Read Hmong Njua Yauj 32 Bible Online

Yauj 32 - Hmong Njua bible

Yauj 32

¹Rua qhov Yauj has tas nwg tsi muaj txim txhum dlaabtsi, peb tug txivneej ntawd txhaj tseg tsi teb Yauj lawm.

²Tabsis muaj ib tug txivneej npe hu ua Elihus chim heev, nwg tswj tsi tau nwg txujkev chim, rua qhov Yauj has tas Yauj ua ncaaj, tabsis Vaajtswv ua tsi ncaaj. (Elihus yog Npalakees tug tub kws yog Npauxes tug xeebntxwv hab yog xeem Las.)

³Elihus chim heev rua Yauj peb tug phoojywg. Vim puab tsi muaj lug teb Yauj le, qhov ntawd suav has tas, Vaajtswv yog tug ua tsi ncaaj.

⁴Vim Elihus hluas dlua puab, nwg txhaj tog kuas puab has taag tsaiv.

⁵Thaus Elihus pum has tas, puab peb leeg ntawd, teb tsi tau Yauj tej lug, mas nwg chim heev.

⁶Npalakees tug tub Elihus kws yog Npauxes tug xeebntxwv txhaj cuab has nwg zaaj tuaj, nwg teb has tas, “Kuv yog tug hluas hab mej yog cov laug lawm, yog le ntawd kuv txhaj ntshai qha tej kws kuv xaav rua mej noog.

⁷Kuv xaav has tas tsimnyog ca mej has, mej cov laug tsimnyog sis paab tawm tswvyim.

⁸Tabsis yog Vaajtswv tug kws muaj Fwjchim Luj kawg nkaus tug ntsujplig lug kaav tuabneeg lub sab hab pub tswvyim rua tuabneeg xwb.

⁹Tsi yog has tas leejtwg laug ces txawm yuav muaj kev txawj ntse lossis kev laug yuav ua kuas puab paub qhov yog hab qhov tsi yog.

¹⁰Yog le ntawd, kuv xaav kuas mej noog kuv has; ca kuv has tej kws kuv xaav rua mej noog.

¹¹“Kuv ua sab ntev noog mej has ntev loo lug lawm, hab tog mej nthuav mej tej kev txawj ntse lug has tsuav.

¹²Kuv ua tuab zoo noog lawm, mej tsi muaj lug has, mej tsi muaj ib tug teb tau Yauj tej lug le.

¹³Mej yuav ua le caag has tau tas mej muaj tswvyim. Vaajtswv yuav teb rua Yauj tej kws mej teb tsi tau.

¹⁴Yauj has rua mej xwb, tsi yog has rua kuv, tabsis kuv yuav tsi teb le mej.

¹⁵“Yauj, puab swb lug lawm, puab tsi muaj lug teb koj le.

¹⁶Thaus puab tsi muaj lug has, txawm yuav ca kuv nyob tuabywv hab los? Puab sawv ntawd los puab tsi muaj lug has le.

¹⁷Tsi tau, nwgnuav kuv yuavtsum teb hab has tej lug kws kuv xaav rua koj noog.

¹⁸Kuv yuav rawm has kuv tej lug; kuv ua tsi taug sab ntev lawm.

¹⁹Yog tsi muaj sijhawm rua kuv has lug, kuv tej lug yuav phwj ib yaam le cov cawv txiv maab tshab kws phwj tawm huv lub naab tuaj.

²⁰Kuv yuavtsum has kuv lub sab txhaj nqeg.

²¹Qhov kws kuv caav nuav tsi yog kuv yuav xaav tuaj leejtwg tog, lossis tsi yog kuv qhuas ib tug twg.

²²Kuv tsi laam ua txuj qhuas ib tug twg, yog kuv ua le ntawd, Vaajtswv yuav rau txim rua kuv.