Read Hmong Njua Yauj 29 Bible Online

Yauj 29 - Hmong Njua bible

Yauj 29

¹Yauj rov has ntxiv dlua tas, “Kheev laam kuv lub neej rov zoo le yaav thaus u kws Vaajtswv tseem tsomkwm kuv.

³Vaajtswv nrug nraim kuv hab nwg ua qhov kaaj rua kuv thaus kuv taug txujkev tsaus ntuj.

⁴Tej ntawd yog has txug thaus kuv lub neej tseem vaammeej kws kuv nrug Vaajtswv sis raug zoo hab Vaajtswv tseem tsomkwm kuv lub tsev.

⁵Thaus ntawd, Vaajtswv tug kws muaj fwjchim luj kawg nkaus tseem nrug nraim kuv, hab kuv tej mivnyuas tseem nyob puagncig kuv.

⁶Kuv tej nyuj tej tshis muaj mig ntau heev, hab kuv tej txiv ntoo roj los luj hlub mog nyoos ntawm tej haav kws muaj pobzeb.

⁷Txhua zag kws cov txwjlaug huv lub nroog saablaaj, kuv kuj moog koom nrug puab,

⁸hab thaus tej tub hluas pum kuv, puab zaam kev rua ob saab, hab tej tuabneeg laug sawv ntsug fwm kuv.

⁹Cov thawjcoj nyob ntsag tu tsi sis thaam;

¹⁰txawm yog tej numtswv los tsi has lug le.

¹¹“Txhua tug kws pum kuv lossis nov kuv has lug, puab puavleej qhuas tej kws kuv tau ua taag lug lawd.

¹²Thaus tej tuabneeg txomnyem quaj thov, kuv kuj paab puab; kuv paab tej mivnyuas ntsuag kws tsi pum qaab vaamkhom leejtwg.

¹³Tej tuabneeg txomnyem los qhuas kuv, hab kuv paab cov puj ntsuag kuas nyob tso sab lug.

¹⁴Kuv yeej ua ncaaj hab ua sab dlawb sab zoo.

¹⁵Yaav taag lug kuv ua qhovmuag rua cov dligmuag hab ua kutaw rua cov saav ceg.

¹⁶Kuv zoo ib yaam le leej txiv rua cov tuabneeg pluag; hab kuv tuaj lwm tsaav tuabneeg tog thaus puab raug kev txomnyem.

¹⁷Kuv rhuav cov tuabneeg nruj tsiv lub fwjchim hab cawm cov tuabneeg kws raug luas tsimtxom.

¹⁸“Kuv xaav ua neej kuas muaj txujsa nyob ntev hab tuag kaaj sab lug huv kuv lub tsev.

¹⁹Yaav taag lug kuv zoo le tsob ntoo kws muaj dlej yug nwg tej caag hab muaj lwg ntsu sau nwg tej ceg.

²⁰Txhua tug puavleej qhuas kuv, kuv tug zug yeej tsi ntaug le.

²¹Thaus kuv ntuag suavdlawg, txhua tug nyob ntsag tu hab ua tuab zoo noog kuv tej lug;

²²thaus kuv has taag, tsi muaj leejtwg has ntxiv le lawm. Kuv tej lug nkaag rua huv puab lub sab ib yaam le tej lwg dlej;

²³txhua tug txaus sab yuav kuv tej lug ib yaam le tej tub qoob tu loo txaus sab rua tej naag tshab.

²⁴Thaus puab muaj kev nyuaj sab, kuv ua ntsejmuag luag ntxhi rua puab, kuv lub ntsejmuag kws luag ntxhi, txhawb puab zug kawg le.

²⁵Kuv ua tug txav txim hab leg taagnrho lub luag num; kuv coj puab ib yaam le tug vaajntxwv coj nwg paab tubrog; hab nplig puab sab thaus puab taag kev ca sab.