Read Hmong Njua Yauj 20 Bible Online

Yauj 20 - Hmong Njua bible

Yauj 20

¹Xaufas kws yog tuabneeg Namas teb has tas, “Yauj, koj ua rua kuv npautawg heev, kuv tog tsi taug yuav rawm teb koj.

³Tej kws koj has ntawd yog ib lu lug txobthuam saib tsi taug kuv, tabsis kuv paub has tas kuv yuav teb koj le caag.

⁴“Koj yeej paub has tas, tam thaus u zoo le caag, txij thaus muaj tuabneeg nyob huv lub nplajteb nuav,

⁵yeej tsi muaj ib tug tuabneeg sab phem yuav ua neej nyob ntev le.

⁶Txawm yog nwg txujkev khaavtheeb yuav sab moog nto ntuj, hab nwg lub taubhau yuav sab moog txug sau cov fuab

⁷los nwg yuav raug tshuab yaa moog ib yaam le tej moov aav. Cov tuabneeg kws ibtxwm paub nwg, yuav xaav tsi thoob has tas, sov nwg moog rua qhov twg lawm.

⁸Nwg yuav yaaj ntshis moog ib yaam le zaaj npau suav, lossis zaaj ywgtoog kws pluj moog tsi pum ntxiv le lawm.

⁹Nwg yuav pluj ndlais ntawm qhov chaw kws nwg ibtxwm nyob;

¹⁰nwg tej tub yuav xaa tej kws nwg nyag ntawm cov tuabneeg pluag lug rov qaab.

¹¹Nwg lub cev tseem hluas, tabsis tsi ntev yuav moog ua aav.

¹²“Kev phem kev qas qaab heev, nwg txhaj muab ibtxha npuav rua huv qhovncauj kuas nwg zoo sab.

¹⁴Tabsis tej zaub mov huv nwg plaab ab heev, ab ib yaam le tej tshuaj muaj taug.

¹⁵Tug tuabneeg sab phem yuav ntuav tej kev npluanuj kws nwg nyag luas tug lug tawm; Vaajtswv yuav muab tej kws nwg ntuav tawm lug, xaa rov qaab huv tuabsi.

¹⁶Tej kws cov tuabneeg sab phem nqog, zoo ib yaam le tej tshuaj muaj taug; tej ntawd yuav lom nwg tuag ib yaam le tug naab muaj taug tum.

¹⁷Nwg yuav tsi tau pum tug dlej cag kws muaj kua mig hab zib ntaab.

¹⁸Nwg yuav tso txhua yaam kws nwg khwv tau lug tseg; nwg yuav tsi muaj kev zoo sab rua tej paajlaum kws nwg tau,

¹⁹rua qhov nwg tsimtxom hab tsi quavntsej cov tuabneeg txomnyem; hab txhaav luas tej tsev kws ua tau lawm yuav.

²⁰Nwg txujkev ua tuabneeg sab hlub, tsi paub txaus le.

²¹Thaus nwg noj, nwg tsi tseg ib yaam dlaabtsi seem le, tabsis nwgnuav nwg txujkev npluanuj tub xaus lawm.

²²Thaus nwg muaj txaus lawm, kev pemsij yuav lug raug nwg.

²³“Ca nwg noj kuas txaus lawv le nwg lub sab! Vaajtswv txujkev chim kws nruj tsiv yuav rau txim rua nwg.

²⁴Txawm yog nwg tsiv dlim raab ntaaj hlau los xibxub tooj yuav chob nwg.

²⁵Xibxub yuav chob nwg lub cev tshaab plawg; lub hauv xub kws ntse yuav ua rua nwg ntshaav nrug, hab kev txhawj ntshai yuav lug raug nwg ua rua nwg lub sab tshee nyo.

²⁶Txhua yaam kws nwg khaws tseg raug puamtsuaj taag; cov nplaim tawg kws tsi yog tuabneeg txhais teg hlawv, yuav kub nwg hab nwg tsev tuabneeg huv tuabsi.

²⁷Lub ntuj qha tug tuabneeg nuav tej kev txhum hab lub nplajteb ua timkhawv tawmtsaam nwg.

²⁸Vaajtswv txujkev chim yuav phwj tuaj ua rua tug tuabneeg ntawd txujkev npluanuj puamtsuaj taag.

²⁹“Tej nuav yog tej kws cov tuabneeg sab phem tau, hab yog tej kws Vaajtswv npaaj tseg rua puab.”