Read Hmong Njua Tsiv Dlim 7 Bible Online

Tsiv Dlim 7 - Hmong Njua bible

Tsiv Dlim 7

¹Tug TSWV has tas, “Kuv yuav ua kuas koj zoo le Vaajtswv rua Falaus, hab koj tug tijlaug Aloos yuav ua tug cev koj tej lug rua nwg.

²Koj yuavtsum pav txhua yaam kws kuv qha koj rua Aloos, hab nwg yuav has rua Falaus kuas tso cov Yixalayees tawm huv nwg lub tebchaws moog.

³Tabsis kuv yuav ua kuas Falaus muaj lub sab tawv heev, txawm yog nwg yuav pum kuv ua tej txujci txaus ntshai heev nyob huv tebchaws Iziv nuav npaum twg los nwg yuav tsi noog koj tej lug.

⁴Ces kuv yuav tsaa kuv txhais teg rau txim nyaav rua cov Iziv hab yuav coj kuv tsaav tuabneeg Yixalayees tawm huv tebchaws Iziv moog.

⁵Thaus kuv tsaa kuv txais teg lug tawmtsaam cov Iziv hab coj kuv tsaav tuabneeg tawm huv puab lub tebchaws moog, puab txhaj yuav paub has tas, kuv yog tug TSWV tag.”

⁶Mauxes hab Aloos obtug ua lawv le kws tug TSWV has.

⁷Thaus obtug moog cuag Falaus, Mauxes noobnyoog muaj yim caum xyoo, Aloos noobnyoog muaj yim caum peb xyoos.

⁸Tug TSWV has rua Mauxes hab Aloos obtug tas,

⁹“Yog Falaus has kuas meb ua txujci rua nwg saib, koj ca le has kuas Aloos muab nwg tug paas nreg pov rhees rua ntawm Falaus xubndlag, ces tug paas ntawd yuav txa ua ib tug naab.”

¹⁰Mauxes hab Aloos moog cuag Falaus hab ua lawv le tej kws tug TSWV has. Aloos muab nwg tug paas nreg pov rhees rua ntawm Falaus hab nwg cov numtswv xubndlag, tug paas ntawd txawm txa ua ib tug naab.

¹¹Falaus hu nwg cov tuabneeg txawj ntse hab cov tuabneeg txawj yeegsiv tuaj hab puab ua tau tej txujci ib yaam le Mauxes obtug ua.

¹²Puab muab puab tej paas pov rua huv aav, tej paas ntawd txawm txa ua naab taag le hab, tabsis Aloos tug paas nreg muab puab tej paas nreg nqog taag huv tuabsi lawm.

¹³Txawm yog le ntawd los Falaus tseem muaj lub sab tawv, tsi ntseeg Mauxes hab Aloos obtug tej lug lawv le tug TSWV tau has tseg lawm.

¹⁴Ces tug TSWV has rua Mauxes tas, “Falaus lub sab tawv heev, nwg tsi kaam tso cov Yixalayees tawm moog.

¹⁵Yog le ntawd, thaus sawv ntxuv koj ca le moog cuag Falaus thaus nwg moog nraag tug dlej Niles. Koj nqaa tug paas nreg kws txa tau ua naab, hab moog tog nwg nraag ntug dlej.

¹⁶Koj has rua Falaus has tas, ‘Tug TSWV kws yog cov Henplais tug Vaajtswv khaiv kuv tuaj has kuas koj ca le tso nwg tsaav tuabneeg tawm moog, puab txhaj tau moog pehawm nwg tom taj suabpuam. Tabsis koj tseem tsi noog Vaajtswv lug le hab.

¹⁷Falaus, nwgnuav tug TSWV has tas, koj yuav paub nwg yog tug TSWV lug ntawm tej txujci kws nwg yuav ua nuav. Koj saib, kuv yuav muab tug paas nreg nuav nplawm tug dlej Niles nuav, mas tug dlej nuav yuav txa ua ntshaav taagnrho.

¹⁸Ntseg yuav tuag taag, hab dlej yuav tsw lwj ntxag, ua rua cov Iziv yuav haus tsi taug tej dlej ntawd.’ ”

¹⁹Tug TSWV has rua Mauxes has tas, “Koj kuas Aloos muab nwg tug paas nreg tsaa rua txhua tug dlej, tej kwj dleg, hab tej paag dlej huv tebchaws Iziv. Tej dlej ntawd yuav txa ua ntshaav, hab yuav muaj ntshaav thoob plawg lub tebchaws, txawm yog huv tej thoob ntoo hab tej hub pobzeb los yuav muaj ntshaav taag huv tuabsi.”

²⁰Ces Mauxes hab Aloos txawm ua lawv le tug TSWV has. Aloos muab nwg tug paas nreg nplawm tug dlej Niles taabmeeg Falaus hab nwg cov numtswv, ces tej dlej txawm txa ua ntshaav taag huv tuabsi lawm.

²¹Tej ntseg huv dlej tuag taag tsw lwj ntxag ua rua cov Iziv haus tsi taug. Hab ua rua muaj ntshaav thoob plawg tebchaws Iziv.

²²Cov Iziv kws txawj yeegsiv, puab ua tau ib yaam le ntawd hab, Falaus txhaj tseem muaj lub sab tawv le qub. Nwg tsi noog Mauxes hab Aloos tej lug lawv le tug TSWV tau has tseg lawm.

²³Falaus rov qaab moog tsev, nwg tsi quavntsej zaaj nuav le.

²⁴Cov Iziv moog khawb qhovdlej lawv tug ntug dlej Niles, rua qhov puab haus tsi taug tug dlej Niles.

²⁵Xyaa nub kws tug TSWV muab dlej hloov ua ntshaav dlhau lawm.