Read Hmong Njua Yauj 27 Bible Online

Yauj 27 - Hmong Njua bible

Yauj 27

¹Yauj teb has tas, “Kuv twv ntxhas ntawm Vaajtswv tug kws muaj fwjchim luj hab muaj sa nyob kws tsi pum kuv txujkev ncaaj nceeg hab ua rua kuv lub neej txomnyem ntsuav has tas,

³yog thaus kws Vaajtswv tseem pub kuv muaj txujsa nyob,

⁴kuv lub qhovncauj yuav tsi has ib lu lug phem hab kuv tug nplaig yuav tsi has ib lu lug dlaag le.

⁵Kuv yuav tsi leeg has tas, mej has yog; kuv yuav has tas kuv tsi yog tuabneeg txhum txug nub kuv tuag.

⁶Kuv yuav tuav rawv txujkev ncaaj nceeg tsi tso tseg le; kuv lub sab yeej paub meej le ntawd.

⁷“Thov kuas txhua tug kws tsi tuaj kuv tog hab tawmtsaam kuv raug txav txim ib yaam le cov tuabneeg sab phem hab tsi ncaaj.

⁸Cov tuabneeg kws tsi fwm Vaajtswv puas muaj kev ca sab thaus Vaajtswv txav txim rua puab?

⁹Thaus puab muaj kev nyuaj sab, Vaajtswv puas yuav nov puab tej lug thov?

¹⁰Tsimnyog puab txaus sab rua Vaajtswv hab thov Vaajtswv txhua lub sijhawm.

¹¹“Ca kuv qha Vaajtswv lub fwjchim hab pav Vaajtswv tug kws muaj fwjchim luj kawg nkaus teg num rua mej paub.

¹²Tabsis tsi taag kuv yuav qha mej, rua qhov mej tub pum lawm; yog le caag mej pheej has tej lug kws tsi muaj qaabhau?”

¹³“Tej nuav yog Vaajtswv tug muaj fwjchim luj kawg nkaus rau txim rua cov tuabneeg sab phem hab ua nruj ua tsiv.

¹⁴Txawm yog puab muaj tubki coob los yuav raug nav ntaaj nav rag tua tuag taag rua huv tshaav rog; puab tej mivnyuas yuav tsi muaj noj tsi muaj haus txaus.

¹⁵Cov kws seem yuav raug kaab mob kev nkeeg tuag taag, hab puab cov puj ntsuag tsi quaj nyav puab tej tuabneeg tuag.

¹⁶Cov tuabneeg sab phem yuav muaj nyaj ntau suav tsi txheeb, hab muaj tsoog tsho ntau naav tsi taag;

¹⁷Tabsis tsuas yog qee leej tuabneeg sab zoo yuav tau tej tsoog tsho ntawd naav, hab qee leej tuabneeg ncaaj nceeg yuav tau tej nyaj ntawd siv.

¹⁸Cov tuabneeg sab phem ua tsev zoo le kaab laug saab tej zeg, lossis zoo ib yaam le tug tubqhe lub tsev kws nwg nyob zuv teb.

¹⁹Thaus puab pw tsaug zug puab tej nyaj txag nyob txhij, tabsis thaus puab sawv lug, puab tej nyaj txag pluj taag lawm.

²⁰Kev txhawj kev ntshai yuav lug raug puab ib yaam le dlej nyaab; mo ntuj cua dlaaj cua dlub yuav ntsawj puab moog taag.

²¹Cov cua saab nubtuaj yuav ntsawj puab tawm huv puab tej tsev moog;

²²Thaus puab nrhav kev tsiv kuas dlim, tej cua ntawd yuav ntsawj puab tsi hlub puab le.

²³Thaus puab tsiv, cua ntsawj nrov nroo ntwg, lub fwjchim kws yog kev puamtsuaj ua rua puab ntshai heev.”