Read Hmong Njua Yauj 3 Bible Online

Yauj 3 - Hmong Njua bible

Yauj 3

¹Thaus kawg Yauj tsaa suab foom nub kws yug nwg,

²Yauj has tas, “Vaajtswv, thov koj foom tsi zoo rua nub kws yug kuv; thov koj tshev mo kws kuv xeeb rua huv kuv nam plaab!

⁴Vaajtswv, thov koj ca nub ntawd tsaus ntuj. Thov tsi xob ncu txug nub ntawd, hab tsi xob pub muaj dluab ci rua nub ntawd.

⁵Thov kuas nub ntawd tsaus ntuj ntum nti; Thov tso fuab laum nub ntawd ua kuas lub nub tsaus dlub ncab.

⁶Thov muab mo ntawd tshem tawm ntawm lub xyoo moog; tsi xob suav mo ntawd le lawm;

⁷Thov kuas mo ntawd tsi xob xeeb taug mivnyuas hab tsi xob muaj kev zoo sab.

⁸Has kuas tej txivneeb txivyaig hab tej tuabneeg kws txawj ua rua Levi-athas tawm tuaj foom tsi zoo rua nub ntawd.

⁹Thov kuas lub nubqub kws ci thaus sawv ntxuv qauj moog; thov kuas mo ntawd tsi xob kaaj ntug.

¹⁰Thov foom tsi zoo rua mo kws kuv yug lug, rua qhov mo ntawd ca kuv nam xeeb kuv, kuv txhaj raug kev txomnyem.

¹¹“Kheev laam kuv tuag thaus kuv tseem nyob huv kuv nam plaab lossis tuag thaus kuv yug poob nthaav lug.

¹²Ua le caag kuv nam tseem tau puag kuv rua ntawm nwg lub xubndlag? Ua le caag nwg tseem tau pub mig rua kuv noj?

¹³Yog kuv ntxuv tuag, ces nwgnuav kuv tub tau su

¹⁴hab pw tsaug zug ib yaam le tej vaajntxwv hab tej numtswv kws txhim khu tej loog kws nyob tam thaus u.

¹⁵Ces kuv tub tau pw tsaug zug ib yaam le tej numtswv kws muaj nyaj muaj kub puv nkaus puab tej tsev,

¹⁶lossis tau pw tsaug zug ib yaam le tug mivnyuas kws tuag thaus tseem nyob nruab thab.

¹⁷Thaus nyob huv qhov ntxaa, tej tuabneeg phem yuav tsi ua kev phem kev qas lawm, hab tej tuabneeg kws tsaug leeg vim ua num khwv khwv tau su.

¹⁸Tej tuabneeg raug txim yuav tau nyob tsi ntxhuv sab, puab tsi nov tug kws saib puab lub suab nthe lawm.

¹⁹Tej tuabneeg kws muaj koob meej hab tej kws tsi muaj koob meej puavleej nyob qhov ntawd, hab tej tubkhai yuav dlim plawg txujkev ua luas qhev.

²⁰“Ua le caag ca tug tuabneeg txomnyem ua neej nyob lwj sab ntsuav? Ua le caag ca tug tuabneeg quaj ntsuag pum qhov kaaj?

²¹Puab tog ntsoov txujkev tuag, tabsis kev tuag tsi lug le; puab ntshaw lub qhov ntxaa heev dlua ntshaw nyaj hab kub.

²²Puab tsi muaj kev zoo sab moog txug nub kws puab tuag hab coj puab moog log;

²³Vaajtswv thaiv puab txuj hauv kev, hab xov puagncig tsi pub puab tawm.

²⁴Kuv tej kua muag yog zaub mov rua kuv noj hab kuv lub suab ntsaaj tsi tu le.

²⁵Tej kws kuv txhawj hab ntshai txawm lug raug kuv.

²⁶Kuv tsi muaj kev kaaj sab, tsi tau su, hab naj nub raug kev txomnyem tsi paub taag le.”