Read Hmong Njua Tsiv Dlim 24 Bible Online

Tsiv Dlim 24 - Hmong Njua bible

Tsiv Dlim 24

¹Tug TSWV has rua Mauxes has tas, “Koj ca le tuaj cuag kuv sau roob nuav, coj Aloos, Nadas, Anpihus hab cov Yixalayees cov thawjcoj xyaa caum leej nrug koj tuaj; hab mej tuaj dleb dleb pehawm kuv xwb.

²Tsuas pub koj txaav tuaj ze kuv xwb, tsi pub lwm tug txaav tuaj ze kuv. Tsi xob pub cov pejxeem nce tuaj rua sau roob nuav hlo le.”

³Mauxes txhaj coj tug TSWV tej lug hab tej kevcai lug pav qha rua cov pejxeem, hab taagnrho cov pejxeem thooj txhij teb has tas, “Peb yuav ua txhua yaam lawv le tug TSWV has.”

⁴Mauxes sau tug TSWV tej lug huv tuabsi ca. Nub tom qaab thaus sawv ntxuv, Mauxes moog teeb ib lub thaaj rua tim taw roob, hab muab kaum ob lub pobzeb lawv le cov Yixalayees kaum ob xeem lug teeb tseg ca ua chaw ncu txug.

⁵Mauxes khaiv cov tub hluas Yixalayees kuas moog hlawv tej khoom fij, hab tua nyuj hlawv fij rua tug TSWV ua kev sis raug zoo.

⁶Mauxes muab cov ntshaav nyuj ib nraab tso rua huv cov phab hab muab ib nraab ndluav rua lub thaaj.

⁷Nwg muab phoo ntawv kws sau cov lug cog tseg kws tug TSWV saamfwm kuas sau, lug nyeem rua cov pejxeem noog. Cov pejxeem leeg lug rua nwg has tas, “Peb yuav noog hab ua txhua yaam lawv le tug TSWV has.”

⁸Ces Mauxes muab cov ntshaav kws nyob huv cov phab nchus rua cov pejxeem. Mauxes has tas, “Ntawm nuav yog cov ntshaav kws tug TSWV muab ua lub cim coglug tseg rua mej lawv le cov lug saamfwm nuav.”

⁹Mauxes, Aloos, Nadas, Anpihus, hab cov Yixalayees xyaa caum leej thawjcoj txhaj nce moog sau roob

¹⁰hab puab pum cov Yixalayees tug Vaajtswv. Qhov chaw kws nwg tsuj pua cov hlaws ntsuab le ntuj ntsuab.

¹¹Vaajtswv tsi tau ua le caag rua cov Yixalayees cov thawjcoj kuas raug kev puamtsuaj; puab puavleej pum Vaajtswv, hab cov thawjcoj ntawd noj haus ua ke.

¹²Tug TSWV has rua Mauxes has tas, “Koj ca le nce tuaj cuag kuv sau roob, koj tuaj nyob sau nuav tog, kuv yuav muab ob dlaim txag zeb kws kuv sau kuv tej lug hab kuv tej kevcai txhua nqai rua koj, kuv sau tej nuav tseg ca qha suavdlawg.”

¹³Mauxes hab Yausuas tug kws yog Mauxes tug tubkhai txawm sawv kev moog, hab Mauxes txawm nce moog sau Vaajtswv lub roob lawm.

¹⁴Mauxes has rua cov thawjcoj tas, “Mej nyob ntawm lub yeej nuav tog txug thaus wb rov qaab lug. Aloos hab Hules obtug nrug mej nyob ntawm nuav; hab yog mej leejtwg muaj plaub ntug dlaabtsi ca le moog cuag obtug.”

¹⁵Mauxes nce moog sau roob hab muaj fuab pus tsaus nti sau.

¹⁶Tug TSWV tug tshwjchim nyob sau Roob Xinais, hab fuab pus tsaus nti tau rau nub; hab nub xyaa tug TSWV hu huv tauv fuab tuaj rua Mauxes.

¹⁷Tug TSWV tug tshwjchim ci ntsaa ab tshwm lug rua cov Yixalayees pum zoo ib yaam le nplaim tawg cig laam lug sau roob tuaj.

¹⁸Mauxes txawm nce moog sau roob hab nkaag moog rua huv tauv fuab. Nwg moog nyob sau roob tau plaub caug nub plaub caug mo.