Read Hmong Njua Yauj 1 Bible Online

Yauj 1 - Hmong Njua bible

Yauj 1

¹Muaj ib tug txivneej npe hu ua Yauj, nyob huv lub tebchaws Uxes, nwg fwm hab muab sab npuab Vaajtswv. Nwg yog tuabneeg zoo hab tsi ua kev phem kev qas.

²Nwg muaj xyaa tug tub hab peb tug ntxhais,

³muaj xyaa txheeb tug yaaj, peb txheeb tug ntxhuav, ib txheeb tug nyuj hab tsib puas tug neeg luav, hab muaj tubkhai coob heev. Nwg yog tug kws npluanuj tshaaj plawg nyob saab nubtuaj.

⁴Yauj cov tub sis hloo nta ua rooj noj rooj haus, ib tug ua ces suavdlawg tuaj koom, hab caw puab cov muam tuaj nrug puab noj puab haus.

⁵Txhua zag kws puab noj haus taag, taagkig tom qaab Yauj sawv ntxuv muab tsaj moog tua hlawv fij ua kevcai dlaws nwg cov mivnyuas tej kev txhum. Nwg naj zag ua kevcai dlaws kev txhum le ntawd rua nwg cov mivnyuas, rua qhov nwg ntshai nyob tsaam nwg cov mivnyuas ua txhum rua Vaajtswv.

⁶Muaj ib nub cov timtswv ceebtsheej tuaj cuag tug TSWV, Ntxwgnyoog los kuj tuaj nrug puab nyob ntawd hab.

⁷Tug TSWV nug Ntxwgnyoog has tas, “Koj moog dlaabtsi lug?” Ntxwgnyoog teb has tas, “Kuv moog ncig ntuj ncig teb lug xwb.”

⁸Tug TSWV nug has tas, “Koj puas pum Yauj kws yog kuv tug tubkhai? Tej tuabneeg kws nyob huv nplajteb tsi muaj ib tug ua zoo hab muab sab npuab kuv le nwg. Nwg fwm kuv hab tsi ua kev phem kev qas le.”

⁹Ntxwgnyoog teb has tas, “Yog koj tsi pub nwg muaj ib yaam dlaabtsi le, nwg puas tseem yuav fwm koj?

¹⁰Koj yeej ibtxwm tsomkwm nwg, nwg tsev tuabneeg hab txhua yaam kws nwg muaj. Koj foom koob moov rua txhua yaam kws nwg ua, hab pub rua nwg muaj tsaj txhu coob ua npoj ntwg puv toj puv peg.

¹¹Tabsis nwgnuav yog koj muab txhua yaam kws nwg muaj tshem huv tuabsi moog, nwg yuav tshev nkaug teg nkuav rua koj ntaag!”

¹²Tug TSWV has rua Ntxwgnyoog has tas, “Koj yuav ua le caag rua txhua yaam kws nwg muaj los tau, tabsis koj tsi xob kov nwg le.” Ces Ntxwgnyoog txawm moog lawm.

¹³Muaj ib nub thaus Yauj cov mivnyuas taabtom noj haus nyob huv tug tijlaug hlub lub tsev,

¹⁴txawm muaj ib tug tubkhai dlha lug qha rua Yauj has tas, “Thaus peb taabtom muab nyuj laij teb, hab tej neeg luav tseem noj zaub zum zawg ibncig ntawm peb,

¹⁵Ces taamsim ntawd cov tuabneeg Xanpees txawm tuaj tua hab txeeb taagnrho tej nyuj hab tej neeg luav huv tuabsi caab moog lawm. Puab muab koj cov tubkhai tua tuag taag, tsuas tshuav kuv tuab leeg tsiv dlim lug qha koj xwb.”

¹⁶Thaus tug ntawd tseem has tsi tau taag, txawm muaj dlua ib tug tubkhai dlha lug qha has tas, “Xub tua koj tej yaaj hab cov tub yug yaaj tuag taag, tsuas tshuav kuv tuab leeg lug qha koj xwb.”

¹⁷Thaus tug ntawd tseem has tsi tau taag, tsua muaj dlua ib tug tubkhai dlha lug qha has tas, “Muaj peb paab tuabneeg Khadees tuaj tua peb, puab txeeb taagnrho tej ntxhuav hab tua koj cov tubkhai tuag taag, tsuas tshuav kuv tuab leeg tsiv dlim lug qha koj xwb.”

¹⁸Thaus tug ntawd tseem has tsi tau taag, rov muaj dlua ib tug tubkhai dlha lug qha hab has tas, “Koj cov mivnyuas tseem taabtom noj haus huv koj tug tub hlub lub tsev,

¹⁹muaj cua dlaaj cua dlub ntsawj tom taj suabpuam tuaj ua rua lub tsev qaug lug ntaus koj cov mivnyuas tuag taag. Tsuas tshuav kuv tuab leeg dlim lug qha koj paub xwb.”

²⁰Thaus nov le ntawd, Yauj sawv tseeg dlua rhe nwg lub tsho hab tu sab heev. Nwg muab nwg cov plaubhau chais hab pw ndlo rua huv aav.

²¹Yauj has tas, “Kuv nam yug kuv lug labqaab le caag, ces kuv yuav rov moog labqaab ib yaam le ntawd, tug TSWV muab txhua yaam rua kuv, nwgnuav tug TSWV coj rov qaab. Thov kuas suavdlawg qhuas nwg lub npe!”

²²Txawm yog muaj tej xwm nuav lug raug Yauj los nwg tsi ua txhum lossis lam txim rua Vaajtswv le.