Read Hmong Njua Tsiv Dlim 34 Bible Online

Tsiv Dlim 34 - Hmong Njua bible

Tsiv Dlim 34

¹Tug TSWV has rua Mauxes has tas, “Koj txav dlua ob dlaim txag zeb kuas zoo ib yaam le thawj ob dlaim, hab kuv yuav sau tej lug kws nyob huv thawj ob dlaim kws koj muab tsoo tawg lawm rua huv ob dlaim tshab ntawd.

²Koj yuavtsum ua kuas tav rua pigkig, hab pigkig sawv ntxuv koj ca le tuaj rua sau Roob Xinais nuav, tuaj cuag kuv rua sau ncov roob.

³Tsi xob pub leejtwg nrug koj tuaj; tsi pub kuas leejtwg tuaj rua kuv pum sau roob nuav le; hab tsi xob pub yaaj, tshis hab nyuj tuaj noj zaub ze ntawm lub taw roob nuav.”

⁴Yog le ntawd, Mauxes txhaj txav ob dlaim txag zeb zoo le thawj ob dlaim, hab taagkig sawv ntxuv nwg txhaj nqaa ob dlaim txag zeb ntawd nce moog rua sau Roob Xinais lawv le tug TSWV has rua nwg lawm.

⁵Tug TSWV lug nyob huv tauv fuab, nrug Mauxes sawv ua ke, hab qha nwg lub npe dlawbhuv kws yog hu ua tug TSWV rua Mauxes.

⁶Tug TSWV hlaa Mauxes xubndlag moog hab hu has tas, “Kuv yog tug TSWV, Vaajtswv tug kws muaj lub sab puv nkaus kev hlub hab taabncuab, yog tug kws tsi chim sai hab yog tug kws muaj kev hlub hab ncaaj nceeg.

⁷Kuv txujkev hlub yuav nyob nrug ntau txheeb tam tuabneeg, hab zaam txim rua tej tuabneeg ua phem hab muaj txim; tabsis kuv yuav rau txim rua puab tej xeebntxwv moog txug peb hab plaub tam tuabneeg, rua qhov puab nam puab txiv tau ua txhum lug lawm.”

⁸Mauxes txhus caug ndlua hab nyo ntshis rua huv aav pehawm.

⁹Mauxes has tas, “Tug TSWV, yog koj txaus sab rua kuv tag, kuv thov koj nrug peb moog. Cov tuabneeg nuav yeej tawv ncauj heev, tabsis thov koj zaam tej kev phem kws peb ua hab lub txim kws peb muaj, hab thov koj leeg yuav peb ua koj tsaav tuabneeg.”

¹⁰Tug TSWV has rua Mauxes has tas, “Kuv coglug rua cov Yixalayees. Kuv yuav ua txujci tseemceeb rua suavdlawg pum, yog tej txujci kws kuv yeej tsi tau ua rua ib tsaav tuabneeg twg pum nyob huv nplajteb nuav le. Txhua tug yuav pum kuv kws yog tug TSWV ua tau txujci tseemceeb, rua qhov kuv yuav ua tej kws txaus ntshai rua mej pum.

¹¹Mej yuavtsum ua lawv le txuj kevcai kws kuv muab rua mej nub nua lawm. Kuv txhaj yuav ntab cov Amaules, cov Kana-aas, cov Hitis, cov Pelixes, cov Hivis hab cov Yenpus kuas tsiv tawm ua ntej mej moog txug.

¹²Mej tsi xob coglug nrug cov tuabneeg kws ibtxwm nyob huv lub tebchaws kws mej yuav moog nyob ntawd, rua qhov tej ntawd yuav ua rooj hlua caws tog mej kev.

¹³Mej ca le muab puab tej thaaj rhuav povtseg, muab puab tej ncej zeb tsoo kuas tawg taag, hab muab puab tej ncej mlom quaspuj Aselas ntuv povtseg huv tuabsi.

¹⁴“Mej tsi xob pe ib tug vaajtswv twg, rua qhov kuv kws yog tug TSWV khib mej heev.

¹⁵Tsi xob cog kev phoojywg nrug cov tuabneeg huv lub tebchaws ntawd, rua qhov thaus puab moog pe puab tej vaajtswv hab tua tsaj fij rua tej mlom ntawd, puab yuav caw mej moog koom nrug puab, hab puab yuav ntxag kuas mej nrug puab noj tej nqaj kws muab fij rua puab tej vaajtswv.

¹⁶Thaus mej moog yuav puab cov ntxhais lug rua mej cov tub ua quaspuj, cov ntxhais ntawd puavleej ua namndlav rua puab tej vaajtswv, ces puab yuav coj mej cov tub moog ua ib yaam le puab ua ntawd hab.

¹⁷“Mej tsi xob nchuav mlom tooj rua mej pe.

