Read Hmong Njua Yauj 12 Bible Online

Yauj 12 - Hmong Njua bible

Yauj 12

¹Yauj teb has tas, “Koj yog cov tuabneeg ntawd ntaag. Thaus koj tuag, koj tej kev txawj ntse yuav tuag nrug koj moog.

³Tabsis kuv kuj muaj kev txawj ntse ib yaam le koj hab; kuv yeej tsi ntshai hab tsi swb koj le; txhua tug puavleej paub tej kws koj has ntawd.

⁴Txawm yog kuv tej phoojywg los naj nub luag kuv plig, txawm yog kuv yeej ncaaj nceeg hab tsi tau ua txhum los puab tseem luag kuv; tabsis kuv paub has tas, muaj ib nub Vaajtswv yuav teb kuv tej lug thov.

⁵Koj tsi muaj kev nyuaj sab dlaabtsi, ces koj txawm yuav tuaj muab kuv tso dlaaj tso luag; koj ua le ntawd, yog koj ntaus ib tug txivneej kws tub yuav qaug.

⁶Tabsis cov tuabneeg tubsaab hab tsi fwm Vaajtswv nyob kaaj sab lug, puab tug vaajtswv ces yog puab tug zug xwb.

⁷“Tabsis koj ca le moog nug tej tsaj lossis tej noog, puab yuav qha koj;

⁸ca le moog thov tej tsaj nruab nqhuab hab tej tsaj nruab dleg qha kev txawj ntse rua koj.

⁹Txawm yog tej tsaj los tub paub has tas Vaajtswv yog tug tsim puab.

¹⁰Vaajtswv yog tug tswj tuabneeg hab tej tsaj txujsa; Vaajtswv lub fwjchim tuav txhua tug tuabneeg txujsa.

¹¹Ib yaam le koj lub qhovntsej nyam noog luas tej lug, hab koj tug nplaig nyam saaj tej zaub mov.

¹²“Tej tuabneeg laug muaj tswvyim, tabsis Vaajtswv muaj tswvyim hab muaj fwjchim huv tuabsi; tej tuabneeg laug muaj kev txawj ntse, tabsis Vaajtswv muaj kev txawj hab muaj fwjchim ua tau num tav.

¹⁴Yog Vaajtswv muab rhuav lawm, leejtwg yuav txhim khu dlua; hab leejtwg muaj cuabkaav tso tau tug tuabneeg kws Vaajtswv muab kaw?

¹⁵Yog Vaajtswv tsi tso naag lug, ces yuav muaj ntuj qhua teb nkig; yog Vaajtswv tso naag lug, ces muaj dlej nyaab.

¹⁶“Vaajtswv yog tug muaj zug hab nwg ibtxwm muaj yeej; tug tuabneeg dlaag ntxag hab tug kws raug luas dlaag ntxag puavleej yog Vaajtswv kaav.

¹⁷Nwg rhuav cov numtswv tej kev txawj ntse, hab ua rua cov thawjcoj kuas puab ua ib yaam le tej tuabneeg ruag.

¹⁸Nwg txu tau tej vaajntxwv hab coj puab moog kaw rua huv tsev lojcuj,

¹⁹nwg txu tau cov povthawj hab tej tuabneeg muaj fwjchim kuas poob fwjchim.

²⁰Nwg kaw cov tuavxaam kws luas ca sab rua, lub qhovncauj, hab muab cov tuabneeg laug tej kev txawj ntse tshem moog.

²¹Nwg rhuav cov tuabneeg muaj fwjchim kuas poob ntsejmuag hab ua rua tej numtswv tug zug ntaug.

²²Nwg ua qhov kaaj ci pum kev rua huv tubtuag teb.

²³Nwg ua rua ntau tsaav tuabneeg muaj zug hab muaj fwjchim, tabsis nwg ua rua puab swb hab puamtsuaj.

²⁴Nwg ua rua puab cov thawjcoj ua tuabneeg ruag hab ua rua puab yuam kev moog moog lug lug tsi paub moog qhov twg.

²⁵Puab maub tsaus ntuj nti qaug puj poog ib yaam le tej tuabneeg qaug cawv.”