Read Hmong Njua Tsiv Dlim 29 Bible Online

Tsiv Dlim 29 - Hmong Njua bible

Tsiv Dlim 29

¹“Ntawm nuav yog tej kws koj yuavtsum ua rua Aloos hab nwg cov tub, muab puab tsaa ua povthawj ua kuv teg num. Muab ib tug ntsuag nyuj hab ob tug laug yaaj kws tsi muaj ib qhov phem le.

²Muab cov tseem moov nplej kws tsi xyaw keeb zuaj ua ib cov ncuav, muab ib cov moov ntse roj txiv ntoo ua dlua ib cov ncuav, muab ib cov puab ua tej lub nyag nyag muab roj txiv ntoo pleev rua sau.

³Koj ca le muab cov ncuav ntawd ntim rua huv tawb coj tuaj fij rua kuv thaus kws koj muab tug ntsuag nyuj hab ob tug laug yaaj tua fij.

⁴“Koj ca le coj Aloos hab nwg cov tub moog rua tom lub qhovrooj kws yuav moog rua huv lub Tsevntaub kws yog kuv qhov chaw sis ntsib, hab muab dlej lug ua kevcai ntxuav puab.

⁵Koj muab cov tsoog tsho rua Aloos naav kws yog lub tsho ntev, lub tsho efaus, lub tsho kws naav npug lub tsho efaus, dlaim ntaub npug hauvsab hab txuj hlaab rua nwg sa.

⁶Khu txuj phuam rua Aloos ntoo sau taubhau, hab muab dlaim phaj kub dlawbhuv kws txaug cov lug has tas, ‘Dlawbhuv rua tug TSWV,’ khi rua sau txuj phuam.

⁷Ces koj muab cov roj kws txhawb meejthawj laub rua Aloos taubhau hab muab nwg tsaa ua povthawj.

⁸“Koj coj Aloos cov tub tuaj hab muab cov tsho nuav rua puab naav;

⁹muab hlaab rua puab sa hab muab mom rua puab ntoo. Ua le ntawd yog koj tsaa Aloos hab nwg cov tub ntaag. Ces puab hab puab cov xeebntxwv yuav ua povthawj ua kuv teg num moog ibtxhis le.

¹⁰“Caab tug txiv nyuj moog rua ntawm hauv ntej lub qhovrooj Tsevntaub kws yog kuv qhov chaw sis ntsib, has rua Aloos hab nwg cov tub kuas tsaa teg rua sau tug txiv nyuj taubhau.

¹¹Muab tug txiv nyuj ntawd tua taabmeeg tug TSWV rua ntawm lub qhovrooj Tsevntaub sis ntsib.

¹²Muab koj tug ntivteg tub tug txiv nyuj ntawd cov ntshaav moog pleev rua lub thaaj cov kub. Ces dlua le cov ntshaav kws seem muab laub ywg lub taw thaaj kuas taag.

¹³Koj muab cov paavywj, nplooj sab kws zoo tshaaj plawg hab ob lub raum nrug cov npluag roj kws qhwv ob lub raum, coj moog hlawv rua sau lub thaaj fij rua kuv.

¹⁴Tabsis tug nyuj cov nqaj, dlaim tawv hab cov plaab nyuv mas muab coj moog hlawv rua saab nrau ntug yeej. Qhov nuav yog muab fij tshem cov povthawj lub txim povtseg.

¹⁵“Muab ib tug yaaj lug hab has rua Aloos hab nwg cov tub, kuas puab tsaa teg rua sau tug yaaj ntawd taubhau,

¹⁶hab koj ca le muab tug yaaj ntawd tua, muab cov ntshaav coj moog ywg rua lub thaaj.

¹⁷Ces muab tug yaaj ntawd txav ua tej dlaim; ntxuav tej plaab nyuv hab cov cegqaab kuas huv, coj moog tso tshooj rua sau lub taubhau hab sau cov nqaj.

¹⁸Muab taagnrho tug yaaj ntawd coj moog hlawv rua sau lub thaaj fij rua tug TSWV, kuas tej paa tsw qaab ntxag rua tug TSWV.

¹⁹“Koj muab dlua ib tug yaaj lug hab has kuas Aloos hab nwg cov tub tsaa teg rua sau tug yaaj ntawd taubhau.

²⁰Koj muab tug yaaj ntawd tua, hab muab mivntsiv ntshaav coj moog pleev rua Aloos hab nwg cov tub cov tsho ntev lub ntsej saab xis hab pleev rua puab cov ntivtaw xoo saab xis. Muab cov ntshaav kws seem coj moog ywg rua lub thaaj plaub saab ntawd huv tuabsi.

²¹Koj muab mivntsiv ntshaav sau lub thaaj hab mivntsiv roj txhawb meejthawj nchus rua Aloos hab nwg lub tsho, nwg cov tub hab puab cov tsho. Ces nwg hab nwg cov tub hab puab tej tsoog tsho txhaj dlawbhuv txaus kuv sab.

²²“Muab tej roj yaaj hlais tseg, tej roj taubqaab, tej paavywj, nplooj sab, ob lub raum nrug cov npluag roj kws qhwv ob lub raum hab cegqaab saab xis.

²³Rhu cov ncuav kws tub muab fij rua kuv lawm huv lub tawb lug, muab ib yaam ib lub le nuav: muab ib lub ncuav xyaw roj txiv ntoo, muab ib lub ncuav tsi xyaw roj, muab ib lub ncuav nyag nyag,

²⁴hab koj muab taagnrho cov khoom fij nuav rua Aloos hab nwg cov tub, kuas puab muab yom fij rua kuv.

