Read Hmong Njua Yauj 28 Bible Online

Yauj 28 - Hmong Njua bible

Yauj 28

¹Muaj ntau thaaj chaw kws luas khawb nyaj; hab muaj ntau lub chaw kws luas nchuav kub.

²Tuabneeg khawb tau hlau huv aav lug, hab muab pobzeb hlawv kuas nchuav tau tooj lab.

³Tuabneeg moog nrhav nyaj hab kub huv qhov tub tub kws tsaus ntuj nti. Puab nrhav huv lub nplajteb nuav qhov kws tub kawg nkaus, hab puab moog khawb tej pobzeb kws nyob huv qhov kws tsaus ntuj nti.

⁴Tuabneeg moog nrhav khawb nyaj khawb kub dleb ntawm tej chaw kws tuabneeg nyob lossis qhov chaw kws tuabneeg tsi tau moog txug dlua le, puab ua num khua sab khuav, dlauv hlua nqeg moog lug huv tej qhov aav.

⁵Qoobloo tuaj huv aav tuaj, tabsis muaj suavtawg kub nyob huv nruab tivtxwv aav.

⁶Tej pobzeb kws nyob huv aav, muaj tej hlaws muaj nqes, hab muaj kub nyob huv tej moov aav.

⁷Tsi muaj ib tug dlaav twg paub txujkev kws moog rua ntawm tej chaw khawb nyaj, hab tej dlaav npoj los tsi tau yaa lug hlaa tej chaw ntawd le.

⁸Tsi muaj tsuv ntxhuav lossis tsaj nyaum taug tej kev kws ntsag tu ntawd le.

⁹Tuabneeg khawb tej pobzeb kws tawv tshaaj plawg, puab khawb taag tej roob sau ncov lug ti huv taw.

¹⁰Thaus puab tho tej roob tsuas tshaab lawm; puab nrhav tau tej pobzeb kws muaj nqes.

¹¹Puab khawb moog tshwm rua huv cov dlej puab muab tej yaam kws nyob nraim quas nkoog rhu tawm lug rua ntawm qhov pum kev.

¹²Tabsis yuav nrhav tswvyim qhov twg txhaj tau? hab yuav kawm kev totaub qhov twg?

¹³Lub tswvyim tsi nyob ntawm tej tuabneeg; hab tsi muaj leejtwg paub lub tswvyim tug nqe.

¹⁴Qhov kws tub tshaaj plawg hab havtxwv has tas, lub tswvyim tsi nyob huv nuav.

¹⁵Txawm yog muab nyaj muab kub yuav los yeej tsi tau lub tswvyim ntawd.

¹⁶Tej tseem kub hab tej saw nyaj saw kub ntaus tsi tau lub tswvyim tug nqe.

¹⁷Lub tswvyim muaj nqes tshaaj kub, tej khob kub lossis khob av pauv tsi tau lub tswvyim.

¹⁸Lub tswvyim muaj nqes dlua tej qai zeb kaulas, qai zeb av hab hlaws.

¹⁹Tej kws tseem kub hab tseem nqai zeb khixaulais los yeej ntaus tsi tau lub tswvyim tug nqe le.

²⁰Lub tswvyim lug qhov twg lug? Hab kev totaub nyob qhov twg?

²¹Txhua yaam kws muaj sa yeej tsi pum lub tswvyim le, txawm yog tej noog kws yaa sau nruab ntug los yeej tsi pum le.

²²Txawm yog kev puamtsuaj hab kev tuag los tsuas nov luas caav txug lub tswvyim xwb.

²³Vaajtswv tuab leeg txhaj paub txujkev kws moog nrhav lub tswvyim, hab paub has tas lub tswvyim nyob qhov twg

²⁴Rua qhov Vaajtswv pum ti nkaus qaab ntuj kawg, hab pum txhua yaam kws nyob sau nruab ntug.

²⁵Thaus Vaajtswv pub rua tej cua muaj fwjchim hab cais kuas havtxwv nyob muaj nrim;

²⁶thaus Vaajtswv txav txim sab tso naag lug, ua fuab tsaus hab tsaglig xub laim rua qhov twg;

²⁷Vaajtswv pum lub tswvyim, nwg saib lub tswvyim yog qhov zoo hab nwg qhuas has tas lub tswvyim zoo kawg nkaus.

²⁸“Vaajtswv has rua tuabneeg tas, Yog mej xaav txawj ntse, mej yuavtsum fwm tug Tswv. Yog mej xaav totaub, mej yuavtsum tso kev phem kev qas tseg.”