Read Hmong Njua Tsiv Dlim 4 Bible Online

Tsiv Dlim 4 - Hmong Njua bible

Tsiv Dlim 4

¹Mauxes teb tug TSWV has tas, “Tabsis yog cov Yixalayees tsi ntseeg kuv hab tsi noog tej lug kws kuv has, kuv yuav ua le caag? yog puab has tas, ‘Tug TSWV tub tsi tau lug tshwm rua koj pum le ne?’ ”

²Tug TSWV txhaj nug Mauxes has tas, “Koj tuav dlaabtsi ntawm koj txhais teg?” Mauxes teb has tas, “Kuv tuav ib tug paas nreg.”

³Tug TSWV has ntxiv rua Mauxes has tas, “Koj ca le muab pov rua huv aav.” Thaus Mauxes muab tug paas nreg pov rhees rua huv aav, tug paas ntawd txawm txa kag ua ib tug naab, Mauxes ntshai hab nwg ca le tig hlo tsiv.

⁴Ces tug TSWV has rua Mauxes has tas, “Koj ca le cev teg tuav nkaus tug naab tug kutwv nqaa hlo.” Mauxes txhaj cev loo teg tuav nkaus tug naab, ces tug naab rov qaab yog tug paas nreg le qub lawm.

⁵Tug TSWV has rua Mauxes has tas, “Koj ua le nuav qha rua cov Yixalayees has tas, tug TSWV kws yog puab cov yawmkoob tug Vaajtswv kws yog Anplahaas, Ixaj hab Yakhauj tug Vaajtswv tau lug tshwm rua koj pum tag.”

⁶Tug TSWV has ntxiv rua Mauxes has tas, “Koj ca le muab koj txhais teg ntsaws rua huv koj plaab tshos.” Mauxes ua lawv le ntawd, hab thaus nwg thau nwg txhais teg tawm lug, ua cav nwg txhais teg ca le mob ruas ua cos dlawb paug ib yaam le te.

⁷Tug TSWV has tas, “Koj ca le muab koj txhais teg ntsaws rov qaab rua huv koj plaab tshos dlua.” Mauxes txawm ua lawv le ntawd, thaus nwg thau nwg txhais teg tawm lug, ua cav nwg txhais teg zoo dlu lug ib yaam le qub lawm.

⁸Tug TSWV has tas, “Yog puab tsi ntseeg koj lossis tsi ntseeg thawj yaam txujci kws koj ua, ces puab yeej yuavtsum ntseeg zaaj nuav xwb.

⁹Thaus puab pum koj ua ob yaam txujci nuav taag, yog puab tseem tsi ntseeg koj hab tsi kaam noog koj tej lug, koj ca le moog has dlej huv tug dlej Niles lug laub rua sau nruab nqhuab. Cov dlej ntawd yuav txa ua ntshaav.”

¹⁰Tabsis Mauxes has rua Vaajtswv has tas, “Tug TSWV, thov koj tsi xob khaiv kuv moog. Kuv yeej ibtxwm has lug txhaav, txawm yog thaus koj nrug kuv thaam los kuv yeej has tsi tau lug nrawm le. Kuv yeej ibtxwm has tsi tau lug zoo hab nplaig yeej txhaav.”

¹¹Tug TSWV has rua Mauxes has tas, “Leejtwg yog tug tsim tuabneeg kuas muaj qhovncauj? Leejtwg yog tug kws ua rua tuabneeg laag ntseg lossis ruag? Leejtwg ua rua tuabneeg tsi pum kev lossis dligmuag? Kuv yog tug TSWV kws ua tej nuav.

¹²Koj ca le moog! Kuv yuav paab koj has hab yuav qha kuas koj txawj has.”

¹³Tabsis Mauxes teb has tas, “Thov koj khaiv lwm tug moog.”

¹⁴Thaus Mauxes has le nuav, tug TSWV npautawg heev rua Mauxes hab has tas, “Koj tug tijlaug Aloos kws yog xeem Levis ne? Kuv paub nwg yeej has tau lug zoo. Taamsim nuav nwg taabtom tuaj cuag koj, hab thaus nwg pum koj nwg yuav zoo sab heev.

¹⁵Koj ca le nrug nwg thaam hab qha rua nwg ua tug has. Kuv yuav paab meb has lug, hab kuv yuav qha kuas meb paub tej kws tsimnyog meb ua.

