Read Hmong Njua Tsiv Dlim 8 Bible Online

Tsiv Dlim 8 - Hmong Njua bible

Tsiv Dlim 8

¹Tug TSWV has rua Mauxes has tas, “Ca le moog cuag Falaus hab has rua nwg tas, ‘Koj ca le tso kuv tsaav tuabneeg moog, puab yuav moog pehawm kuv.

²Yog koj tseem tsi tso puab moog hab, kuv yuav rau txim rua koj lub tebchaws kws yog tso qaav lug nyob puv nkaus koj lub tebchaws.

³Qaav yuav nyob puv nkaus huv tug dlej Niles, tej qaav ntawd yuav tawm huv tug dlej Niles lug nyob huv koj tsev, huv koj chaav pw, sau koj lub txaaj, huv koj cov numtswv hab koj cov pejxeem tsev, huv koj lub qhovcub, hab koj tej laujkaub ua noj ua haus.

⁴Tej qaav ntawd yuav dlha lug nce koj, koj cov pejxeem hab koj cov numtswv huv tuabsi.’ ”

⁵Tug TSWV has rua Mauxes has tas, “Koj kuas Aloos muab nwg tug paas nreg tsaa rua tej dlej, tej kwj dleg, hab tej paag dlej, ua kuas qaav tawm tuaj nyob thoob plawg tebchaws Iziv.”

⁶Yog le ntawd, Aloos txhaj muab nwg tug paas tsaa rua tej dlej, ces qaav txawm tawm tuaj puv nkaus tebchaws Iziv.

⁷Tabsis cov Iziv kws txawj yeegsiv, kuj ua yeegsiv kuas qaav tawm tuaj puv nkaus lub tebchaws Iziv hab.

⁸Falaus hu Mauxes hab Aloos obtug moog cuag nwg, nwg has rua obtug tas, “Meb ca le thov kuas tug TSWV tshem tej qaav nuav tawm moog, kuv yuav tso mej cov tuabneeg coj tsaj moog fij rua tug TSWV.”

⁹Mauxes has rua Falaus has tas, “Kuv zoo sab thov Vaajtswv paab koj. Saib koj muab lub sijhawm twg rua kuv thov Vaajtswv rua koj, koj cov numtswv hab koj cov pejxeem kuas tej qaav ntawd tsiv tawm ntawm mej moog, tsuas pub muaj nyob huv tug dlej Niles xwb.”

¹⁰Falaus teb has tas, “Pigkig koj maam le thov Vaajtswv rua kuv.” Mauxes teb has tas, “Kuv yuav ua lawv le koj thov, mas koj txhaj yuav paub has tas, tsi muaj lwm tug vaajtswv zoo npaum le tug TSWV kws yog peb tug Vaajtswv nuav lawm.

¹¹Tej qaav ntawd yuav tsiv tawm ntawm koj, koj cov numtswv hab koj cov pejxeem moog, tsuas pub muaj nyob huv tug dlej Niles xwb.”

¹²Mauxes hab Aloos tawm huv Falaus tsev moog, hab Mauxes thov tug TSWV kuas tshem tej qaav kws tso lug tsimtxom Falaus ntawd moog kuas taag.

¹³Tug TSWV ua lawv le Mauxes thov, tej qaav kws nyob huv tej tsev, ntawm tej tshaav puam hab tom tej teb puavleej tuag taag huv tuabsi lawm.

¹⁴Cov Iziv khaws tej qaav tuag ntawd lug tso ua tej pawg tsw lwj ntxag thoob lub tebchaws.

¹⁵Thaus Falaus pum tej qaav ntawd tuag taag lawm, nwg rov muaj lub sab tawv ib yaam le qub, lawv le tug TSWV tau has lawm, Falaus yeej tsi noog Mauxes hab Aloos obtug tej lug le.

¹⁶Tug TSWV has rua Mauxes has tas, “Koj ca le has kuas Aloos muab nwg tug paas nreg nplawm aav, tej moov aav kws nyob thoob plawg huv lub tebchaws Iziv nuav yuav txa ua yoov qab taag.”

¹⁷Yog le ntawd, Aloos muab nwg tug paas nreg nplawm aav, tej moov aav thoob plawg lub tebchaws Iziv txawm txa ua yoov qab ntsauv tuabneeg hab tej tsaj.

