Read Hmong Njua Tsiv Dlim 32 Bible Online

Tsiv Dlim 32 - Hmong Njua bible

Tsiv Dlim 32

¹Thaus cov tuabneeg pum has tas Mauxes pheej tsi nqeg sau roob lug, puab txawm sis sau tuaj cuag Aloos hab has rua nwg tas, “Peb tsi paub sov muaj xwm dlaabtsi rua Mauxes tug kws coj peb nraag tebchaws Iziv lug lawm; yog le ntawd, koj ca le nchuav ib tug vaajtswv lug ua tug coj peb.”

²Aloos teb puab has tas, “Ca le moog hle mej tej quaspuj mivnyuas tej qhws ntsej kub nqaa tuaj rua kuv.”

³Yog le ntawd, puab txhaj hle taagnrho puab tej qhws ntsej kub nqaa tuaj rua Aloos.

⁴Aloos muab cov qhws ntsej kub ntawd moog hlawv huv lub yeejvub kuas yaaj, hab muab nchuav ua ib tug mlom nyuj. Puab has tas, “Ib tsoom Yixalayees, tug nuav yog tug vaajtswv kws coj peb nraag tebchaws Iziv lug!”

⁵Tom qaab ntawd, Aloos ua ib lub thaaj rua ntawm tug mlom nyuj ntawd hauv ntej hab tshaajtawm rua suavdlawg has tas, “Pigkig peb yuav ua ib pluag noj haus ua tug TSWV tsaug.”

⁶Taagkig thaus kaaj ntug txoog puab txhaj coj tsaj tuaj tua hlawv fij theej txhoj hab muab dlua ib cov tua fij ua kev sis raug zoo. Cov pejxeem txhaj nyob quastsawg noj tsau haus qaug, sawv dlha seev cev hab sis ntxag.

⁷Tug TSWV has rua Mauxes has tas, “Koj ca le maaj nrooj nqeg rov qaab moog taamsim nuav, rua qhov cov pejxeem kws koj coj nraag tebchaws Iziv lug, puab ua txhum hab tso kuv tseg lawm.

⁸Puab tso txujkev kws kuv kuas puab taug tseg lawm; puab muab kub nchuav ua ib tug mlom txiv nyuj, puab pe tug mlom nyuj ntawd, muab khoom fij rua tug mlom nyuj hab puab has tas, ib tsoom Yixalayees, tug nuav yog tug vaajtswv kws coj peb nraag tebchaws Iziv lug ntaag!

⁹Tug TSWV has rua Mauxes has tas, kuv paub cov tuabneeg nuav zoo lawm, puab yeej tawv ncauj heev.

¹⁰Nwgnuav, tsi xob cheem kuv. Kuv chim rua puab heev, kuv yuav ua kuas puab raug kev puamtsuaj. Ces kuv yuav tsaa koj hab koj cov xeebntxwv ua tsaav tuabneeg tseemceeb.”

¹¹Tabsis Mauxes thov tug TSWV kws yog nwg tug Vaajtswv has tas, “Tug TSWV, koj tub tau siv koj tug zug hab lub fwjchim coj puab tawm nraag tebchaws Iziv lug, vim le caag koj yuav chim rua koj tsaav tuabneeg ua luaj?

¹²Cov Iziv yuav has tas, koj coj koj tsaav tuabneeg tawm huv tebchaws Iziv lug, yog koj coj puab lug tua povtseg hab ua kuas puab puamtsuaj taag rua tom roob mojsaab qhua xwb! Thov koj ua sab ntev hab txu koj txujkev chim, tsi xob tso kev puamtsuaj lug rua koj tsaav tuabneeg.

¹³Thov koj ncu ntsoov Anplahaas, Ixaj hab Yakhauj kws yog koj cov tubkhai. Ncu ntsoov tej lug kws koj tau cog tseg lawm has tas, koj yuav pub rua puab muaj xeebntxwv coob ib yaam le cov nubqub sau ntuj hab koj yuav muab lub tebchaws kws koj coglug tseg rua puab cov xeebntxwv, hab ua puab tug moog ibtxhis le.”

¹⁴Yog le ntawd, tug TSWV txhaj hloov sab hab tsi tso kev puamtsuaj lug rua nwg tsaav tuabneeg le kws nwg tau has lawm.

¹⁵Mauxes txawm nqeg sau roob lug, nwg nqaa ob dlaim txag zeb kws sau cov lug saamfwm rua ob saab nrug nwg lug.

¹⁶Vaajtswv yog tug txua ob dlaim txag zeb hab sau tej lug saamfwm, hab nwg txaug npe ntawv rua sau ob dlaim txag zeb ntawd.

