Read Hmong Njua Yauj 2 Bible Online

Yauj 2 - Hmong Njua bible

Yauj 2

¹Muaj ib nub cov timtswv ceebtsheej tuaj cuag tug TSWV dlua, Ntxwgnyoog kuj tuaj nrug puab nyob ntawd hab.

²Tug TSWV nug Ntxwgnyoog has tas, “Koj moog dlaabtsi lug?” Ntxwgnyoog teb has tas, “Kuv moog ncig ntuj ncig teb lug xwb.”

³Tug TSWV nug has tas, “Koj puas pum Yauj kws yog kuv tug tubkhai? Tej tuabneeg kws nyob huv nplajteb tsi muaj ib tug ua zoo hab muab sab npuab kuv npaum le nwg. Nwg fwm kuv hab tsi ua kev phem kev qas le. Tub tsi muaj qaabhau dlaabtsi los koj thov kuv ca koj moog tawmtsaam Yauj, tabsis nwg tseem muab sab npuab kuv ib yaam le nwg ibtxwm ua.”

⁴Ntxwgnyoog teb has tas, “Tuabneeg yeem tso txhua yaam tseg, kuas nwg tau txujsa xwb.

⁵Tabsis nwgnuav yog koj ua rua nwg lub cev muaj mob, nwg yeej yuav tshev nkaug nteg nkuav rua koj ntaag!”

⁶Yog le ntawd, tug TSWV has rua Ntxwgnyoog has tas, “Koj yuav ua le caag rua nwg los tau, tabsis koj tsi xob txuv nwg txujsa.”

⁷Ntxwgnyoog txawm ncaim ntawm tug TSWV moog hab ua rua Yauj mob ua paug mag thoob plawg ib ce.

⁸Yauj moog nyob ntawm cub tshau hab muab ib dlaim txhais laujkaub aav lug kuam nwg tej qhov txhaab.

⁹Yauj tug quaspuj has rua Yauj has tas, “Koj tseem muab sab npuab koj tug Vaajtswv le kws koj ibtxwm ua hab los? Ua le caag koj tsi tshev koj tug Vaajtswv hab tuag moog?”

¹⁰Yauj teb has tas, “Ua le caag koj has lug le tug quaspuj kws tsi paub qaabhau! Thaus Vaajtswv pub tej kws zoo rua peb, peb tub zoo sab hlo yuav, tabsis thaus Vaajtswv ca peb raug kev txomnyem, peb txawm tsua yuav ywg nua los?” Txawm yog Yauj raug kev txomnyem npaum le ntawd los nwg tsi tawmtsaam Vaajtswv le.

¹¹Thaus Yauj peb tug phoojywg, Elifas kws yog tuabneeg Temas, Npiledas kws yog tuabneeg Suhas, hab Xaufas kws yog tuabneeg Namas nov has tas, Yauj mob txomnyem kawg le, puab txawm tuaj nplig Yauj sab.

¹²Thaus puab tuaj dleb pum Yauj, puab tsi paub nwg lawm. Thaus puab paub has tas yog Yauj tag, puab txawm tsaa suab hlo quaj, dlua puab tej tsho, tsuab moov aav rua sau puab taubhau hab w rua sau nruab ntug.

¹³Puab tuaj nrug Yauj nyob huv aav le ntawd tau xyaa nub xyaa mo tsi has ib lu lug le, rua qhov puab pum Yauj txomnyem heev.