Read Hmong Njua Tsiv Dlim 33 Bible Online

Tsiv Dlim 33 - Hmong Njua bible

Tsiv Dlim 33

¹Tug TSWV has rua Mauxes has tas, “Koj hab cov tuabneeg kws koj coj nraag tebchaws Iziv lug, ca le tawm ntawm qhov chaw nuav, hab moog nyob lub tebchaws kws kuv coglug tseg rua Anplahaas, Ixaj hab Yakhauj has tas, kuv yuav muab rua puab cov xeebntxwv nyob.

²Kuv yuav tso ib tug timtswv lug coj mej kev, kuv yuav ntab cov tuabneeg Kana-aas, cov Amaules, cov Hitis, cov Pelixes, cov Hivis hab cov Yenpus kuas tsiv tawm moog.

³Mej yuav moog nyob huv lub tebchaws kws aav rog hab zoo qoob. Tabsis kuv yuav tsi nrug mej moog, rua qhov mej yog cov tuabneeg tawv ncauj heev, nyob tsaam kuv ua rua mej puamtsuaj taag tom ib tog kev.”

⁴Thaus cov pejxeem nov zaaj xuv tsi zoo nuav, puab txawm pib quaj hab tsi coj saw nyaj saw kub le lawm.

⁵Vim tug TSWV tau saamfwm rua Mauxes kuas has rua puab tas, “Mej yog cov tuabneeg tawv ncauj. Yog kuv nrug mej moog, nyob tsaam kuv ua rua mej puamtsuaj taag. Nwgnuav ca le hle mej tej nyaj tej kub ca, kuv txhaj paub has tas yuav ua le caag rua mej.”

⁶Yog le ntawd, tom qaab kws puab tawm ntawm Roob Xinais moog lawm, cov Yixalayees txhaj tsi coj nyaj tsi coj kub lawm.

⁷Txhua qhov kws cov Yixalayees tsuam chaw su, Mauxes coj lub Tsevntaub moog tsaa rua tom ntug yeej. Lub tsev ntawd hu ua tug TSWV lub Tsevntaub sis ntsib, hab yog leejtwg xaav moog cuag tug TSWV nwg yuavtsum moog rua huv lub tsevntaub.

⁸Yog thaus twg Mauxes tawm moog rua tom lub tsev ntawd, cov pejxeem tawm tuaj sawv ntawm puab tej qhovrooj tsevntaub hab saib Mauxes moog kuas nkaag plawg rua huv lub tsev ntawd.

⁹Thaus Mauxes moog rua huv lub tsevntaub lawm, tauv fuab txawm txaav lug npug nkaus lub qhovrooj Tsevntaub, hab tug TSWV nrug Mauxes thaam huv tauv fuab tuaj.

¹⁰Thaus cov pejxeem pum tauv fuab txaav lug rua ntawm lub qhovrooj Tsevntaub, puab suavdlawg tawm huv puab tej tsev tuaj sawv ntawm nyag lub qhovrooj pehawm tug TSWV.

¹¹Tug TSWV nrug Mauxes thaam tim ntsej tim muag ib yaam le ob tug phoojywg sis thaam. Ces thaus sis thaam taag, Mauxes maam rov qaab lug tsev. Tabsis Noos tug tub Yausuas kws yog tug tub hluas paab Mauxes, nwg yeej nyob rawv huv lub Tsevntaub ntawd le.

¹²Mauxes has rua tug TSWV has tas, “Koj yeej kuas kuv coj cov tuabneeg nuav moog nyob huv lub tebchaws ntawd, tabsis koj tub tsi qha rua kuv paub tug kws koj yuav tso nrug kuv moog. Koj has tas koj paub kuv zoo hab txaus sab rua kuv.

¹³Yog koj txaus sab rua kuv, thov qha tej kev kws koj npaaj sab yuav ua ntawd rua kuv paub, kuv txhaj yuav ua tau tej kws hum koj sab. Ncu ntsoov has tas koj tub xaiv tsaav tuabneeg nuav ua koj tug lawm.”

¹⁴Tug TSWV teb has tas, “Kuv yuav nrug koj moog hab pub kuas koj muaj yeej.”

¹⁵Mauxes teb tug TSWV has tas, “Yog koj tsi nrug peb moog, thov tsi xob tso peb tawm qhov chaw nuav moog.

¹⁶Yog koj tsi nrug peb moog, leejtwg yuav paub has tas, koj txaus sab rua kuv hab rua koj tsaav tuabneeg? Koj nrug peb moog txhaj yuav cais tau peb tawm ntawm luas lwm tsaav tuabneeg kws nyob huv lub nplajteb nuav.”

¹⁷Tug TSWV has rua Mauxes has tas, “Kuv yuav ua lawv le koj thov, rua qhov kuv paub koj zoo hab kuv yeej txaus sab rua koj.”

¹⁸Ces Mauxes txawm thov has tas, “Thov koj qha koj tug tshwjchim kws ci ntsaa ab rua kuv pum.”

¹⁹Tug TSWV teb has tas, “Kuv yuav tso kuv tej kev zoo moog ua koj ntej, hab kuv yuav qha kuv lub npe kws yog tug TSWV taabmeeg koj; kuv yuav hlub tug kws kuv hlub hab taabncuab tug kws kuv taabncuab.

²⁰Kuv tsi pub koj pum kuv lub ntsejmuag, rua qhov yeej tsi muaj ib tug tuabneeg twg kws pum kuv es tseem muaj sa nyob,

²¹tabsis muaj ib qhov chaw nyob ntawm kuv ib saab nuav, koj ca le nce moog sawv sau lub pobzeb ntawd.

²²Thaus kuv tug tshwjchim kws ci ntsaa ab hlaa lug, kuv yuav muab koj tso rua huv kis pobzeb, hab muab kuv txhais teg thaiv koj moog txug thaus kws kuv hlaa dlhau koj moog lawm.

²³Ces kuv yuav tshem kuv txhais teg tawm, hab koj yuav pum kuv lub nrausqaum tabsis tsi pum kuv lub ntsejmuag.”