Read Hmong Njua Yauj 23 Bible Online

Yauj 23 - Hmong Njua bible

Yauj 23

¹Yauj teb has tas, “Kuv tseem yuav caam hab ywg Vaajtswv; kuv nyaj tsi taug lawm, kuv txhaj quaj hab ntsaaj ua luaj.

³Kuv xaav paub saib nwg nyob qhov twg, kuas kuv txhaj paub moog txug ntawm nwg qhov chaw nyob.

⁴Kuv yuav pav kuv zaaj taabmeeg nwg hab has txhua yaam dlaws kuv zaaj.

⁵Kuv xaav paub saib nwg yuav has le caag, hab nwg yuav teb kuv tej lug le caag.

⁶Vaajtswv yuav siv taagnrho nwg tug zug tawmtsaam kuv los? Tsi yog le ntawd, nwg yeej yuav noog kuv tej lug.

⁷Kuv yog tuabneeg ncaaj; kuv yeej muaj cuabkaav has kuv zaaj taabmeeg Vaajtswv; tug kws txav txim rua kuv, nwg yuav tso kuv dlim moog ibtxhis.

⁸“Kuv moog nrhav saab nubtuaj, tabsis Vaajtswv tsi nyob ntawd; kuv moog nrhav rua saab nubpoob, tabsis tsi pum nwg.

⁹Vaajtswv yeej ua num rua saab qaumteb hab saab qaabteb, tabsis kuv nrhav tsi pum nwg le.

¹⁰Vaajtswv yeej paub txhua kaujruam kws kuv moog yog nwg sim kuv, nwg yuav pum has tas kuv tsi muaj txhum.

¹¹Kuv taug ncaaj nraim txujkev kws nwg xaiv rua kuv, kuv tsi ncaim moog saab twg le.

¹²Kuv ibtxwm ua lawv le Vaajtswv tej lug saamfwm; kuv ua lawv le nwg sab nyam, kuv tsi ua lawv le kuv lub sab xaav.

¹³“Vaajtswv yeej tsi hloov sab le. Tsi muaj leejtwg yuav tawmtsaam tau nwg lossis txwv tau nwg kuas tsi xob ua tej kws nwg yuav ua.

¹⁴Tej kws nwg npaaj rua kuv lawd, nwg yuav ua kuas tav; qhov nuav tsuas yog ib yaam ntawm tej kws nwg npaaj xwb.

¹⁵Kuv ntshai ua ib ce tshee nyo taabmeeg nwg.

¹⁶Vaajtswv tug kws muaj fwjchim luj kawg nkaus, ua rua kuv tug zug ntaug taag. Txawm yog qhov tsaus ntuj ua rua kuv tsi pum kev los tsi yog qhov tsaus ntuj ua rua kuv ntshai, tabsis yog Vaajtswv ua, tsi yog qhov tsaus ntuj ua.