Read Hmong Njua Yauj 22 Bible Online

Yauj 22 - Hmong Njua bible

Yauj 22

¹Elifas kws yog tuabneeg Temas has tas, “Tuabneeg muaj nqes dlaabtsi rua Vaajtswv? Txawm yog tej tuabneeg txawj ntse los puas muaj qaabhau rua Vaajtswv?

³Qhov kws koj ua ncaaj puas hum Vaajtswv sab, lossis yog koj ua tuabneeg zoo puas paab tau Vaajtswv?

⁴Tsi yog vim koj fwm Vaajtswv, Vaajtswv txhaj nplawm hab rau txim rua koj los?

⁵Tsi yog le ntawd, tub yog vim koj ua kev txhum hab ua kev phem kev qas ntau heev.

⁶Koj yuam kuas koj tug kwvtij them tej nqe kws nwg tshuav koj rov qaab, koj ca le moog sau nwg tej tsoog tsho lug hab ca nwg nyob labqaab.

⁷Koj tsi pub dlej rua cov kws nqhes dlej haus, hab tsi pub mov rua cov kws tshaib plaab noj.

⁸Koj siv koj lub fwjchim hab lub meejmom hom taagnrho lub tebchaws ua koj tug.

⁹Tsi yog koj tsi paab cov puj ntsuag xwb, tabsis koj tseem moog fuab tej mivnyuas ntsuag tug hab tsimtxom puab.

¹⁰Yog le ntawd, luas txhaj cuab hlua puagncig koj, hab tsi nwm kev txhawj ntshai tuaj voob nkaus koj,

¹¹lossis tsaus ntuj nti ua rua koj tsi pum kev, hab dlej nyaab tuaj npug nkaus koj.

¹²“Puas yog Vaajtswv nyob sab heev sau ntuj? Txawm yog tej nubqub nyob sab heev los Vaajtswv tseem tuaj sau saib tej nubqub ntawd.

¹³Yog le caag koj nug has tas, ‘Vaajtswv tsi paub dlaabtsi? Muaj fuab thaiv Vaajtswv lawm, nwg yuav ua le caag txav txim tau rua peb?’

¹⁴Koj xaav has tas, thaus Vaajtswv moog kev sau nruab ntug, nwg pum tsi tshaab tej tauv fuab tuab tuab tuaj rua peb.

¹⁵“Koj txav txim sab taug txuj qub ke kws tej tuabneeg sab phem ibtxwm taug lawm los?

¹⁶Txawm yog tsi tau txug puab lub sijhawm los dlej tub muab puab kuav moog taag lawm.

¹⁷Cov tuabneeg ntawd yog cov kws tso Vaajtswv tseg, hab ntseeg has tas Vaajtswv ua tsi tau le caag rua puab.

¹⁸Tabsis tub yog Vaajtswv ua rua puab vaammeej ntaag, kuv tsi totaub cov tuabneeg sab phem tej kev xaav le.

¹⁹Cov tuabneeg ua zoo hab cov tuabneeg ncaaj nceeg yuav zoo sab hab luag thaus puab pum cov tuabneeg sab phem raug txim.

²⁰Tej kws cov tuabneeg sab phem tau yog kev puamtsuaj xwb, hab suavtawg yuav kub tej kws seem kuas taag dlu lug.

²¹“Yauj, nwgnuav koj ca le nrug Vaajtswv sis raug zoo hab tsi xob ua rua nwg ib yaam le nwg yog yeebncuab; yog koj ua le kuv has, nwg yuav foom koob moov rua koj.

²²Ca le leeg yuav nwg tej lug qhuab ntuag; koj ca le khaws nwg tej lug rua nruab sab.

²³Qhov tseemceeb koj yuavtsum txu fwjchim tig lug cuag Vaajtswv hab tshem tej kev phem kev qas huv koj lub tsev moog kuas dleb.

²⁴Ca le muab koj tej kub coj moog povtseg; hab muab koj tej tseem kub coj moog pov rua huv kwj haa qhuav.

²⁵Ca Vaajtswv tug kws muaj fwjchim luj kawg nkaus hloov koj tej kub chaw, hab ca nwg yog koj tej nyaj kws teeb tej pawg.

²⁶Ces koj txhaj ca sab ntsoov rua Vaajtswv, hab koj yuav paub has tas nwg yog koj txujkev zoo sab.

²⁷Thaus koj thov Vaajtswv, nwg yuav noog koj tej lug thov, hab koj yuav ua kuas tav lawv le koj tej lug cog tseg.

²⁸Txhua yaam kws koj ua txhaj yuav tav, hab koj txuj hauv kev yuav tshaav ntuj lug.

²⁹Vaajtswv yuav txu tug kws khaavtheeb hab paab tug kws txu fwjchim.

³⁰Yog koj yeej yog tuabneeg ncaaj nceeg hab ua koj teg num ncaaj nwg yuav cawm koj.”