Read Hmong Njua Yauj 11 Bible Online

Yauj 11 - Hmong Njua bible

Yauj 11

¹Xaufas kws yog tuabneeg Namas teb has tas, “Txawm tsi muaj leejtwg teb tej lug kws tsi muaj qaabhau nuav le? Tug tuabneeg kws has lug ntau puas yog tuabneeg ncaaj nceeg?

³Yauj, koj xaav has tas peb teb tsi tau koj tej lug nua los? Koj tej lug txobthuam yuav ua rua peb nyob tuabywv nua los?

⁴Koj khaav has tas, koj has lug tseeb; koj khaav has tas koj dlawbhuv taabmeeg Vaajtswv.

⁵Kuv xaav kuas Vaajtswv teb koj tej lug!

⁶Nwg yuav qha ntau lub tswvyim rua koj; muaj ntau yaam kev txawj ntse kws tuabneeg tsi paub. Vaajtswv rau txim rua koj sib tshaaj qhov kws koj tsimnyog raug.

⁷“Koj puas paub txug Vaajtswv lub peevxwm, koj puas paub Vaajtswv lub fwjchim kws luj kawg nkaus?

⁸Sau nruab ntug yeej tsi muaj nrim rua Vaajtswv, tabsis koj qhovmuag pum tsi taag. Vaajtswv paub tubtuag teb huv tuabsi, tabsis koj tsi paub.

⁹Vaajtswv lub fwjchim luj tshaaj lub nplajteb hab dlaav dlua havtxwv.

¹⁰Yog Vaajtswv kom koj hab coj koj moog rua huv tsev tu plaub, leejtwg yuav cheem tau nwg?

¹¹Vaajtswv paub tej tuabneeg kws tsi muaj nqes; Vaajtswv pum tuabneeg tej kev phem kev qas.

¹²Thaus twg tug neeg luav qus yug tau lug ua tuabneeg, mas tug tuabneeg ruag txhaj yuav txawj ntse.

¹³“Yauj, koj ca le ua sab ncaaj, koj txhaj le moog cuag tau Vaajtswv.

¹⁴Tshem tej kev phem kev qas hab kev txhum tawm huv koj lub tsev moog.

¹⁵Koj txhaj muaj ntsejmuag fim tuabneeg nplajteb, hab nyob tso sab lug tsi ntshai leejtwg.

¹⁶Koj yuav tsi ncu qaab txug koj tej kev nyuaj sab, koj tej kev nyuaj sab yuav dlhau moog ib yaam le dlej ndlwg, koj yuav ncu tsi txug le lawm.

¹⁷Koj lub neej yuav ci tshaaj lub nub ci thaus taav su, hab koj lub neej kws tsaus ntuj nti yuav kaaj nrig ib yaam le thaus sawv ntxuv.

¹⁸Koj yuav ua lub neej nyob kaaj sab lug, hab muaj kev ca sab; Vaajtswv yuav tsomkwm koj hab pub kuas koj tau su.

¹⁹Koj yuav tsi ntshai koj tej yeebncuab; tuabneeg coob leej yuav tuaj thov koj paab.

²⁰Tabsis cov tuabneeg sab phem, yuav saib ncig leeg tsi muaj chaw ca sab hab puab yuav nrhav tsi tau kev tsiv dlim le. Puab txujkev ca sab tsuas yog txujkev tuag xwb.”