Read Hmong Njua Tsiv Dlim 5 Bible Online

Tsiv Dlim 5 - Hmong Njua bible

Tsiv Dlim 5

¹Tom qaab ntawd, Mauxes hab Aloos txhaj moog cuag cov Iziv tug vaajntxwv hab has tas, “Tug TSWV kws yog cov Yixalayees tug Vaajtswv has tas, ‘Koj ca le tso kuv tsaav tuabneeg moog, puab yuav moog ua ib rooj mov noj tom taj suabpuam ua kuv tsaug.’ ”

²Tabsis Falaus nug has tas, “Tug TSWV yog leejtwg? Ua caag txhaj yuav kuas kuv noog nwg lug hab tso cov Yixalayees tawm moog? Kuv tsi paub tug TSWV; kuv tsi kaam tso cov Yixalayees moog qhov twg le.”

³Mauxes hab Aloos obtug teb has tas, “Cov Henplais tug Vaajtswv lug ua rua peb pum. Yog le ntawd, thov koj pub peb moog peb nub ke rua tom taj suabpuam, moog tua tsaj fij rua tug TSWV kws yog peb tug Vaajtswv. Yog peb tsi ua le ntawd, nwg yuav tua peb lug ntawm tso tej kaab mob phem lossis lug ntawm tej nav ntaaj nav rag kuas peb tuag taag.”

⁴Falaus has rua Mauxes hab Aloos obtug tas, “Yog le caag meb pheej xaav ua kuas cov tuabneeg nuav tso puab teg num tseg ua dlaabtsi? Ca le tso cov qhev nuav rov moog ua num taamsim nuav!

⁵Meb saib maj, mej cov tuabneeg kws nyob huv lub tebchaws nuav fuamvaam coob tshaaj cov Iziv lawm, nwgnuav meb txawm yuav kuas puab tso num tseg nua los?”

⁶Tuab nub ntawd Falaus has rua cov Iziv kws ua thawj saib cov qhev, hab has rua cov Yixalayees kws ua thawjcoj le nuav:

⁷“Txij nub nua moog mej tsi xob muab quavnyaab rua cov tuabneeg nuav xyaw aav puab thwvcib le qub lawm. Mej ca puab maam moog nrhav puab xwb.

⁸Tabsis yuavtsum yuam kuas puab, puab tau thwvcib ntau ib yaam le thaus kws mej tseem muab quavnyaab rua puab, tsi pub kuas tsawg tshaaj ntawd. Vim puab tubnkeeg, puab txhaj tuaj thov kuas kuv tso puab coj khoom moog fij rua puab tug Vaajtswv.

⁹Mej muab num rua puab ua kuas nyaav dlua qhov qub, kuas puab khwv heev tsi tau su le, puab txhaj tsi khoom noog luas tej lug dlaag ntxag.”

¹⁰Cov Iziv kws saib cov qhev hab cov Yixalayees kws ua thawjcoj txhaj moog has rua cov Yixalayees has tas, “Falaus yuav tsi muab quavnyaab rua mej lawm.

¹¹Nwg has tas, mej yuavtsum moog nrhav mej quavnyaab, hab moog nrhav qhov twg los tau, tabsis yuavtsum puab kuas tau thwvcib ntau npaum le qub.”

¹²Yog le ntawd, cov Yixalayees txhaj moog nrhav quavnyaab thoob plawg huv tebchaws Iziv.

¹³Cov thawj kws saib cov qhev ntawd, yuam kuas txhua nub puab yuavtsum puab thwvcib tau ntau ib yaam le thaus kws tseem muab quavnyaab rua puab.

¹⁴Cov Iziv kws ua thawj saib cov qhev, ntaus cov Yixalayees kws puab muab tsaa ua cov thawj saib num. Puab nug has tas, “Vim le caag mej cov tuabneeg puab tsi tau thwvcib ntau npaum le yaav taag lug lawm?”

¹⁵Cov Yixalayees kws saib num txhaj moog cuag Falaus hab ywg has tas, “Falaus, vim le caag koj ua le nuav rua peb?

¹⁶Koj tub tsi muab quavnyaab rua peb le yaav taag lug, tabsis koj tseem kuas puab yuam peb puab thwvcib taag zug le! Hab nwgnuav puab ntaus peb ua lwj ua lam, mas tsimnyog koj nrug paub zaaj nuav.”

¹⁷Falaus teb has tas, “Mej tubnkeeg hab tsi xaav ua num xwb, hab tub yog vim le nuav mej txhaj tuaj thov kuv kuas kuv pub mej coj khoom moog fij rua tug TSWV.

¹⁸Mej ca le rov qaab moog ua num taamsim nuav, kuv yuav tsi muab quavnyaab rua mej lawm, tabsis mej yuavtsum puab thwvcib kuas tau ntau ib yaam le mej ibtxwm puab lug lawm.”

¹⁹Cov Yixalayees kws saib num, pum has tas puab yeej yuav raug teebmeem xwb, rua qhov Falaus has kuas txhua nub puab yuavtsum puab thwvcib kuas tau ntau ib yaam le puab ibtxwm puab lug lawm.

²⁰Thaus puab rov qaab lug, puab ntsib Mauxes hab Aloos obtug taabtom tog puab.

²¹Puab has rua Mauxes hab Aloos obtug tas, “Thov Vaajtswv taug tej num kws meb ua lug lawm hab rau txim rua meb, rua qhov meb ua rua Falaus hab nwg cov numtswv ntxub peb heev. Meb ua le ntawd ib yaam le yog meb muab ntaaj cob rua puab tua peb povtseg ntaag.”

²²Mauxes moog thov tug TSWV dlua ib zag ntxiv has tas, “Tug TSWV, ua caag koj tsi hlub koj tsaav tuabneeg? Vim le caag koj khaiv kuv tuaj?

²³Txij nub kws koj khaiv kuv ua tug sawv koj cev moog has rua Falaus, nwg tseem hajyam tsimtxom puab heev xwb. Hab koj tub tsi ua ib yaam dlaabtsi paab puab le!”