Read Hmong Njua Tsiv Dlim 39 Bible Online

Tsiv Dlim 39 - Hmong Njua bible

Tsiv Dlim 39

¹Puab muab tej ntaub txaij xav, tsaamxem hab lab lug xaws ua tsoog tsho rua cov povthawj naav thaus puab moog ua Vaajtswv teg num huv Chaav Dlawbhuv. Hab puab tseem xaws ib cev tsoog tsho povthawj rua Aloos, lawv le tug TSWV tau saamfwm rua Mauxes lawm.

²Puab muab tej tseem ntaub maag kws txaij xav, tsaamxem hab lab, hab xuv kub xaw rua lub tsho efaus.

³Puab muab kub ntaus ua tej pluaj nyag nyag hab muab txav ua xuv coj lug ntus nrug cov tseem xuv maaj xav, xuv tsaamxem hab xuv lab.

⁴Puab xaws ob txuj hlaab khuam rua sau xubpwg lu rua lub tsho efaus, hab muab ib txug khuam ib saab xubpwg, ua le ntawd txhaj muaj chaw khawm.

⁵Muab cov xuv hab cov ntaub kws xaws lub tsho efaus lug ntus ua txuj hlaab sa kws muab xaws lu rua ntawm lub tsho efaus lawv le tug TSWV tau saamfwm rua Mauxes lawm.

⁶Puab muab ob lub qai zeb kws txaug Yakhauj kaum ob leeg tub cov npe rua; cog rua huv cov phaj kub.

⁷Puab muab ob lub qai zeb ntawd ntsaws rua huv lub tsho efaus ob dlaim tag xubpwg, yog ob lub qai zeb ua kev ncu txug kaum ob xeem Yixalayees, lawv le tug TSWV tau saamfwm rua Mauxes lawm.

⁸Puab muab tuab yaam xuv kws xaws ua lub tsho efaus, lug xaws ua dlaim ntaub npug hauvsab, hab xaws paaj ntaub rua kuas zoo ib yaam nkaus.

⁹Dlaim ntaub ntawd ua plaub faab hab muab tais ua ob tsem, ntev ib dlus hab dlaav ib dlus.

¹⁰Puab cog plaub leej qai zeb rua dlaim ntaub npug hauvsab: leej ib, cog ib lub lab dlaaj lig, ib lub dlaaj ntshab si hab ib lub lab tshab tshab;

¹¹leej ob, cog ib lub ntsuab ci hob, ib lub xav hab ib lub dlawb ci hob;

¹²leej peb, cog ib lub lab ntshab si, ib lub txho tawg hab ib lub lab ua tsaamxem ntshaa;

¹³leej plaub, cog ib lub txho xav, ib lub dlawb txho hab ib lub dlawb ntshab si. Taagnrho cov qai zeb nuav puavleej muab cog rua huv cov phaj kub.

¹⁴Kaum ob lub qai zeb ntawd puavleej txaug Yakhauj kaum ob leeg tub cov npe rua, sawv cev kaum ob xeem Yixalayees.

¹⁵Puab muab cov tseem kub lug ntaus ua ib txuj saw ntswj zoo le txuj hlua tis rua dlaim ntaub npug hauvsab.

¹⁶Puab muab kub ntaus ua ob dlaim phaj hab ob lub khawb kub, muab ob lub khawb kub tis rua ntawm dlaim ntaub npug hauvsab ob ceg kaum sau.

¹⁷Puab muab ob txuj saw kub tis rua ntawm ob lub khawb kub,

¹⁸hab muab ob tog tw tis rua ob dlaim phaj, ua le nuav kuas ob txuj saw lu lub tsho efaus ob dlaim tag xubpwg kws dlauv rua ntawm xubndlag.

¹⁹Puab ua ob lub khawb kub tis rua dlaim ntaub npug hauvsab ob lub ntsej huv qaab ntawm tug ntug saab huv kws puab lub tsho efaus.

²⁰Puab ua dlua ob lub khawb kub tis rua lub tsho efaus ob dlaim tag xubpwg saab huv qaab ntawm xubndlag, ze rua ntawm kaab lejleeg nyob rua sau txuj hlaab kws sa lub tsho efaus.

