Read Hmong Njua Tsiv Dlim 25 Bible Online

Tsiv Dlim 25 - Hmong Njua bible

Tsiv Dlim 25

¹Tug TSWV has rua Mauxes has tas,

²“Koj has rua cov Yixalayees kuas coj khoom tuaj fij rua kuv. Koj ca le txais txhua yaam kws cov tuabneeg txaus sab coj tuaj fij.

³Cov khoom kws coj tuaj fij nuav mas yog: kub, nyaj, tooj;

⁴xuv xav, xuv tsaamxem, xuv lab hab tej rig tsho kws muab plaub tshis lug ntus ua;

⁵hab tej tawv yaaj kws muab zaas tshuaj paajyeeb tej tawv nyuj kws zoo heev, ntoo kubtwg;

⁶hab roj saam teeb, tej roj pleev txhawb meejthawj hab tej moov tshuaj kws tsw qaab;

⁷tej qai zeb hab tej hlaws kws muaj nqes tshaaj plawg kws coj moog dlai rua ntawm tug Povthawj Hlub lub tsho efaus hab nwg dlaim ntaub npug hauvsab.

⁸Puab yuavtsum ua ib lub Tsevntaub rua kuv, kuv txhaj nrug puab nyob.

⁹Ua lub Tsevntaub nuav hab npaaj ua tej khoom siv rua huv lub Tsevntaub ntawd lawv le kuv yuav qha koj ua ntaag.

¹⁰“Muab cov ntoo kubtwg lug ua ib lub Phijxaab, qhov ntev ob tshim hab ib dlus, qhov dlaav ib tshim hab ib dlus, hab qhov sab ib tshim hab ib dlus.

¹¹Muab cov tseem kub vuam lub phijxaab ntawd saab nrau hab saab huv nruab nrog, hab muab kub lug ua tug ntug thoob plawg.

¹²Muab kub ua plaub lub khawb ntsa rua ntawm plaub tug ceg, ntsa ib saab ob lub khawb.

¹³Muab ntoo kubtwg ua ob tug laag kws kwv hab muab kub vuam ob tug laag ntoo ntawd huv tuabsi,

¹⁴hab muab ob tug laag ntawd ntxig rua huv cov khawb ntawm lub phijxaab ib saab ib tug laag.

¹⁵Thaus ntxig rua huv cov khawb lawm tsi xob rhu le.

¹⁶Ca le muab ob dlaim txag zeb kws kuv sau kuv cov lug saamfwm kws kuv yuav muab rua koj tso rua huv lub Phijxaab ntawd.

¹⁷“Muab cov tseem kub ua dlaim khwb, qhov ntev ob tshim hab ib dlus, qhov dlaav ib tshim hab ib dlus.

¹⁸Muab kub ntaus ua ob tug qhelunpees muaj tis,

¹⁹txawb ib tug rua ib tog hau phijxaab. Muab ob tug qhelunpees cog keevxeeb rua lub hau phijxaab ib tug rua ib tog.

²⁰Tso ob tug qhelunpees ntawd tig xubndlag tuaj ua ke, kuas cov koojtis nthuav lug roog lub phijxaab.

²¹Muab ob dlaim txag zeb ca rua huv lub Phijxaab hab muab lub hau khwb lub phijxaab.

²²Kuv yuav ntsib koj qhov ntawd, hab kuv nyob sau lub hau Phijxaab kis nruab nraab ntawm ob saab qaab koojtis qhelunpees. Kuv yuav muab kuv tej kevcai rua koj coj moog qha cov Yixalayees.

²³“Muab ntoo kubtwg lug ua ib lub rooj ntev ob tshim, dlaav ib tshim, sab ib tshim hab ib dlus.

²⁴Muab kub vuam lub rooj ntawd, hab muab kub nchuav ua ib tug ntug ncig thoob plawg lub npoo rooj.

²⁵Lub npoo rooj ntawd ua tuab le ib xib, hab muab kub ua ib tug ntswg thoob plawg lub npoo rooj.

²⁶Muab kub ntaus ua plaub lub khawb ntsa rua plaub lub kaum rooj ntawm plaub tug ceg.

²⁷Cov khawb kws ntxig laag kwv lub rooj ntawd, muab ntsa kuas ze rua ntawm tug npoo.

²⁸Muab ntoo kubtwg lug txua ua ob tug laag hab muab kub vuam rua ob tug laag ntawd.

²⁹Ua phaaj, khob, hub hab taig lug tau laub cawv txiv maab ua khoom fij. Tej twj taig nuav yuavtsum muab cov tseem kub ua xwb.

³⁰Lub rooj ntawd yuavtsum txawb rua ntawm hauv ntej lub Phijxaab kws ntim Vaajtswv tej lug cog tseg, hab cov ncuav dlawbhuv kws fij rua kuv yuavtsum ca nyob sau lub rooj.

³¹“Muab cov tseem kub ntaus ua ib lub teeb. Lub taw hab tug ncej txawb teeb los muab tej tseem kub ntaus ua paaj, cos paaj, hab nplai paaj, kuas keevxeeb rua ntawm tug ncej txawb teeb.

³²Hab ua kuas ncau ua rau ceg, ib saab peb ceg.

³³Rau ceg ntawd ib ceg ua peb lub paaj zoo le paaj txiv dluaj, nrug cov cos paaj hab nplooj.

³⁴Tug ncej txawb teeb mas zaig ua plaub lub paaj zoo le paaj txiv dluaj, nrug cov cos paaj hab cov nplooj.

³⁵Ntawm rau tug ceg teeb ntawd, ua ib lub paaj rua huv qaab ntawm cov ceg ncau.

³⁶Cov cos paaj, cov ceg hab tug ncej txawb teeb yog muab tuab thooj kub ntaus ua xwb.

³⁷Ua xyaa lub teeb rua ntawm tug ncej txawb teeb, hab taws kuas cig pum kev laam lug rua tom hauv ntej.

³⁸Muab cov tseem kub ntaus ua raab txab kws txav cov teebxeeb hab ua lub phaaj rau txab.

³⁹Muab xyaa caum tsib choj kub lug ntaus ua tej ceg teeb, hab tej twj taig kws siv rua lub teeb.

⁴⁰Yuavtsum ua txhua yaam nuav lawv le kuv tau qha rua koj sau roob lawm.