Read Hmong Njua Tsiv Dlim 38 Bible Online

Tsiv Dlim 38 - Hmong Njua bible

Tsiv Dlim 38

¹Npexalees muab ntoo kubtwg txua ua lub thaaj, qhov ntev tsib tshim, qhov dlaav tsib tshim hab sab peb tshim.

²Nwg ua plaub tug kub rua sau plaub ceg kaum thaaj, plaub tug kub ntawd txua koom hlo nrug lub thaaj, hab muab tooj vuam huv tuabsi.

³Nwg tseem ua tej twj siv rua lub thaaj: laujkaub, dluav, taig, nqailauj hab yag rau ncaig tawg. Tej cuabyeej nuav puavleej yog muab tooj ua xwb.

⁴Nwg muab tooj hab ib dlaim ntxaij pua rua huv lub thaaj txug ndlua ib nraab.

⁵Nwg Muab tooj ntaus ua plaub lub khawb ntsa rua ntawm plaub ceg kaum thaaj ua teg nqaa.

⁶Nwg muab ntoo kubtwg txua ua ob tug laag kws kwv lub thaaj, hab muab tooj vuam rua,

⁷hab muab ob tug laag ntawd ntxig rua ntawm plaub lub khawb kws ntsa rua ntawm lub thaaj ob saab. Muab txag ntoo ua lub thaaj hab tseg huv plawv khoob.

⁸Npexalees ua lub phab ntxuav teg hab lub taw phab yog muab cov quaspuj kws ua num ntawm tug TSWV lub Tsevntaub sis ntsib lub qhovrooj tej tsom av tooj lug nchuav ua.

⁹Npexalees xov vaaj ncig tug TSWV lub Tsevntaub. Nwg muab dlaim ntaub maag kws ntev ib puas tshim xov saab nraag,

¹⁰muab neeg nkaum tug kaav tooj ua ncej, muab neeg nkaum dlaim tooj tag taw, tabsis cov khawb hab cov hlua yog muab nyaj ua.

¹¹Xov zoo ib yaam le ntawd rua saab ntsaa vaaj peg hab.

¹²Muab dlaim ntaub kws ntev tsib caug tshim xov saab nubpoob, txhus kaum tug ncej hab kaum dlaim tag taw, cov khawb hab cov hlua yog muab nyaj ua.

¹³Saab nubtuaj, yog lub roojvaag kws nkaag noog rua huv, saab ntawd xov tsib caug tshim dlaav ib yaam nkaus.

¹⁴Ib saab roojvaag twg ntev kaum tsib tshim, txhus peb tug ncej hab peb dlaim tag taw.

¹⁵Saab roojvaag tom los ntev kaum tsib tshim, txhus peb tug ncej hab peb dlaim tag taw,

¹⁶taagnrho cov ntaub kws xov ncig lub Tsevntaub yog muab tej ntaub maag zoo zoo xov xwb.

¹⁷Cov tag taw ncej yog muab tooj ua, cov khawb, cov hlua paav hab cov hau khwb ncej yog muab nyaj ua. Taagnrho cov ncej laajkaab kws xov ncig lub tsev, yog muab xuv nyaj paav xwb.

¹⁸Muab cov ntaub maag zoo kws txaij xav, tsaamxem hab lab, xaws ua paaj ntaub txaij nraug zeeg thaiv lub roojvaag. Dlaim ntaub ntawd ntev neeg nkaum tshim hab sab tsib tshim, ib yaam le cov ntaub kws xov lub vaaj.

¹⁹Plaub tug ncej hab plaub tug tag taw, cov khawb kws khawm tej ncej, cov hau khwb ncej hab cov hlua paav puavleej yog muab nyaj ua.

²⁰taagnrho cov ntsa kws ntsa lub Tsevntaub hab cov ncej laajkaab kws xov ncig lub Tsevntaub puavleej yog muab tooj ua.

²¹Ntawm nuav moog yog teev tej khoom siv huv lub Tsevntaub. Mauxes kuas cov Levis ua txhua yaam num, hab puab nyob qaab tswjfwm ntawm Aloos tug tub Ithamas kws yog tug povthawj.

²²Ulis tug tub Npexalees kws yog Hules tug xeebntxwv hab yog xeem Yudas, ua txhua yaam kws tug TSWV tau saamfwm kuas ua ntawd tav taag huv tuabsi lawm.

²³Tug kws paab Npexalees yog Auhauli-as kws yog Ahixamas tug tub hab nwg yog xeem Daas, Auhauli-as yog tug kws txawj txaug ntoo, muab qauv hab ntus tej ntaub maag txaij xav, tsaamxem hab lab.

²⁴Taagnrho tej kub kws coj tuaj fij rua tug TSWV ua lub Tsevntaub ntawd nyaav ob txheeb cuaj caum tsib choj, yog luj lawv le numtswv kom tseg.

²⁵Cov nyaj kws tau lug ntawm cov pejxeem kws tuaj sau npe nyaav xyaa txheeb tsib puas tsib caug choj, yog luj lawv le numtswv kom tseg.

²⁶Taagnrho txhua tug tuabneeg kws tuaj sau npe ntawd puavleej tau them nqe sis npaug zog, hab txhua tug them tug nqe kuas lawv le numtswv kevcai. Cov txivneej kws noobnyoog muaj neeg nkaum xyoo rov sau, tuaj sau npe yog muaj rau pua peb txheeb tsib puas tsib caug leej.

²⁷Cov nyaj ntawd, puab muab xyaa txheeb tsib puas choj lug ua ib puas dlaim tag taw lub Tsevntaub hab ua taw rua cov ntaub xov, ib tug taw twg nyaav xyaa caum tsib choj.

²⁸Muab tsib caug choj nyaj rua Npexalees ua hlua, ua khawb khawm cov ncej, hab ua hau khwb cov ncej.

²⁹Cov tooj kws coj tuaj fij rua tug TSWV nyaav tsib txheeb peb puas kaum choj.

³⁰Npexalees muab cov tooj nuav ua cov tag taw qhovrooj rua tug TSWV lub Tsevntaub sis ntsib, ua lub thaaj, ua dlaim ntxaij hab ua taagnrho tej khoom kws siv rua lub thaaj,

³¹cov tag ncej laajkaab kws xov ncig lub Tsevntaub hab cov tag taw ncej roojvaag, hab tej ntsaa laajkaab puavleej yog muab cov tooj ntawd ua.