¹⁸Cov Iziv kws txawj yeegsiv, puab ua taag zug kuas muaj yoov qab, tabsis puab ua tsi tau le. Yoov qab yaa lug puv nkaus txhua qhov chaw,

¹⁹hab cov tuabneeg kws txawj khawvkoob has rua Falaus has tas, “Vaajtswv yog tug kws ua tej xwm nuav tag!” Tabsis Falaus tseem muaj lub sab tawv heev, nwg tsi noog Mauxes hab Aloos obtug lug lawv le tug TSWV tau has tseg lawm.

²⁰Tug TSWV has rua Mauxes has tas, “Pigkig sawv ntxuv koj ca le moog cuag Falaus, thaus kws nwg taabtom moog nraag haav dlej, hab koj qha tug TSWV tej lug rua nwg has tas, ‘Koj ca le tso kuv tsaav tuabneeg moog, puab txhaj tau moog pehawm kuv.

²¹Kuv ceebtoom rua koj has tas, yog koj tsi kaam, kuv yuav rau txim rua koj kws yog tso yoov lug tsaws koj, koj cov numtswv, hab koj cov pejxeem. Cov Iziv tej tsev los yuav muaj yoov puv nkaus, hab yuav yaa lug tsaws puv nkaus sau npoo aav.

²²Tabsis kuv yuav tseg cheebtsaam Nkausees, thaaj chaw kws kuv tsaav tuabneeg nyob, yuav tsi pub kuas muaj yoov hlo le. Kuv yuav ua le nuav koj txhaj paub has tas, kuv yog tug TSWV kws ua tej nuav nyob huv lub tebchaws nuav.

²³“ ‘Kuv yuav ua ib yaam lug cais kuv tsaav tuabneeg hab koj tsaav tuabneeg. Pigkig yuav muaj yaam txujci nuav tshwmsim lug.’ ”

²⁴Tug TSWV tso yoov yaa poog ntwg lug tsaws puv nkaus rua huv Falaus lub loog hab huv nwg cov numtswv tej tsev. Cov yoov nuav ua rua cov pejxeem thoob plawg lub tebchaws Iziv tau kev ntxhuv sab heev.

²⁵Falaus txhaj khaiv tuabneeg moog hu Mauxes hab Aloos obtug tuaj cuag nwg, hab nwg has rua obtug tas, “Mej ca le moog muab khoom hlawv fij rua mej tug Vaajtswv nyob huv lub tebchaws nuav.”

²⁶Mauxes teb has tas, “Ua le ntawd tsi yog cai, rua qhov tej tsaj kws peb tua fij rua tug TSWV kws yog peb tug Vaajtswv, yog ib yaam kws qas heev rua cov Iziv. Yog peb muab tej tsaj kws cov Iziv tsi nyam lug tua ua khoom fij nyob qhov twg, thaus puab pum peb, puab yuav muab pobzeb ntaus kuas peb tuag.

²⁷Yog le ntawd, peb yuavtsum moog peb nub ke rua tom taj suabpuam, peb maam tua tsaj fij rua tug TSWV kws yog peb tug Vaajtswv, lawv le nwg tau has rua peb lawm.”

²⁸Falaus has tas, “Yog mej moog tsi dleb, kuv yuav tso mej moog tua tsaj hlawv fij rua tug TSWV kws yog mej tug Vaajtswv tom taj suabpuam. Mej thov Vaajtswv paab kuv hab.”

²⁹Mauxes teb has tas, “Thaus kuv rov moog, kuv yuav thov tug TSWV kuas pigkig nwg tshem cov yoov nuav tawm ntawm koj, koj cov numtswv hab koj cov pejxeem moog kuas taag. Tabsis koj tsi xob dlaag peb ntxiv lawm, hab pheej txwv tsi pub cov Yixalayees moog tua tsaj fij rua tug TSWV.”

³⁰Mauxes tawm ntawm Falaus lub tsev lug hab thov tug TSWV,

³¹hab tug TSWV ua lawv le Mauxes tej lug thov. Tej yoov yaa tawm ntawm Falaus, ntawm nwg cov numtswv hab ntawm nwg cov pejxeem moog taag tsi tshuav ib tug seem nyob qhov twg le lawm.

³²Tabsis zag nuav los Falaus tseem muaj lub sab tawv ib yaam le qub, nwg yeej tsi kaam tso cov Yixalayees moog le.