Read Hmong Njua Yauj 16 Bible Online

Yauj 16 - Hmong Njua bible

Yauj 16

¹Yauj teb has tas, “Kuv yeej tau nov luas has tej ko lug lawm; mej tej lug nplig ua rua kuv ntxhuv sab xwb.

³Mej tej lug kws tsi muaj qaabhau ko has tsi paub taag le los? Mej yuav has kuas moog txug thaus kawg los?

⁴Yog has tas mej yog kuv, hab kuv yog mej, kuv yeej has tau txhua yaam le mej has hab. Kuv yuav cu taubhau hab has tau tej lug tuam mom mej ib yaam nkaus.

⁵Kuv muaj cuabkaav paab tau mej, txhawb mej tug zug hab nplig tau mej sab.

⁶“Txawm yog kuv has lug los tsi paab dlaabtsi, hab yog kuv ua tuabywv los kuv tug mob tsi ntaug.

⁷Vaajtswv, koj ua rua kuv lub cev mob lwj quas ntsuav; koj ca kuv tsev tuabneeg raug tua tuag taag.

⁸Koj muab kuv khi hab koj yog kuv tug yeebncuab. Kuv tshuav tawv hab pobtxhaa lawm xwb, hab luas muab tej ntawd ua timtseeb has tas kuv ua txhum.

⁹“Vaajtswv chim, nwg txhaj muab kuv dlua ua tej dlaim; nwg ntxub kuv hab saib qhovmuag qauj leg rua kuv.

¹⁰Tej tuabneeg tuaj nyob puagncig kuv, puab has lug saib tsi taug kuv, hab xuas tawg ncuav rua kuv lub plhu.

¹¹Vaajtswv muab kuv cob rua cov tuabneeg ua phem ua qas.

¹²Kuv yeej ua neej nyob kaaj sab lug, tabsis Vaajtswv tsawv nkaus kuv cejdlaab caab, nwg nplawm kuv hab tsuj kuv ntsoog taag. Vaajtswv muab kuv ua dlaim phaj rua nwg sim,

¹³hab tua xub neevnti txhua phaab tuaj rua kuv, tej xub ntawd tuaj raug kuv ua rua kuv nqaj to; txawm le ntawd los nwg tsi hlub kuv le.

¹⁴Nwg ua rua kuv raug mob ua ntu zug; nwg tawmtsaam kuv ib yaam le tug tubrog.

¹⁵“Kuv quaj ntsuag hab muab ntaub tsaaj lug xaws ua rig tsho naav, kuv txu fwjchim hab nyob huv aav.

¹⁶Kuv quaj ceb muag taag, kuv ob lub qhovmuag o lab ploog.

¹⁷Tabsis kuv tsi tau ua txhum dlaabtsi hab kuv muaj lub sab dlawb paug thov Vaajtswv.

¹⁸“Lub nplajteb, tsi xob muab kuv tej kev txhum npug ca! Tsi xob ca kuv lub suab thov kev ncaaj nceeg ntsag.

¹⁹Muaj ib tug nyob sau ntuj npaaj rawv tuaj kuv tog paab kuv.

²⁰Kuv tej phoojywg txobthuam kuv; kuv quaj kua muag ndlwg lawg rua Vaajtswv.

²¹Kuv xaav kuas muaj ib tug paab kuv moog thov Vaajtswv, ib yaam le tug tuabneeg kws moog thov nwg tug phoojywg.

²²Tshuav tsi muaj pistsawg xyoo lawm, kuv yuav tau taug txujkev kws moog tsi muaj nub rov lug.