Read Hmong Njua Tsiv Dlim 9 Bible Online

Tsiv Dlim 9 - Hmong Njua bible

Tsiv Dlim 9

¹Tug TSWV has rua Mauxes has tas, “Koj ca le rov moog cuag Falaus hab has rua nwg has tas, tug TSWV kws yog cov Henplais tug Vaajtswv has tas, ‘Koj ca le tso kuv tsaav tuabneeg moog, puab txhaj tau moog pehawm kuv.

²Yog koj tseem tsi pub puab moog,

³kuv yuav rau txim rua koj kws yog tso mob aws lug rua mej tej tsaj kws yog mej tej neeg, tej neeg luav, tej ntxhuav, tej nyuj, tej yaaj hab tej tshis.

⁴Kuv yuav ua kuas cov Iziv tej tsaj txhu tuag taag, tabsis kuv yuav tsi pub cov Yixalayees tej tsaj ib tug tuag le.

⁵Kuv yog tug TSWV, kuv tub teem sijhawm ca lawm, pigkig kuv yuav ua tej txujci nuav.’ ”

⁶Nub tom qaab, tug TSWV txawm ua lawv le nwg tau has ntawd, ces cov Iziv tej tsaj tuag taag huv tuabsi, tabsis cov Yixalayees tej tsaj tsi tuag ib tug le.

⁷Falaus tso tuabneeg moog tshuaj saib tej xwm ntawd, puab pum has tas, cov Yixalayees tej tsaj tsi tuag ib tug le. Tabsis Falaus tseem muaj lub sab tawv tsi tso cov Yixalayees moog le.

⁸Tug TSWV has rua Mauxes hab Aloos obtug tas, “Meb ca le tsuab ob peb taus tshauv huv qhovcub muab rua Mauxes w rua sau nruab ntug taabmeeg Falaus.

⁹Cov moov tshauv ntawd yuav yaa ri nab moog thoob plawg lub tebchaws Iziv, hab tej moov tshauv ntawd yaa moog txug thaaj tsaam twg, cov tuabneeg hab tej tsaj kws nyob thaaj tsaam ntawd yuav mob rwj ua paug thoob plawg ib ce.”

¹⁰Yog le ntawd, obtug txhaj moog tsuab ib leeg ib taus tshauv, obtug lug sawv ze ntawm Falaus xubndlag, Mauxes muab cov tshauv ntawd w rua sau nruab ntug, cov tshauv ntawd txawm ua rua tuabneeg hab tej tsaj mob rwj thoob plawg ib ce.

¹¹Cov tuabneeg kws txawj ua yeegsiv, puab tsi muaj peevxwm lug cuag Mauxes, rua qhov puab mob rwj thoob plawg ib ce ib yaam le cov Iziv hab.

¹²Tabsis tug TSWV ua rua Falaus muaj lub sab tawv, lawv le kws tug TSWV tau has tseg lawm, Falaus txhaj tsi noog Mauxes hab Aloos obtug tej lug.

¹³Tug TSWV has rua Mauxes has tas, “Pigkig koj ca le sawv ntxuv moog cuag Falaus hab has rua nwg tas, tug TSWV kws yog cov Henplais tug Vaajtswv has tas, ‘Ca le tso kuv tsaav tuabneeg moog, puab yuav moog pehawm kuv.

¹⁴Zag nuav tsi yog kuv yuav rau txim rua koj cov numtswv hab koj cov pejxeem xwb, tabsis kuv yuav rau txim rua koj ntaag, koj txhaj yuav paub has tas, nyob huv nplajteb nuav yeej tsi muaj ib tug kws yuav muaj fwjchim luj npaum le kuv.

¹⁵Yog kuv tsaa teg lug tawmtsaam koj hab tso kaab mob lug rua koj cov pejxeem, ces mej yeej yuav tuag taag huv tuabsi.

¹⁶Tabsis kuv tsi pub koj tuag, rua qhov kuv xaav kuas koj pum kuv lub fwjchim, kuv lub koob meej txhaj yuav nrov nchaa moo lug moog thoob plawg lub nplajteb.

¹⁷Nwgnuav koj tseem muaj lub sab tawv hab tsi kaam tso kuv tsaav tuabneeg moog.

