Read Hmong Njua Yauj 10 Bible Online

Yauj 10 - Hmong Njua bible

Yauj 10

¹Kuv dlhuav ua neej nyob heev lawm. Thov noog kuv ywg kuv tej kev lwj sab.

²Vaajtswv, thov tsi xob rau txim rua kuv. Thov qha rua kuv saib! Yog le caag koj txhaj rau txim rua kuv?

³Puas tsimnyog koj ua nruj ua tsiv rua kuv, saib tsi taug tej kws koj tsim, hab luag ntxhi rua tej tuabneeg sab phem tej num?

⁴Koj puas muaj qhovmuag le tuabneeg muaj? Koj puas pum le tuabneeg pum?

⁵Koj noobnyoog puas tuab lu le tuabneeg, lossis koj txujsa puas tuab lu le tuabneeg txuj?

⁶Vim le caag koj pheej nrhav kuv tej kev txhum hab tshawb tej kws kuv ua tsi yog?

⁷Koj yeej paub has tas, kuv tsi muaj txim, hab tsi muaj leejtwg cawm kuas kuv dlim ntawm koj.

⁸Koj txhais teg tsim hab puab kuv, hab nwgnuav los yog koj ob txhais teg rhuav kuv.

⁹Ncu ntsoov has tas koj muab aav nplaum puab kuv; koj yuav muab kuv tsoo kuas rov ua moov aav los?

¹⁰Koj pub kuv txiv tsim muaj kuv; koj ca kuv luj hlub huv kuv nam plaab.

¹¹Koj tsim kuv lub cev muaj pobtxhaa hab leeg, hab kuas muaj nqaj muaj tawv qhwv tej pobtxhaa.

¹²Koj pub kuv muaj sa hab muaj kev hlub tsi tu, hab koj tsomkwm kuas kuv muaj sa nyob.

¹³Tabsis nwgnuav kuv paub has tas koj nyaag nrhw ua rua kuv raug mob txhua lub sijhawm.

¹⁴Koj tog ntsoov saib kuv puas ua txhum, ces koj yuav tsi zaam txim rua kuv.

¹⁵Thaus twg kuv ua txhum, ces txawm tsi hum koj sab ntaag, tabsis yog kuv ua ncaaj, koj yeej tsi qhuas kuv le. Kuv txaajmuag kawg, tsaa tsi taug taubhau le.

¹⁶Kuv lub neej nyavnyuas chiv zoo xwb, koj txawm siv txu kuv lub neej ib yaam le tsuv ntxhuav caum tsaj tum; hab koj tseem ua tej txujci tawmtsaam kuv.

¹⁷Koj ibtxwm muaj timkhawv kom kuv; koj txujkev chim fuam luj zuj zug tuaj tawmtsaam kuv; koj ibtxwm nrhav lub tswvyim tshab tawmtsaam kuv.

¹⁸Vaajtswv, vim le caag koj txhaj le ca kuv yug lug? Tsimnyog koj ca kuv tuag ua ntej thaus tsi tau muaj leejtwg pum kuv.

¹⁹Yog kuv ncaaj nraim huv kuv nam plaab moog rua huv qhov ntxaa, mas yuav zoo ib yaam le kws kuv tsi tau yug lug.

²⁰Puas yog kuv lub neej tub yuav dlua? tsi xob thaab kuv! Ca kuv muaj kev zoo sab thaus kuv tseem tshuav sijhawm.

²¹Kuv tub yuav moog sai sai nuav, hab yuav tsi rov qaab lug le lawm, yuav moog rua huv lub tebchaws kws tsaus ntuj dlub ncab,

²²yog lub tebchaws kws muaj dluab tsaus nti, txawm yog qhov kaaj los zoo le qhov tsaus ntuj.