¹⁶Aloos yuav yog tug kws sawv koj cev has koj cov lug rua cov pejxeem. Ces koj yuav zoo ib yaam le Vaajtswv, koj ua tug qha rua nwg has lug lawm xwb.

¹⁷Nqaa tug paas nreg nuav nrug koj moog, koj txhaj yuav tau tug paas nuav siv ua txujci rua puab.”

¹⁸Ces Mauxes txawm rov qaab moog cuag nwg yawmtxiv Yethoos, hab has rua Yethoos has tas, “Thov ca kuv rov qaab moog saib kuv cov kwvtij kws nyob nraag tebchaws Iziv, saib puab puas tseem muaj sa nyob.” Yethoos pum zoo hab has tas “Moog zoo koj.”

¹⁹Thaus Mauxes tseem nyob huv tebchaws Midias, tug TSWV has rua Mauxes has tas, “Koj ca le rov qaab moog nraag tebchaws Iziv, rua qhov cov tuabneeg kws nrhav koj tua povtseg tub tuag taag lawm.”

²⁰Mauxes txhaj tsaws nwg tug quaspuj hab ob tug tub caij neeg luav hab puab rov moog rua tebchaws Iziv lawm Mauxes nqaa rawv nwg tug paas nreg kws Vaajtswv kuas nwg nqaa nrug nwg moog.

²¹Tug TSWV has rua Mauxes ib zag ntxiv has tas, “Thaus koj moog txug nraag tebchaws Iziv, koj yuavtsum ua txhua yaam txujci tseemceeb kws kuv tub muab fwjchim rua koj lawm, koj ua tim ntsej tim muag rua Falaus saib. Tabsis kuv yuav ua kuas Falaus muaj lub sab tawv, hab nwg yuav tsi kaam tso cov tuabneeg ntawd tawm moog.

²²Ces koj yuavtsum qha rua nwg has tas, kuv kws yog tug TSWV has le nuav, ‘Cov Yixalayees yog kuv tug tub hlub ntaag.

²³Kuv has rua koj has tas, ca le tso kev rua kuv tug tub tawm moog, kuas nwg txhaj tau pehawm kuv, tabsis koj pheej tsi kaam tso le. Taamsim nuav kuv yuav tua koj cov tub hlub kuas tuag taag.’ ”

²⁴Thaus tug TSWV ntsib Mauxes tsuam chaw pw ntawm ib tog kev kws moog rua nraag tebchaws Iziv, nwg tub xaav muab Mauxes tua povtseg rua nraag.

²⁵Ces Xipaulas kws yog Mauxes tug quaspuj, txhaj muab tau ib lub pobzeb ntse ntse lug hlais nwg tug tub dlaim tawv noov, hab muab moog so Mauxes kutaw, hab has tas, “Qhov tseeb tag koj yog kuv tug quasyawg kws tso ntshaav rua kuv.”

²⁶Ces tug TSWV txhaj tseg Mauxes txujsa. Qhov kws nwg has tas, “Koj yog tug quasyawg kws tso ntshaav,” tub yog has txug qhov kws ua kevcai txav tawv ntaag.

²⁷Tom qaab ntawd, tug TSWV has rua Aloos has tas, “Koj ca le moog ntsib Mauxes tom taj suabpuam.” Yog le ntawd, Aloos txhaj moog ntsib Mauxes rua sau lub roob dlawbhuv, hab thaus kws Aloos pum Mauxes, nwg puag nkaus Mauxes nwj.

²⁸Ces Mauxes qha Aloos txhua yaam kws tug TSWV tau has rua Mauxes kuas nwg rov lug rua tebchaws Iziv, hab nwg tseem qha tej txujci kws tug TSWV kuas nwg ua ntawd huv tuabsi rua Aloos.

²⁹Mauxes hab Aloos obtug txhaj ua ke lug rua nraag tebchaws Iziv, hab hu taagnrho cov Yixalayees tej thawjcoj tuaj txoos ua ke.

³⁰Aloos has txhua yaam kws tug TSWV has rua Mauxes rua cov Yixalayees noog, hab Mauxes txawm ua txhua yaam txujci tseemceeb kws tug TSWV qha rua Mauxes lawm, rua cov Yixalayees saib.

³¹Puab kuj ntseeg, hab thaus puab nov has tas, tug TSWV tau lug saib puab hab pum puab tej kev txomnyem kws raug luas tsimtxom ntawd lawm, puab txhaj qhau cev hlo pehawm tug TSWV.