Read Hmong Njua Yauj 14 Bible Online

Yauj 14 - Hmong Njua bible

Yauj 14

¹“Txhua tug tuabneeg kws yug lug ntawm quaspuj, ua neej nyob tsi ntev hab naj nub muaj kev ntxhuv sab.

²Peb luj hlub hab ntsws sai ib yaam le tej paaj ntoos; peb dlhau moog zuj zug ib yaam le tug dluab ntxoov ntxoo.

³Vaajtswv, koj puas yuav tsaa laaj muag saib kuv, lossis taug kuv zaaj txav txim rua kuv?

⁴Yeej tsi muaj ib yaam huv yuav tawm ntawm qhov kws tsi huv le tuabneeg lug.

⁵Tuabneeg lub noobnyoog ua neej nyob koj tub teem tseg, hab koj paub has tas puab yuav nyob pistsawg hli. Lub sijhawm kws koj teem tseg yeej tsi muaj leejtwg hloov tau le.

⁶Koj ca le tig rua ib qho hab tso nwg tseg; ca nwg tau su zoo sab ib yaam le tug tub zug kws ua num nyaav.

⁷“Tseem muaj kev ca sab rua tug ntoo kws luas muab ntuv lawm; nwg lub hauvpaug tseem caj hab hlaav taug kaug tuaj.

⁸Txawm yog nwg tej caag laug hab lub hauvpaug qhuav rua sau npoo aav lawm

⁹los thaus muaj dlej ntub nwg yuav hlaav kaug tuaj ib yaam le tsob ntoo mog.

¹⁰Tabsis thaus tuabneeg tuag lawm, ces nwg txujsa kawg rua nub ntawd; thaus tuabneeg tuag, nwg moog nyob qhov twg lawm?

¹¹“Dlej tu tsi ndlwg hab paag dlej qhuav zoo le caag,

¹²ces tuabneeg tuag tsi sawv rov lug ib yaam le ntawd. Thaus lub ntuj tseem muaj nyob, puab yuav tsi sawv rov qaab lug; puab yuav tsi tsim ntawm qhov chaw kws puab pw.

¹³“Kuv xaav kuas koj muab kuv coj moog zais rua huv tubtuag teb; ca kuv nraim huv moog txug thaus koj txujkev chim dlua tsaiv, hab thov koj teem ib lub caij ncu txug kuv.

¹⁴Yog tuabneeg tuag lawm, nwg puas yuav rov muaj sa? Tabsis kuv yuav naj nub tog txug lub sijhawm kws koj tso kuv dlim tej kev nyuaj sab.

¹⁵Thaus ntawd koj yuav hu kuv hab kuv yuav teb koj, hab koj yuav txaus sab rua tug kws koj tsim.

¹⁶Koj yuav saib ntsoov kuv rhais txhua kaujruam, tabsis koj yuav tsi suav kuv tej kev txhum lawm.

¹⁷Koj yuav zaam kuv tej kev txhum hab muab tshem moog povtseg; txhua yaam kev txhum kws kuv tau ua, koj yuav muab ntxuav huv tuabsi moog.

¹⁸“Yuav muaj ib lub sijhawm kws tej hauv roob yuav nphau taag, hab tej roob tsuas los yuav raug tshem tawm ntawm nwg qhov chaw moog.

¹⁹Dlej yuav tshoob tej pobzeb hab tuamtsaam naag yuav kuav tej moov aav moog taag; yog le ntawd, koj txhaj rhuav tuabneeg tej kev ca sab kws ua neej nyob.

²⁰Koj muaj zug tshaaj tuabneeg, hab muab puab tshem tawm moog ibtxhis; puab tuag, puab lub ntsejmuag txawv hlo.

²¹Txawm yog nwg tej tub tau ntsej tau muag los nwg tsi paub, hab yog puab poob ntsej poob muag los puab qha tsi tau rua nwg.

²²Nwg tsuas nov nwg ib ce mob lwj ntsuav, hab nwg quaj ntsuag rua nwg tej kev nyuaj sab.”