¹⁸Pigkig lub sijhawm nuav kuv yuav tso lawg lug hlub heev, txij thaus muaj lub tebchaws Iziv nuav lug, yeej tsi tau muaj dlua ib zag lawg lug hlub npaum le zag nuav.

¹⁹Koj yuavtsum kuas suavdlawg muab tej tsaj txhu lawv lug rua huv nkuaj hab muab txhua yaam kws koj muaj coj lug tso rua huv tsev, rua qhov lawg yuav lug ntaus cov tuabneeg hab tej tsaj kws nyob ntawm tej tshaav puam kuas tuag taag huv tuabsi.’ ”

²⁰Falaus cov numtswv qee leej ntshai heev vim tej lug kws tug TSWV has ntawd, puab txhaj coj puab cov qhev lug tsev hab caab puab tej tsaj lug rua huv nkuaj.

²¹Tabsis cov tuabneeg kws tsi quavntsej Vaajtswv tej lug, puab tso puab cov qhev hab tej tsaj nwg nyob nwg rua huv tej teb.

²²Ces tug TSWV has rua Mauxes has tas, “Koj ca le tsaa koj txhais teg rua sau ntuj, lawg yuav poob lug thoob plawg lub tebchaws Iziv, lawg yuav ntaus tuabneeg, ntaus tej tsaj txhu hab tej qoobloo kws nyob huv tej teb kuas puamtsuaj taag.”

²³Mauxes txawm muab nwg tug paas nreg taw rua sau ntuj, tug TSWV ua xub nroo hab tsaglig xub laim lug ti nkaus rua huv aav. Tug TSWV tso

²⁴lawg lug hlub heev nchuav nthwv ib tog tuaj hab xub laim lab pis vog, cua dlaaj cua dlub ntsawj nrov nroo ntwg ib tog tuaj. Txij thaus muaj lub tebchaws Iziv lug, cov Iziv yeej tsi tau pum muaj dlua ib zag le nuav.

²⁵Tej tuabneeg, tej tsaj txhu hab txhua yaam kws nyob tom tej taj nraag thoob plawg lub tebchaws Iziv, raug lawg ntaus puamtsuaj taag. Lawg tseem ntaus tej qoobloo kws cog rua huv tej teb hab txhua tsob ntoo ntsoog taag huv tuabsi.

²⁶Tsuas tshuav cheebtsaam Nkausees kws cov Yixalayees nyob txhaj tsi muaj lawg poob lug raug xwb.

²⁷Falaus khaiv tuabneeg moog hu Mauxes hab Aloos obtug tuaj cuag nwg, nwg has rua obtug tas, “Zag nuav kuv ua txhum lawm; tug TSWV yeej ua yog lawm, kuv hab kuv cov pejxeem puavleej ua txhum.

²⁸Thov tug TSWV lauj! Peb tiv tsi taug tej suab xub nroo hab tej lawg nuav lawm! Kuv thov coglug tso mej moog, tsi pub mej nyob huv nuav ntxiv lawm.”

²⁹Mauxes teb Falaus has tas, “Thaus kuv tawm huv lub nroog nuav moog, kuv yuav tsaa teg thov tug TSWV. Xub yuav tsi nroo, hab lawg yuav tsi lug ntxiv lawm, koj txhaj yuav paub has tas lub nplajteb nuav yog tug TSWV tug.

³⁰Tabsis kuv tub paub lawm has tas, koj hab koj cov numtswv yuav tsi ntshai tug TSWV kws yog Vaajtswv.”

³¹Tej maaj hab nplej raug puamtsuaj taag, rua qhov lub caij ntawd nplej taabtom sav, hab maaj taabtom tawg paaj.

³²Tabsis tej mog tsi raug puamtsuaj, rua qhov tseem tuaj tsi tau nto npoo aav.

³³Mauxes tawm huv Falaus lub loog moog, nwg moog rua nrau ntug nroog, nwg tsaa teg thov tug TSWV. Xub txawm ntsag, lawg hab naag txawm tu.

³⁴Thaus Falaus pum has tas, xub tsi nroo, lawg hab naag tsi lug lawm, nwg rov ua txhum dlua. Nwg hab nwg cov numtswv rov muaj lub sab tawv le qub,

³⁵hab ua lawv le kws Vaajtswv tau has rua Mauxes lawm, mas Falaus yeej tsi kaam tso cov Yixalayees moog le.