Read Hmong Njua Yauj 31 Bible Online

Yauj 31 - Hmong Njua bible

Yauj 31

¹“Kuv twv taug rua lub ntuj has tas, kuv yuav tsi saib ib tug hluas nkauj twg rua zaaj phem le.

²“Vaajtswv tug kws muaj fwjchim luj kawg nkaus ua dlaabtsi rua peb hab muab dlaabtsi pauj tej num kws peb ua?

³Vaajtswv tso kev puamtsuaj hab sub tawg sub ntshaa lug rua cov kws ua txhum.

⁴Vaajtswv paub txhua yaam kws kuv ua; nwg saib ntsoov kuv rhu txhua kaujruam moog kev.

⁵“Kuv twv taug rua lub ntuj has tas, kuv tsi tau ua phem hab tsi tau dlaag ntxag leejtwg le.

⁶Ca Vaajtswv muab raab teev kws hum txaj lug luj kuv, nwg txhaj pum has tas kuv yog tuabneeg zoo npaum le caag.

⁷Yog has tas kuv tsi taug txujkev ncaaj lossis ca txujkev phem coj kuv moog ua txhum, yog kuv txhais teg tsi ncaaj tsi huv vim muaj txim,

⁸ces ca kuas kuv tej qoobloo puamtsuaj moog, lossis thov kuas lwm tug tau noj tej qoobloo kws kuv cog.

⁹“Yog has tas kuv ntshaw luas tej quaspuj, lossis moog nkaum xauj nwg qhov tsev,

¹⁰ces ca kuas kuv tug quaspuj moog ua mov rua luas noj hab luas nrug nwg pw.

¹¹Cov kws ua kev phem kev qas le ntawd, tsimnyog raug txim tuag.

¹²Qhov ntawd yuav zoo ib yaam le cov suavtawg leejfaaj kws kub txhua yaam kws nwg muaj taag dlu lug.

¹³“Thaus kuv cov tubkhai ib tug ywg kuv, kuv noog nwg has hab ua zoo rua nwg.

¹⁴Yog kuv tsi ua le ntawd, kuv yuav ua le caag fim taug Vaajtswv? Thaus kws Vaajtswv lug txav txim rua kuv, kuv yuav has le caag rua nwg?

¹⁵Tug Vaajtswv kws tsim kuv hab tsim kuv tug tubkhai yog tuab tug.

¹⁶“Kuv yeej ibtxwm paab cov tuabneeg pluag, tsi muaj ib zag kws kuv tsi kaam paab le, kuv yeej ibtxwm paab cov puj ntsuag, hab tsi tau ua rua puab tu sab,

¹⁷lossis ca tej mivnyuas ntsuag tshaib nqhes thaus kuv muaj noj muaj haus.

¹⁸Kuv yeej ibtxwm paab luas lug laug le nuav.

¹⁹“Thaus kuv pum ib tug twg txomnyem yuav tsi taug rig tsho naav,

²⁰kuv muab tej rig tsho kws kuv muab tej plaub yaaj ntus rua tug ntawd naav. Ces nwg txhaj ua kuv tsaug hab ncu kuv txaj ntsig.

²¹“Yog kuv tau txhaav ib tug mivnyuas ntsuag twg tug yuav, vim kuv paub has tas kuv yuav yeej nwg huv tsev tu plaub,

²²ces ca kuas kuv ob txhais npaab luv; ca kuas kuv ob txhais npaab pluam ntawm kuv xubpwg moog.

²³Rua qhov kuv ntshai Vaajtswv rau txim rua kuv, kuv txhaj tsi ua txhum le ntawd.

²⁴“Kuv yeej ibtxwm tsi ca sab rua tej nyaj txag

²⁵lossis tso sab rua kev pluanuj.

²⁶Kuv tsi tau pe lub nub kws ci ntsaa ab lossis pe lub hli thaus taabtom nraa.

²⁷Kuv tsi tau nwj kuv txhais teg hawm tej ntawd ua rua kuv yuam kev ib zag le.

²⁸Tug kws ua txhum le ntawd, tsimnyog raug txim tuag; rua qhov nwg saib tsi taug Vaajtswv tug kws muaj fwjchim luj kawg nkaus.

²⁹“Thaus kuv cov yeebncuab raug kev txomnyem, kuv tsi nyos puab lossis zoo sab thaus puab raug kev puamtsuaj;

³⁰kuv tsi tau ua txhum kws yog thov Vaajtswv kuas kuv cov yeebncuab tuag.

³¹Txhua tug tubkhai kws ua num rua kuv has tas, kuv yeej ibtxwm nyam tam qhua.

³²Kuv zoo sab hlo caw tej tuabneeg taug kev lug su huv kuv tsev, hab tsi ca puab pw ntawm tej kev.

³³“Luas lwm tug pheej npog luas tej kev txhum, tabsis kuv yeej tsi npog kuv tej kev txhum le.

³⁴Kuv yeej ibtxwm tsi ntshai tej kws luas has kuv; kuv ibtxwm tsi nyob ntsag tu lossis nkaum nkoog huv tsev, vim ntshai nyob tsaam luas txobthuam kuv.

³⁵“Tsi muaj leejtwg yuav noog kuv tej lug le los? Kuv twv taug rua lub ntuj has tas, txhua lu lug kws kuv has yog lug tseeb. Ca Vaajtswv tug muaj fwjchim luj kawg nkaus teb kuv. “Kheev laam kuv pum tej kws yeebncuab kom kuv ntawd sau rua huv nruab ntaw.

³⁶Kuv yuav muab dlai rua ntawm xubpwg, hab muab ntoo rua sau taubhau ib yaam le ntoo lub mom yeebkoob.

³⁷Kuv yuav pav txhua yaam kws kuv ua rua Vaajtswv noog, hab kuv yuav muaj plhus ntxhas thaus kuv moog cuag nwg.

³⁸“Yog kuv tau txeeb dlaim teb kws kuv ua nuav ntawm lwm tug lug,

³⁹lossis yog kuv tau moog txhaav luas tej qoobloo lug noj, hab ca tug tswv qoob tshaib plaab;

⁴⁰ces ca kuas tej xuavpaug hab nroj tuaj hloov kuv tej qoobloo chaw.” Yauj tej lug taag le nuav.