²⁵Ces koj rov txais cov zaub mov ntawm puab teg lug, hab muab coj moog hlawv rua sau lub thaaj, tso tshooj ntxiv rua sau cov zaub mov kws tub muab hlawv fij rua kuv lawm. Tej paa ntawd yuav tsw qaab ntxag txaus kuv sab heev.

²⁶“Koj muab lub hauv nrob yaaj coj lug yom fij tshwjxeeb rua kuv. Thooj nqaj hauv nrob nuav yog koj tug.

²⁷“Tug yaaj kws muab tua yom fij rua kuv, thaus ua kevcai tsaa tug povthawj, yuavtsum muab lub hauv nrob hab cegqaab tshwj rua ib caag, tseg rua Aloos hab nwg cov tub.

²⁸Thaus kuv tsaav tuabneeg fij puab tej khoom sis raug zoo, mas muab lub hauv nrob hab cegqaab ua cov povthawj tug, kuv txhaj tsi hloov sab. Qhov nuav yog cov pejxeem muab rua kuv kws yog tug TSWV.

²⁹“Thaus Aloos tuag, muab nwg cov rig tsho kws yog tug povthawj rua nwg cov tub naav, rua qhov puab yuav naav thaus kws tsaa puab ua povthawj.

³⁰Aloos tug tub kws ua povthawj hloov nwg chaw yuavtsum naav cev rig tsho ntawd xyaa nub, thaus kws nwg tuaj rua huv lub Tsevntaub kws yog kuv qhov chaw sis ntsib hab ua kuv teg num huv Chaav Dlawbhuv.

³¹“Coj tug yaaj kws tua ua kevcai tsaa Aloos hab nwg cov tub ntawd, moog hau rua huv chaav dlawbhuv.

³²Puab yuav noj cov nqaj yaaj hab cov ncuav kws tseg rua huv lub tawb nyob ntawm kuv lub Tsevntaub sis ntsib lub qhovrooj.

³³Puab yuavtsum noj tej zaub mov kws ua kevcai ntxuav zaam txim thaus tsaa puab ntawd.

³⁴Tej nqaj lossis tej mov kws seem txug taagkig sawv ntxuv tsi xob noj lawm, ca le muab hlawv povtseg; rua qhov yog tej khoom kws dlawbhuv.

³⁵“Koj ua kevcai tsaa rua Aloos hab nwg cov tub kuas txwm nkaus xyaa nub, ib yaam le kuv tau saamfwm rua koj lawm.

³⁶Txhua nub twg koj yuavtsum muab ib tug txiv nyuj lug tua theej txhoj, ua kev zaam puab lub txim. Hab qhov nuav yog koj ua kevcai ntxuav lub thaaj. Koj ca le muab roj txiv ntoo laub rua lub thaaj ua kuas lub thaaj dlawbhuv.

³⁷Ua le nuav kuas txwm nkaus xyaa nub. Lub thaaj txhaj yuav dlawbhuv, hab txhua tug tuabneeg lossis txhua yaam kws moog chwv lub thaaj, lub thaaj yuav ua rua txhua tug tuabneeg lossis tej khoom ntawd dlawbhuv.

³⁸“Yuavtsum muab ob tug mivnyuas yaaj kws muaj ib xyoo moog tua hlawv rua sau lub thaaj, ib nub dlhau ib nub tsi tu le.

³⁹Muab ob tug mivnyuas yaaj ntawd ib tug tua hlawv theej txhoj rua thaus sawv ntxuv hab muab ib tug tua hlawv rua thaus yuav tsaus ntuj.

⁴⁰Luj ob choj moov nplej zuaj xyaw ib laamfwj tseem roj txiv ntoo, hab ib laamfwj cawv txiv maab fij nrug thawj tug mivnyuas yaaj.

⁴¹Tug mivnyuas yaaj kws hlawv theej txhoj thaus yuav tsaus ntuj, muab moov nplej, roj txiv ntoo, hab cawv txiv maab coj moog fij nrug ib yaam le tug kws fij thaus sawv ntxuv. Cov nuav yog tej zaub mov kws fij rua kuv kws yog tug TSWV, hab tej paa ntawd yuav tsw qaab ntxag txaus kuv sab.

⁴²Yuavtsum ua kevcai hlawv khoom fij le nuav taabmeeg kuv rua ntawm lub Tsevntaub kws yog kuv qhov chaw sis ntsib lub qhovrooj moog ibtxhis. Kuv yuav nrug koj thaam hab ntsib kuv tsaav tuabneeg ntawm qhov chaw ntawd.

⁴³Kuv yuav ntsib cov Yixalayees ntawm qhov chaw ntawd, hab kuv tug tshwjchim kws ci ntsaa ab huv kuv qhov chaw sis ntsib yuav ua rua thaaj chaw ntawd dlawbhuv.

⁴⁴Kuv yuav ua kuas lub Tsevntaub kws yog qhov chaw sis ntsib hab lub thaaj dlawbhuv, hab kuv yuav tsaa Aloos hab nwg cov tub ua cov povthawj ua kuv teg num.

⁴⁵Kuv yuav nrug cov Yixalayees nyob, hab kuv yuav ua puab tug Vaajtswv.

⁴⁶Puab yuav paub has tas, kuv yog tug TSWV, puab tug Vaajtswv kws coj puab tawm nraag tebchaws Iziv lug, kuv txhaj nrug puab nyob. Kuv yog tug TSWV kws yog puab tug Vaajtswv ntaag.