¹⁷Thaus Yausuas nov cov tuabneeg qw ua tsuj ua tsaug, nwg has rua Mauxes has tas, “Kuv nov suab sis ntaus sis tua qw ua tsuj ua tsaug nraag lub yeej tuaj.”

¹⁸Mauxes teb has tas, “Tsi yog lub suab qw zoo le thaus ntaus yeej rog lossis lub suab quaj thaus swb rog; lub suab ntawd yog suab hu nkauj.”

¹⁹Thaus Mauxes lug ze lub yeej, nwg pum tug mlom nyuj hab pum cov tuabneeg dlha seev cev lomzem xauv npo, nwg chim heev. Nwg txhaj muab ob dlaim txag zeb ntawm nwg teg ntsawm tawg ntsoog ntxawg rua ntawm taw roob.

²⁰Nwg coj tug mlom nyuj kws puab nchuav ntawd moog hlawv, muab zum ua moov mog nyoos, hab muab tov dlej rua cov Yixalayees haus.

²¹Mauxes nug Aloos has tas, “Cov tuabneeg nuav ua le caag rua koj, koj txhaj coj puab ua kev txhum luj npaum le nuav?”

²²Aloos teb has tas, “Koj tsi xob chim rua kuv, koj yeej paub cov tuabneeg nuav, puab lub sab yeej nyam ua txujkev phem.

²³Puab tuaj thov kuv has tas, ‘Peb tsi paub sov muaj xwm dlaabtsi rua Mauxes tug kws coj peb tawm nraag tebchaws Iziv lug lawm; yog le ntawd, koj ca le nchuav ib tug mlom lug coj peb.’

²⁴Kuv txhaj has kuas puab nqaa puab tej saw kub hab tej qhws ntsej kub kws puab muaj tuaj rua kuv. Kuv txhaj coj moog hlawv rua huv qhovcub, ces txawm ua tau tug mlom nyuj nuav.”

²⁵Mauxes pum has tas, Aloos tsi tswj cov tuabneeg hab tso puab ua tej kev txaajmuag taabmeeg rua tej yeebncuab saib tsi taug puab.

²⁶Yog le ntawd, Mauxes txhaj le moog sawv ntawm roojvaag qw has tas, “Leejtwg tuaj tug TSWV tog ca le lug cuag kuv!” Taagnrho xeem Levis txawm sau nthwv lug vij Mauxes,

²⁷Mauxes has rua puab tas, “Tug TSWV kws yog tsaav tuabneeg Yixalayees tug Vaajtswv saamfwm kuas mej nyag nqaa nyag raab ntaaj hab pib ntawm lub roojvaag nuav moog kuas thoob plawg lub yeej nuav muab mej tej kwvtij, tej phoojywg, hab mej tej tuabneeg zej zog tua povtseg kuas taag.”

²⁸Cov Levis noog Mauxes lug, nub ntawd puab txhaj muab cov txivneej tua tuag kwvyees le peb txheeb leej.

²⁹Mauxes has rua cov Levis has tas, “Nub nua mej rov tsaa mej ua povthawj ua tug TSWV teg num, rua qhov mej muab mej tej tub hab tej kwvtij tua povtseg, yog le ntawd, nub nua tug TSWV txhaj foom koob moov rua mej.”

³⁰Nub tom qaab Mauxes has rua cov pejxeem has tas, “Mej ua kev txhum luj heev. Tabsis nwgnuav kuv yuav rov moog cuag tug TSWV sau roob dlua; tej zag kuv yuav moog thov tau tug TSWV zaam txim rua mej.”

³¹Mauxes rov moog cuag tug TSWV hab thov has tas, “Cov tuabneeg nuav ua kev txhum luj kawg le. Puab muab kub nchuav ua ib tug vaajtswv hab puab pe tug vaajtswv ntawd.

³²Thov koj zaam puab tej kev txhum; tabsis yog koj zaam tsi tau, thov koj rhu kuv lub npe tawm huv phoo ntawv kws koj tub sau koj tsaav tuabneeg tej npe lawm.”

³³Tug TSWV teb has tas, “Cov twg ua txhum rua kuv, cov ntawd txhaj yog cov kws yuav raug rhu npe tawm huv kuv phoo ntawv moog xwb.

³⁴Taamsim nuav koj ca le rov qaab moog, coj cov pejxeem moog nyob qhov chaw kws kuv tub qha rua koj lawm. Ncu ntsoov, kuv tug timtswv yuav moog ua mej ntej coj mej kev, tabsis thaus txug lub sijhawm kuv txav txim, kuv yuav txav txim rua puab tej kev txhum.”

³⁵Tug TSWV tso kaab mob kis lug rua cov pejxeem, rua qhov puab yuam Aloos muab kub nchuav ua ib tug mlom nyuj rua puab pe.