Read Hmong Njua Tsiv Dlim 6 Bible Online

Tsiv Dlim 6 - Hmong Njua bible

Tsiv Dlim 6

¹Ces tug TSWV has rua Mauxes has tas, “Nwgnuav koj yuav pum tej kws kuv yuav ua rua Falaus. Kuv yuav yuam kuas nwg tso kuv tsaav tuabneeg tawm moog. Qhov tseeb, yog kuv yuam kuas nwg ntab kuv tsaav tuabneeg tawm huv nwg lub tebchaws moog.”

²Vaajtswv nrug Mauxes thaam hab has rua Mauxes has tas, “Kuv yog tug TSWV.

³Kuv yog tug Vaajtswv kws muaj fwjchim luj kawg nkaus, tug kws tau tshwm lug rua Anplahaas, Ixaj hab Yakhauj puab pum, tabsis kuv tsi tau qha kuv lub npe dlawbhuv kws yog tug TSWV rua puab paub.

⁴Hab kuv tseem tau coglug rua puab, yuav muab lub tebchaws Kana-aas pub rua puab, yog lub tebchaws kws thaus u puab lug nyob ua tuabneeg txawv tebchaws tau ib ntus.

⁵Nwgnuav kuv nov cov Yixalayees kws raug cov Iziv muab yuam ua qhev lub suab quaj qw lawm, hab kuv ncu txug tej lug kws kuv cog tseg lawm.

⁶Koj moog qha rua cov Yixalayees has tas, tej lug nuav yog kuv has rua puab ntaag, ‘Kuv yog tug TSWV, kuv yuav paab mej hab tso kuas mej dlim ntawm txujkev kws ua cov Iziv qhev. Kuv yuav tsaa kuv txhais npaab kws muaj zug luj zug nchaav, coj kev rau txim nyaav heev lug rua puab, hab kuv yuav cawm kuas mej dlim.

⁷Kuv yuav xaiv mej ua kuv tsaav tuabneeg, hab kuv yuav yog mej tug Vaajtswv. Thaus kuv tso mej dlim kev ua qhev huv tebchaws Iziv lug, mej txhaj yuav paub has tas kuv yog tug TSWV kws yog mej tug Vaajtswv.

⁸Kuv yuav coj mej moog nyob huv lub tebchaws kws kuv coglug rua Anplahaas, Ixaj hab Yakhauj lawm; hab kuv yuav muab pub rua mej nyob ua mej tug. Kuv yog tug TSWV.’ ”

⁹Mauxes coj cov lug nuav moog has rua cov Yixalayees, tabsis puab tsi ntseeg nwg le, rua qhov puab dlhuav sab rua txujkev ua luas tauj luas qhev hwv lawm.

¹⁰Ces tug TSWV has rua Mauxes has tas,

¹¹“Koj moog has rua Falaus kws yog cov Iziv tug vaajntxwv kuas nwg ca le tso cov Yixalayees tawm huv nwg lub tebchaws moog.”

¹²Tabsis Mauxes teb has tas, “Cov Yixalayees tub tsi noog kuv lug lawm, Falaus yuav ua le caag noog kuv lug? Kuv yog ib tug tuabneeg kws ibtxwm has lug txhaav heev.”

¹³Tug TSWV has rua Mauxes hab Aloos obtug le nuav: “Meb ca le qha rua cov Yixalayees hab Falaus kws yog cov Iziv tug vaajntxwv has tas, ‘Kuv yog tug tsaa meb ua ob tug coj cov Yixalayees tawm huv tebchaws Iziv nuav moog.’ ”

¹⁴Yakhauj tug tub hlub Lunpees, muaj plaub tug tub: Hanauj, Palus, Hexeloos hab Kalamis, puab puavleej yog cov yawmkoob kws ris puab caajceg npe.

¹⁵Xime-oos muaj rau tug tub: Yemuyees, Yamees, Auhas, Yakhees, Xauhas, hab Sa-ules, puab yog tug quaspuj Kana-aas cov tub; puab puavleej yog cov yawmkoob kws ris puab caajceg npe.

¹⁶Levis muaj peb tug tub: Nkesoos, Kauhas hab Melalis; puab puavleej yog cov yawmkoob kws ris puab caajceg npe. Levis ua neej nyob tau ib puas peb caug xyaa xyoo.

¹⁷Nkesoos muaj ob tug tub: Linpanis, hab Sime-is; obtug muaj xeebntxwv coob heev.

¹⁸Kauhas muaj plaub tug tub: Amalas, Ixahas, Henploos, hab Uxiyees. Kauhas ua neej nyob tau ib puas peb caug peb xyoos.

¹⁹Melalis muaj ob leeg tub: Mahalis hab Musis. Cov nuav puavleej yog suav xeem Levis nrug puab tej xeebntxwv huv tuabsi.

²⁰Amalas yuav nwg txiv tug muam Yaukhenpes lug ua quaspuj, Yaukhenpes txhaj yug tau Aloos hab Mauxes obtug. Amalas ua neej nyob tau ib puas peb caug xyaa xyoo.

²¹Ixakhas muaj peb tug tub: Kaulahas, Nefenkas hab Xikhalis.

²²Uxiyees, muaj peb tug tub: Misayees, Exafas hab Sithalis.

²³Aloos yuav Elinpas kws yog Aminadas tug ntxhais hab yog Nahasoos tug muam ua quaspuj; Elinpas yug tau Nadas, Anpihus, Ele-axas hab Ithamas rua Aloos.

²⁴Kaulas muaj peb tug tub: Axis, Ekanas, hab Anpe-asafas; puab puavleej yog Kaulas caajceg kws faib ua tej cuab lawm cov yawmkoob.

²⁵Aloos tug tub Ele-axas, yuav Putiyees ib tug ntxhais ua quaspuj; hab nwg yug tau Finehas rua Ele-axas. Cov nuav yog cov thawjcoj ntawm nwg caajceg hab yog tej cuab kwvtij ntawm xeem Levis.

²⁶Aloos hab Mauxes yog ob tug kws Vaajtswv has tas, “Coj cov Yixalayees tawm huv tebchaws Iziv moog.”

²⁷Obtug yog ob tug kws moog cuag Falaus kws yog cov Iziv tug vaajntxwv kuas tso cov Yixalayees tawm moog nyob ywjpheej.

²⁸Thaus tug TSWV lug has rua Mauxes huv tebchaws Iziv,

²⁹nwg has le nuav: “Kuv yog tug TSWV. Ca le qha txhua yaam kws kuv qha koj lawm rua cov Iziv tug vaajntxwv.”

³⁰Tabsis Mauxes teb has tas, “Koj yeej paub kuv yog ib tug tuabneeg kws has lug txhaav heev; yuav ua le caag Falaus txhaj noog kuv has?”