¹⁸“Ncu ntsoov ua kevcai noj ncuav tsi xyaw keeb. Ib yaam le kuv tau saamfwm rua mej, lub hli Anpis mej ca le noj cov ncuav tsi xyaw keeb xyaa nub, rua qhov lub hli ntawd yog lub kws mej tawm nraag tebchaws Iziv lug.

¹⁹“Mej tej tub hlub hab tej tsaj thawj tug mivnyuas kws yog tug txiv puavleej yog kuv tug huv tuabsi,

²⁰tabsis muab tug mivnyuas yaaj moog fij txhwv tug mivnyuas neeg luav. Yog mej tsi txhwv tug mivnyuas neeg luav rov qaab, mej ca le muab tug mivnyuas neeg luav ntawd luv cejdlaab kuas tuag. Hab txhwv mej cov tub hlub huv tuabsi rov qaab. “Tsi xob pub ib tug twg tuaj cuag kuv teg dlawb teg nplag le.

²¹“Mej muaj rau nub ua num, nub xyaa mej yuavtsum su, txawm yog mej yuav maaj cog qoobloo lossis sau qoobloo npaum twg los xij, mej tsi xob moog ua num.

²²“Ncu ntsoov ua kevcai rua thaus mej pib hlais mej tej nplej caug, hab ua kevcai nyob Tsev Pheebsuab rua thaus lub caij nplooj ntoos zeeg kws mej sau mej tej txiv maab.

²³“Mej txhua tug txivneej yuavtsum tuaj pehawm kuv kws yog tug TSWV kws yog cov Yixalayees tug Vaajtswv ib xyoos twg peb zag.

²⁴Tom qaab kws kuv ntab lwm tsaav tuabneeg tsiv tawm ua ntej mej moog nyob, hab nthuav mej nrim dlej nrim aav dlaav lawm, tsi muaj leejtwg yuav tuaj txeeb mej lub tebchaws thaus kws mej ua peb zag kevcai ntawd le.

²⁵“Mej tsi xob muab ncuav xyaw keeb nqaa tuaj fij thaus mej tua tsaj fij rua kuv. Mej tsi xob tseg tej nqaj kws mej tua ua Kevcai Hlaa Dlhau moog txug taagkig kaaj ntug.

²⁶“Txhua xyoo mej yuavtsum muab mej tej qoobloo kws mej xub sau tau lug, nqaa tuaj tso rua huv tug TSWV lub tsev. “Mej tsi xob muab tej mivnyuas yaaj lossis mivnyuas tshis tej nqaj hau xyaw leej nam cov kua mig.”

²⁷Tug TSWV has rua Mauxes has tas, “Ca le sau tej lug nuav tseg, rua qhov tej lug kws kuv cog tseg rua koj hab cov Yixalayees puavleej has lawv le tej lug nuav.”

²⁸Mauxes nrug tug TSWV nyob sau roob tau plaub caug nub plaub caug mo, nwg tsi noj mov hab tsi haus dlej le. Hab Vaajtswv sau tej lug cog tseg kws yog Kaum Nqai Kevcai rua sau ob dlaim txag zeb.

²⁹Thaus Mauxes nqeg sau Roob Xinais lug, nwg nqaa ob dlaim txag zeb kws sau Kaum Nqai Kevcai ntawm nwg ob txhais teg, nwg lub ntsejmuag ci ntsaa ab, rua qhov nwg nrug tug TSWV thaam; tabsis nwg tsi paub has tas nwg lub ntsejmuag ci le ntawd.

³⁰Thaus Aloos hab cov Yixalayees pum Mauxes lub ntsejmuag ci ntsaa ab, puab ntshai heev hab tsi kaam txaav moog ze nwg le.

³¹Tabsis Mauxes hu kuas puab tuaj cuag nwg, ces Aloos hab cov Yixalayees tej thawjcoj txhaj moog cuag nwg, hab nwg nrug puab thaam.

³²Tom qaab ntawd, cov pejxeem Yixalayees sis sau lug sawv ncig Mauxes, hab Mauxes qha taagnrho tej kevcai kws tug TSWV muab rua nwg sau lub Roob Xinais rua puab noog.

³³Thaus Mauxes qha rua puab taag lawm, nwg txhaj muab ib dlaim ntaub npug nwg lub ntsejmuag.

³⁴Txhua zag kws Mauxes moog nrug tug TSWV thaam huv lub Tsevntaub, nwg muab dlaim ntaub kws npug nwg lub ntsejmuag yaws. Thaus nwg tawm lug, nwg pav tej kws tug TSWV saamfwm rua nwg rua cov Yixalayees noog

³⁵hab puab pum Mauxes lub ntsejmuag ci ntsaa ab. Mauxes rov muab ntaub npug nwg lub ntsejmuag moog txug thaus nwg rov moog cuag tug TSWV.