Read Hmong Njua Yauj 21 Bible Online

Yauj 21 - Hmong Njua bible

Yauj 21

¹Yauj has tas, “Ca le noog kuv tej lug; yog mej noog kuv has txhaj nplig tau kuv sab.

³Ca sijhawm rua kuv has kuv tej lug, thaus kuv has taag lawd, mej xaav txobthuam le caag los tau.

⁴“Kuv tsi yog nrug tuabneeg sis caav; yog le ntawd, kuv txhaj ua tsi taug sab ntev.

⁵Mej ca le saib kuv, mej yuav xaav tsi thoob hab tsi paub has le caag.

⁶Thaus kuv xaav txug tej xwmtxheej kws lug raug kuv, kuv ib ce tuag taag, kuv ntshai hab tshee kawg le.

⁷“Ua le caag Vaajtswv ca cov tuabneeg sab phem muaj sa nyob, pub puab vaammeej hab ua neej nyob laug nkoog?

⁸Puab muaj tub muaj ki, muaj xeebntxwv, hab tseem pum puab tej tubki luj hlub.

⁹Vaajtswv tsi tso kev puamtsuaj lug raug puab tej vaaj tse; puab lub neej tsi tau raug kev txhawj ntshai ib zag le.

¹⁰Puab tej nyuj muaj mivnyuas zoo, hab tsi muaj ib tug mooj le.

¹¹Puab tej mivnyuas dlha ua si, ib yaam le tej mivnyuas yaaj,

¹²hab seev cev nrug tej suab raaj suab xyu.

¹³Thaus puab ua neej nyob, puab nyob kaaj sab lug, hab thaus puab tuag, puab tsi tuag txomnyem ntsuav.

¹⁴“Cov tuabneeg sab phem kuas Vaajtswv tsi xob thaab puab; puab tsi nyam ua puab lub neej lawv le Vaajtswv lub sab nyam.

¹⁵Puab xaav has tas txawm yog yuav pehawm Vaajtswv lossis thov Vaajtswv los yeej tsi muaj qaabhau dlaabtsi.

¹⁶Puab khaav has tas, qhov kws puab ua tau yog puab tug zug, tabsis kuv tsi yuav tej kws puab has ntawd.

¹⁷“Tug tuabneeg sab phem lub teeb puas txawj tuag? Cov tuabneeg ntawd puas muaj ib tug tsi raug kev puamtsuaj le? Vaajtswv puas tau chim hab rau txim rua cov tuabneeg sab phem,

¹⁸hab muab puab tshuab yaa ib yaam le cua ntsawj tej quavnyaab, lossis ib yaam le cua dlaaj cua dlub ntsawj tej moov aav yaa?

¹⁹“Mej has tas Vaajtswv rau txim rua tej mivnyuas, vim leej txiv tej kev txhum. Tsi yog le ntawd! Vaajtswv tsuas rau txim rua cov kws ua txhum xwb; qhov kws Vaajtswv ua le ntawd, yog nwg qha has tas vim puab tej kev txhum.

²⁰Ca cov tuabneeg txhum ris puab lub txim vim puab tej kev txhum; Ca puab haus Vaajtswv tug kws muaj fwjchim luj kawg nkaus txujkev chim.

²¹Thaus ib tug tuabneeg twg tuag lawm, nwg puas txhawj txug nwg tej mivnyuas saib puas nrug luas ua neej zoo?

²²Tuabneeg puas muaj peevxwm qha Vaajtswv, leejtwg yog tug txav txim rua cov kws nyob sab tshaaj plawg?

²³“Muaj ibtxha tuabneeg noj qaab nyob zoo moog txug nub kws puab taag simneej; thaus puab lub cev tseem muaj zug khov kho, puab tuag kaaj sab lug hab tsi mob txomnyem ntsuav.

²⁵Muaj ibtxha tuabneeg tsi muaj kev tau zoo hlo le; puab ua neej lwj sab hab tuag txomnyem ntsuav.

²⁶Tabsis txhua tug puavleej tuag, luas yuav muab log, hab kaas yuav noj puab txhua tug ib yaam nkaus.

²⁷“Kuv paub tej kws mej xaav hab lub tswvyim kws mej xaav ua phem rua kuv.

²⁸Mej nug has tas, ‘Nwgnuav tug numtswv luj kws yog tuabneeg ua phem ua qas lub tsev nyob qhov twg lawd?’

²⁹Mej puas tau nrug cov tuabneeg kws moog tshaam tebchaws thaam? Mej puas paub tej kws puab coj rov lug pav rua suavdlawg?

³⁰Nub kws Vaajtswv chim hab rau txim, tsuas yog cov tuabneeg sab phem txhaj seem xwb.

³¹Tsi muaj leejtwg yuav kom tug tuabneeg sab phem, lossis ua pauj rua nwg tej kws nwg tau ua lug lawm.

³²Thaus luas kwv nwg moog rua tom qhov ntxaa, muaj tuabneeg zuv nwg lub ntxaa,

³³muaj tuabneeg quas txheeb quas pua vaam leej tuaj hlub tshua nwg; hab tej aav los npug nwg lub cev zoo kawg le.

³⁴“Tej lug kws mej tuaj nplig kuv tsi muaj qaabhau le! Tej lug kws mej teb kuv yog lug dlaag xwb!”