lub tebchaws, mej cov quaspuj yuav tsi pob mivnyuas lossis txhua tug quaspuj yuav muaj tub muaj ki, kuv yuav pub kuas mej muaj sa nyob ntev.

²⁷“Kuv yuav ua rua cov tuabneeg kws thaiv mej kev kuas puab ntshai kuv; kuv yuav coj kev ntxhuv sab lug rua cov tuabneeg kws mej yuav moog tua ntawd hab kuv yuav ua kuas mej cov yeebncuab tsiv tawm ntawm mej moog.

²⁸Kuv yuav ua kuas mej cov yeebncuab ntshai yoog taag; kuv yuav lawv cov Hivis, cov Kana-aas hab cov Hitis tsiv ua ntej mej moog txug.

²⁹Kuv yuav tsi lawv puab tsiv kuas taag huv ib lub xyoos. Yog kuv ua le ntawd, lub tebchaws yuav caj nroj tsuag hab yuav muaj tsaj qus coob heev.

³⁰Kuv yuav lawv puab tawm ib zag mivntsiv moog txug thaus mej fuamvaam coob zuj zug, maam le muab hlo lub tebchaws rua mej.

³¹Kuv yuav tu nrim rua mej lub tebchaws pib kag ntawm ceg Havtxwv Lab moog txug ndlua ntawm Havtxwv Meditelanees, hab pib kag ntawm taj suabpuam moog txug ndlua ntawm tug Dlej Efalates. Kuv yuav muab fwjchim rua mej lawv cov tuabneeg kws nyob huv lub tebchaws ntawd kuas tsiv ua ntej kws mej moog nyob.

³²Mej tsi xob koom teg nrug puab lossis teev puab tej mlom hlo le.

³³Mej tsi xob ca cov tuabneeg ntawd nrug mej nyob huv mej lub tebchaws; yog mej ca puab nrug mej nyob, puab yuav coj mej moog ua txhum tawmtsaam kuv. Yog mej pe puab tej mlom, tej mlom ntawd yuav yog ib rooj ntxab kws tais mej cejdlaab.”