Read Hmong Njua Tsiv Dlim 31 Bible Online

Tsiv Dlim 31 - Hmong Njua bible

Tsiv Dlim 31

¹Tug TSWV has rua Mauxes tas,

²“Kuv xaiv Hules tug xeebntxwv kws yog Ulis tug tub Npexalees kws yog xeem Yudas,

³hab kuv pub rua nwg puv npo Vaaj ntsujplig. Kuv pub rua nwg muaj kev totaub, kev txawj paub hab muaj peevxwm ua tau num txhua yaam,

⁴kuas muaj tswvyim txawj muab qauv txua tau txhua yaam, nchuav kub, nchuav nyaj hab nchuav tooj;

⁵txawj txav tej saw lug sis dlhos; txaug ntoo hab txawj ua tau txhua yaam khoom huv tuabsi.

⁶Hab kuv tseem xaiv Ahixamas tug tub Auhauli-as kws yog xeem Daas lug nrug Npexalees ua num ua ke. Kuv pub tswvyim zoo rua lwm tug, kuas puab muaj peevxwm ua tau txhua yaam kws kuv has kuas puab ua, xws le:

⁷Lub Tsevntaub kws yog kuv qhov chaw sis ntsib, lub Phijxaab kws ntim Vaajtswv tej lug cog tseg hab lub hau phijxaab, taagnrho tej cuabyeej kws siv huv lub Tsevntaub,

⁸lub rooj hab tej cuabyeej kws siv rua lub rooj, tug ncej teeb kws tseem kub hab tej cuabyeej kws siv rua lub teeb, lub thaaj hlawv moov tshuaj tsw qaab,

⁹lub thaaj kws hlawv khoom fij hab tej cuabyeej kws siv rua lub thaaj, lub phab ntxuav teg ntxuav taw hab lub taw phab,

¹⁰cov tsho ntev kws Aloos hab nwg cov tub naav thaus puab ua cov povthawj teg num,

¹¹cov roj txhawb meejthawj, hab cov moov tshuaj tsw qaab rua Chaav Dlawbhuv Kawg Nkaus. Puab yuavtsum ua txhua yaam nuav, kuas tav lawv le kws kuv tau has rua koj lawm.”

¹²Tug TSWV has rua Mauxes

¹³kuas qha rua cov Yixalayees has tas, “Mej yuavtsum muab kuv nub Xanpataus ua nub su, rua qhov nub ntawd yog lub cim rua mej hab kuv moog ibtxhis, hab qha kuas mej paub has tas kuv yog mej tug TSWV, tug kws xaiv mej lug ua kuv tsaav tuabneeg.

¹⁴Mej yuavtsum fwm nub Xanpataus, rua qhov nub ntawd yog nub tseemceeb heev rua mej. Tabsis yog leejtwg tsi fwm nub ntawd, nwg moog ua num nub ntawd, ca le muab tug ntawd tua povtseg.

¹⁵Mej muaj rau nub ua mej tej num, tabsis nub xyaa yog nub su kws dlawbhuv rua tug TSWV; yog leejtwg tseem moog ua num nub Xanpataus, ca le muab tug ntawd tua povtseg.

¹⁶Cov Yixalayees yuavtsum muab nub Xanpataus saib kuas muaj nqes moog ibtxhis, ncu ntsoov nub ntawd yog lub cim rua cov lug cog tseg.

¹⁷Nub Xanpataus yog lub cim rua kuv hab cov Yixalayees moog ibtxhis le, rau nub ntawd kuv tsim lub ntuj hab lub nplajteb, tabsis nub xyaa kuv su, hab tsi tsim ib yaam dlaabtsi ntxiv lawm.”

¹⁸Thaus Vaajtswv has txhua yaam rua Mauxes sau Roob Xinais lawm, Vaajtswv txhaj muab ob dlaim txag zeb kws Vaajtswv muab nwg tug ntivteg sau nwg cov lug saamfwm cob rua Mauxes.