Read Hmong Njua Yauj 30 Bible Online

Yauj 30 - Hmong Njua bible

Yauj 30

¹“Tabsis nwgnuav cov tuabneeg kws hluas dlua kuv muab kuv tso dlaaj tso luag! Thau, puab txiv yeej ibtxwm tsi muaj nqes rua kuv, kuv tub tsi pub puab paab kuv cov dlev zuv yaaj.

²Puab tsi muaj nqes, rua qhov puab tug zug ntaug taag ua tsi tau num rua kuv.

³Puab pluag hab tshaib nqhes heev, mo ntuj puab txhaj moog khaws tej caag ntoo qhuav; tim tej mojsaab qhua.

⁴Puab moog dle tej nroj tom taj suabpuam, hab dlawj tej caag ntoo kws tsi qaab lug noj!

⁵Tej tuabneeg qw ua tsuj ua tsaug lawv puab tawm ib yaam le luas qw tubsaab.

⁶Puab moog nyob huv tej qhov tsua hab qhov aav kws luas khawb rua ntawm tej kis zeb.

⁷Puab quaj ib yaam le tej tsaj qus tim tej haav zoov tuaj, hab moog khooj rua huv tej koog ntoo.

⁸Puab yog ib paab tuabneeg kws tsi muaj koob tsi muaj npe hab tsi muaj nqes dlaabtsi! Puab raug luas ntab tawm huv lub tebchaws moog.

⁹“Tabsis nwgnuav puab tuaj luag kuv plig; hab muab kuv tso dlaaj tso luag.

¹⁰Puab ua phem ua qas rua kuv; puab xaav has tas, puab zoo dlua kuv, kuv tsi phim puab, hab puab tseem tuaj nti quavncaug rua kuv ntsejmuag.

¹¹Rua qhov Vaajtswv ua rua kuv qaug zug hab taag kev ca sab, puab txhaj ua nruj ua tsiv tawmtsaam kuv.

¹²Cov tuabneeg sab phem too hauv li tuaj tawmtsaam kuv; puab lawv kuv tawm hab npaaj rawv tua kuv povtseg.

¹³Puab xaav ua kuas kuv puamtsuaj, puab taav kuv txuj hauv kev tsi pub kuas kuv tsiv dlim; hab tsi muaj leejtwg cheem tau puab le.

¹⁴Puab sau nthwv nkaag qhov laajkaab tuaj tawmtsaam kuv hab puab qaug tsheej pawg tsuam kuv;

¹⁵Tej kev txhawj ntshai npug kuv taag, kuv lub koob meej pluj moog ib yaam le nthwv cua, hab kuv txujkev vaammeej pluj taag ib yaam le tauv fuab.

¹⁶“Nwgnuav kuv tub yuav tuag; tsi muaj ib yaam dlaabtsi paab tau kuas kuv dlim kev txomnyem le.

¹⁷Thaus tsaus ntuj kuv tej pobtxhaa mob lwj ntsuav; tug mob noj rawv kuv tsi tso tseg le.

¹⁸Vaajtswv tsawv nkaus kuv cejdlaab tshos hab muab ntswj kag ua ib caaj.

¹⁹Nwg muab kuv pov rua huv paag aav; kuv tub zoo tsi cuag tej plauv tshauv.

²⁰“Vaajtswv, kuv hu koj, tabsis koj tsi teb kuv le; hab thaus kuv thov koj, koj yeej tsi quavntsej kuv.

²¹Koj ua nruj ua tsiv rua kuv; koj siv koj lub fwjchim tsimtxom kuv.

²²Koj tso cua lug muab kuv ntsawj yaa moog taag; koj muab kuv pov rua huv nthwv cua dlaaj cua dlub kws ntswj pis yog.

²³Kuv paub has tas koj muab kuv pov rua huv txujkev tuag hab rua huv lub tsev kws koj npaaj rua txhua tug kws muaj sa moog nyob.

²⁴Vim le caag koj tawmtsaam tug tuabneeg kws puamtsuaj, yog tug tuabneeg kws ua tsi tau dlaabtsi, tabsis thov kuas koj hlub xwb?

²⁵Puas yog kuv tub nrug tej tuabneeg nyuaj sab quaj, hab nrug cov tuabneeg txomnyem ntawd nyuaj sab?

²⁶Kuv xaav tau lub neej zoo hab kaaj sab lug; tabsis kuv ua neej nyuaj sab hab tsaus ntuj nti xwb.

²⁷Kev nyuaj sab hab ntxhuv sab ua rua kuv lwj sab ntsuav; kuv ua neej txomnyem ntsuav ib nub dlhau ib nub.

²⁸Kuv ua neej tsaus ntuj nti, tsi muaj nub tshaav ntuj le; kuv moog sawv ntawm tej chaw saablaaj thov luas paab kuv.

²⁹Kuv tu sab hab quaj ib yaam le tej maa hab tej noog ntxhuav quaj.

³⁰Kuv dlaim tawv dlub hab ua npaws kub heev.

³¹Qhov chaw kws kuv ibtxwm nov tej suab nkauj nogncaas lomzem xyivfaab, nwgnuav tsuas nov suab quaj hab suab nyav lawm xwb.