Read Hmong Njua Yauj 33 Bible Online

Yauj 33 - Hmong Njua bible

Yauj 33

¹“Yauj, koj ua tuab zoo noog tej lug kws kuv yuav has rua koj.

²Kuv yuav has tej kws kuv tub xaav tseg lawd rua koj noog.

³Tej lug kws kuv has yog lug ntawm lub sab pheejxeeb hab kuv has tej lug tseeb xwb.

⁴Vaajtswv tug ntsujplig tsim kuv hab pub txujsa rua kuv.

⁵“Yog koj teb tau, ca le teb kuv tej lug hab npaaj nrug kuv sis caav.

⁶Koj hab kuv zoo ib yaam nkaus taabmeeg Vaajtswv wb ob leeg puavleej yog muab aav puab.

⁷Yog le ntawd, tsi taag koj yuav ntshai kuv; kuv yuav tsi has nyaav rua koj.

⁸“Tej nuav yog tej lug kws kuv nov koj has:

⁹‘Kuv tsi muaj txim; kuv tsi tau ua txhum dlaabtsi. Kuv ncaaj nceeg hab tsi muaj txim.

¹⁰Tabsis yog Vaajtswv nrhav lug tawmtsaam kuv, hab ua rua kuv ib yaam le ua rua tug yeebncuab.

¹¹Vaajtswv muab saw hlau khi kuv kutaw; nwg saib ntsoov kuv rhais txhua kaujruam.’

¹²“Yauj, ca kuv qha koj, koj yeej ua tsi yog lawm. Vaajtswv muaj fwjchim luj dlua tuabneeg.

¹³Ua le caag koj lam has tas Vaajtswv tsi teb tuabneeg tej lug ywg?

¹⁴Txawm yog Vaajtswv has taag has thab los tsi muaj leejtwg quavntsej nwg tej lug le.

¹⁵Thaus tsaus ntuj kws tuabneeg pw tsaug zug, Vaajtswv has rua tuabneeg huv nruab npau suav hab ua rua tuabneeg ua ywgtoog pum.

¹⁶Vaajtswv ua kuas tuabneeg noog Vaajtswv tej lug hab kuas puab fwm Vaajtswv tej lug ntuag.

¹⁷Vaajtswv has kuas tuabneeg tso puab tej kev txhum tseg hab cawm puab dlim ntawm txujkev kws ua tuabneeg khaavtheeb.

¹⁸Vaajtswv tsi xaav kuas tuabneeg raug kev puamtsuaj; Vaajtswv cawm kuas tuabneeg dlim ntawm txujkev tuag.

¹⁹Vaajtswv ntuag tuabneeg lug ntawm tej kaab mob kev nkeeg kws ua rua nwg lub cev mob lwj ntsuav.

²⁰Tug tuabneeg muaj mob, nwg yeej tsi qaab lus, txawm yog zaub mov qaab npaum twg los nwg dlhuav kawg le.

²¹Nwg lub cev ntxaug zuj zug tsi tshuav dlaabtsi le; pum nwg tej pobtxhaa nyob zoj;

²²nwg tub yuav moog rua huv tubtuag teb.

²³“Tej zag kuj muaj ib tug timtswv lug paab nwg, yog ib tug ntawm Vaajtswv ib txheeb tug timtswv kws lug qha kuas tuabneeg paub txujkev ncaaj nceeg.

²⁴Vim txujkev hlub, tug timtswv ntawd has tas, ‘Ca le tso nwg! Nwg tsi yog tug kws yuav moog rua huv tubtuag teb. Ntawm nuav yog qhov kws txhwv nwg.’

²⁵Nwg lub cev yuav rov puv mog nyoos hab muaj zug tuaj;

²⁶thaus nwg thov, Vaajtswv yuav teb nwg tej lug; nwg yuav pehawm Vaajtswv ntawm lub sab xyivfaab hlo; Vaajtswv yuav pauj tej kws nwg ua ncaaj ua nceeg rov rua nwg.

²⁷Nwg yuav has taabmeeg rua suavdlawg tas, ‘Kuv tau ua txhum lawm tag. Kuv yeej ua tsi ncaaj, tabsis yog Vaajtswv tshwj kuv xwb.

²⁸Vaajtswv tsi ca kuv moog rua huv tubtuag teb, kuv txhaj tseem muaj sa nyob.’

²⁹“Vaajtswv ua txhua yaam nuav, nwg ua taag los ua thab;

³⁰Vaajtswv cawm tuabneeg txujsa hab pub kuas tuabneeg muaj kev kaaj sab.

³¹“Yauj, nwgnuav koj ca le noog kuv tej lug, hab koj nyob tuabywv ca kuv has.

³²Tabsis yog koj muaj dlaabtsi yuav has, ca le has rua kuv; yog koj has yog lawm, kuv txaus sab yuav le koj has.

³³Tabsis yog koj has tsi yog, ces koj nyob tuabywv noog kuv has, hab kuv yuav qha kuas koj ua tau tuabneeg ntse.”