²¹Puab muab ntaub xav khi dlaim ntaub npug hauvsab ob lub khawb rua ntawm lub tsho efaus ob lub khawb kws txuas rua ntawm txuj hlaab, kuas dlaim ntaub npug hauvsab txhaj tsi txaav ntawm lub tsho efaus, lawv le tug TSWV tau saamfwm rua Mauxes lawm.

²²Lub tsho ntev kws naav tshooj sau lub tsho efaus, yog muab ntaub xav xaws.

²³Lub cejdlaab tshos, xaws looj sau taubhau tuaj, muab cov ntaub kws ntus sis qhab lug xaws ua lub cejdlaab tshos kuas tsi ndluag.

²⁴Puab muab ntaub txaij xav, tsaamxem hab lab xaws ua ib cov txiv ntsab pobkws dlai rua ntawm lub tw tsho ntev.

²⁵Hab puab muab cov tseem kub lug ntaus ua ib cov tswb dlai rua ntawm lub tw tsho nruab nraab ntawm cov txiv ntsab pobkws,

²⁶muab cov tswb hab cov txiv ntsab pobkws dlai thoob plawg lub tw tsho, dlai ib lub txiv ntsab pobkws quas ib lub tswb, lawv le tug TSWV tau saamfwm rua Mauxes lawm.

²⁷Puab muab tej ntaub maag kws ntus tau zoo heev, xaws ib cov tsho luj rua Aloos hab nwg cov tub naav,

²⁸hab muab ntaub maag xaws phuam, mom, rig tuab lu,

²⁹hab muab cov ntaub maag kws txaij xav, tsaamxem hab lab xaws ua hlaab sa, hab xaws paaj ntaub rua kuas txaij nraug zeeg lawv le tug TSWV tau saamfwm rua Mauxes lawm.

³⁰Puab muab cov tseem kub ntaus ua ib dlaim phaj, hab txaug npe ntawv rua sau dlaim phaj ntawd has tas, “Dlawbhuv rua tug TSWV.”

³¹Puab muab ib txuj hlua ntaub xav khi dlaim phaj kub rua txuj phuam kws ntoo sau taubhau hab muab tig rua ntawm hauvplaj.

³²Txhua yaam num kws ua tug TSWV lub Tsevntaub sis ntsib tub tav taag lawm. Cov Yixalayees ua txhua yaam lawv le tug TSWV tau saamfwm rua Mauxes lawm.

³³Puab coj lub Tsevntaub, cov khawb, cov taab, cov laag, cov ncej hab tej tag taw ncej lug rua Mauxes;

³⁴cov tawv yaaj kws zaas lab hab cov tawv nyuj yog cov vuv; cov ntaub thaiv;

³⁵lub Phijxaab kws ntim ob dlaim txag zeb, ob tug laag, lub hau phijxaab;

³⁶lub rooj hab taagnrho tej khoom siv ntawm lub rooj, hab cov ncuav kws fij rua Vaajtswv;

³⁷tug ncej txawb teeb kws yog cov tseem kub, cov teeb, taagnrho tej khoom siv ntawm lub teeb hab cov roj saam teeb;

³⁸lub thaaj kub, cov roj txhawb meejthawj; cov moov tshuaj tsw qaab; dlaim ntaub thaiv lub qhovrooj moog rua huv lub Tsevntaub;

³⁹lub thaaj tooj nrug dlaim npug lub thaaj; cov ncej thaaj hab tej khoom siv ntawm lub thaaj; lub phab tooj ntxuav teg hab lub taw phab;

⁴⁰cov ntaub xov vaaj ncig lub tsevntaub hab cov ncej laajkaab hab tej tag taw ncej laajkaab; dlaim ntaub thaiv lub roojvaag hab cov hlua khi dlaim ntaub, cov ntsa hab taagnrho tej khoom kws siv rua tug TSWV lub Tsevntaub sis ntsib;

⁴¹hab tej tsoog tsho kws xaws rua cov povthawj naav moog ua num huv Chaav Dlawbhuv, cov tsoog tsho povthawj rua Aloos hab nwg cov tub naav ua teg num povthawj.

⁴²Ces cov Yixalayees ua txhua yaam kws tug TSWV tau saamfwm rua Mauxes tav taag huv tuabsi lawm.

⁴³Mauxes tshuaj hab pum has tas txhua yaam kws cov Yixalayees ua tav taag le tug TSWV tau saamfwm tseg lawm tag. Yog le ntawd, Mauxes txhaj foom koob moov rua puab.