Read Hmong Njua Tsiv Dlim 26 Bible Online

Tsiv Dlim 26 - Hmong Njua bible

Tsiv Dlim 26

¹“Muab kaum dlaim ntaub maag xav kws zoo heev, ntaub tsaamxem, hab xuv lab lug ua lub tsevntaub. Xaws ib cov qhelunpees rua ntawm cov ntaub ntawd.

²Txav cov ntaub ntawd kuas sis luag zog, ib dlaim ntev neeg nkaum yim tshim, dlaav plaub tshim.

³Muab tsib dlaim xaws ua ib dlaig, muab kaum dlaim xaws ua ob dlaig.

⁴Xub muab dlaim ntaub xav xaws rua txhua dlaim ntaub cov ntug saab nrau.

⁵Ua tsib caug lub ntsej rua thawj dlaim ntaub hab tsib caug lub ntsej rua dlaim ob, yuavtsum ntsuag kuas sis ncaag zog.

⁶Muab kub ntaus ua tsib caug lub khawb khawm ob dlaim ntaub ua ib dlaig.

⁷“Muab kaum ib dlaim ntaub plaub tshis xaws ua ib dlaig vuv lub Tsevntaub ntawd.

⁸Txav cov ntaub ntawd kuas sis luag zog, ib dlaim ntev peb caug tshim hab dlaav plaub tshim.

⁹Muab tsib dlaim ntaub plaub tshis xaws ua ib dlaig, hab muab rau dlaim xaws ua ib dlaig. Dlaim rau yog dlaim kws dlauv ua lub hauvmum Tsevntaub.

¹⁰Ua tsib caug lub ntsej tis rua tog taw tom nuav, hab ua tsib caug lub ntsej tis rua tog taw tom u.

¹¹Muab tooj ntaus ua tsib caug lub khawb khawm ob dlaim ntaub ntawd ua ib dlaig vuv lub tsev.

¹²Dlaim ntaub kws vuv lub tsev, tseg ib nraab nqug moog thaiv saab peg qaum Tsevntaub.

¹³Tseg tw dlauv rua ob saab, ib saab twg tseg ntev le ib tshim, dlauv lug npug lub Tsevntaub.

¹⁴“Vuv ob txheej tuaj sau, ib txheej yog muab cov tawv laug yaaj kws zaas lab, hab ib txheej yog muab cov tawv kws zoo heev.

¹⁵“Txav ntoo kubtwg lug ua cov taab kws sawv ntsug txheem lub Tsevntaub.

¹⁶Txhua tug taab ntev kaum tshim hab dlaav ib tshim hab ib dlus,

¹⁷muab ob saab npoo qhais ua qwb dla sis dlhos, kuas cov taab ntawd sis dlhos ua ke. Taagnrho cov taab ntawd puavleej muab qhais ua qwb dla huv tuabsi.

¹⁸Muab neeg nkaum tug taab txhus rua saab nraag,

¹⁹muab plaub caug pluaj nyaj ua taw tag rua neeg nkaum tug taab, ob pluaj tag ib tug taab, kuas ob tug taab ntawd txhaj sis dlhos ruaj.

²⁰Muab neeg nkaum tug taab txheem lub Tsevntaub saab peg,

²¹hab muab plaub caug pluaj nyaj ua taw tag, ob pluaj tag ib tug taab.

²²Lub Tsevntaub saab tom qaab kws yog saab nubpoob, txheem rau tug taab,

²³hab muab ob tug taab txheem lub kaum tsev tom kawg.

²⁴Cov taw taab puavleej txawb rua sau cov taw nyaj ntawd. Ob tug taab huv taw los yuavtsum txawb sis dlhos ib yaam nkaus.

²⁵Yog le ntawd, muaj yim tug taab hab kaum rau pluaj nyaj, ob pluaj tag ib tug taab.

²⁶“Txua kaum tsib tug laag ntoo kubtwg, muab tsib tug ua taab rua saab phaab ntsaa Tsevntaub saab peg,

²⁷muab tsib tug ua taab rua saab phaab ntsaa saab nraag, hab muab tsib tug ua taab rua saab hauvmum tom qaab kawg kws yog saab nubpoob.

²⁸Tug laag nruab nraab, yog tug kws yuam cov phaab ntsaa ntu nruab nraab, tom nuav moog ti nkaus rua tom u.

²⁹Muab cov tseem kub vuam cov taab hab muab cov khawb kub khawm cov taab rua ntawm cov nqaaj, cov nqaaj ntawd puavleej muab kub vuam huv tuabsi.

³⁰Tsaa lub Tsevntaub lawv le kuv tau qha rua koj sau Roob Xinais.

³¹“Muab ib dlaim ntaub maag zoo heev kws txaij xav, txaij paajyeeb lab hab cov plaub yaaj kws zaas lab lug ua dlaim ntaub thaiv. Xaws cov dluab qhelunpees rua ntawm dlaim ntaub ntawd.

³²Muab cov nqailauj kub dlai rua hab coj moog khuab rua ntawm plaub tug ncej ntoo kubtwg kws vuam kub, hab muab txawb rua sau plaub pluaj nyaj kws tag taw.

³³Muab dlaim ntaub ntawd dlai rua ntawm cov khawb huv lub tsev, hab muab lub Phijxaab kws ntim ob dlaim txag zeb kws kuv sau tej lug cog tseg txawb rua ntawm dlaim ntaub saab tod. Dlaim ntaub ntawd quas Chaav Dlawbhuv hab Chaav kws Dlawbhuv kawg nkaus.

³⁴Muab lub hau moog khwb lub Phijxaab kws ntim tej lug cog tseg.

³⁵Muab lub rooj moog txawb rua saab nrau dlaim ntaub saab peg, hab muab tug ncej txawb teeb txawb rua saab nraag.

³⁶“Muab ib dlaim ntaub maag zoo heev kws txaij xav, txaij paajyeeb hab xuv lab kws xaws ua paaj ntaub txaij nraug zeeg lug ua dlaim ntaub npug lub qhovrooj Tsevntaub.

³⁷Koj yuavtsum ua tsib tug ncej ntoo kubtwg hab muab tej tseem kub vuam rua hab ua ib co nqailauj kub dlai dlaim ntaub nuav rua sau; hab ua tsib tug taw tooj tag cov ncej ntawd.