Read Hmong Njua Yauj 34 Bible Online

Yauj 34 - Hmong Njua bible

Yauj 34

¹Elihus has ntxiv tas, Mej cov kws yog tuabneeg txawj ntse, nwgnuav mej ca le noog tej lug kws kuv yuav has.

³Thaus mej noj, mej txhaj paub has tas zaub mov qaab. Tabsis thaus mej nov luas tej lug, mej tsua tsi ntse.

⁴Ca peb xaiv saib qhov twg yog qhov zoo; ca peb txav txim sab saib qhov twg yog qhov yog.

⁵Yauj khaav has tas nwg tsi muaj txim txhum dlaabtsi, tsuas yog Vaajtswv tsi leeg has tas Yauj yog tuabneeg ncaaj nceeg xwb.

⁶Yauj nug has tas, “Kuv yuav ua le caag dlaag has tas kuv ua txhum? Kuv muaj mob khu tsi tau, tabsis tsi yog vim kuv ua txhum.”

⁷Mej puas tau pum dlua ib tug tuabneeg zoo le Yauj? Nwg yeej tsi fwm Vaajtswv le.

⁸Nwg nyam ua phoojywg nrug cov tuabneeg ua phem ua qas hab moog koom nrug cov tuabneeg txhum xwb.

⁹Nwg has tas qhov kws ua lawv le Vaajtswv sab nyam tsi muaj qaabhau dlaabtsi le.

¹⁰Mej cov kws yog tuabneeg paub taab, mej ca le noog kuv has! Tug Vaajtswv kws muaj Fwjchim Luj kawg nkaus puas ua txhum?

¹¹Nwg yuav muab nqe zug rua tuabneeg lawv le tej num kws puab ua, hab ua zoo rua puab kuas tsimnyog qhov kws puab ua.

¹²Vaajtswv tug kws muaj Fwjchim Luj kawg nkaus yeej tsi ua txhum nwg ibtxwm ua ncaaj rua suavdlawg.

¹³Puas muaj leejtwg muab fwjchim rua Vaajtswv? Puas muaj leejtwg tsaa Vaajtswv kaav lub nplajteb?

¹⁴Yog Vaajtswv rhu tuabneeg txujsa lawm,

¹⁵ces txhua tug kws muaj sa yuav tuag rov moog ua aav dlua.

¹⁶Yog mej has tas mej yog tuabneeg ntse, nwgnuav mej ca le noog kuv has.

¹⁷Mej tseem yuav rau txim rua Vaajtswv tug kws ncaaj nceeg hab los? Mej xaav has tas Vaajtswv ntxub kev ncaaj nceeg nua los?

¹⁸Vaajtswv rau txim rua cov vaajntxwv hab cov numtswv thaus puab ua phem ua qas lossis ua tsi ncaaj.

¹⁹Vaajtswv tsi tuaj cov numtswv tog, lossis tsi saib cov npluanuj tseemceeb dlua cov pluag. Rua qhov txhua tug puavleej yog Vaajtswv tsim.

²⁰Mo ntuj tej tuabneeg ca le tuag tuabywv lawm. Vaajtswv ua tau kuas tuabneeg tuag hab puamtsuaj moog; tej tuabneeg muaj zug los Vaajtswv ua kuas tuag yoojyim heev.

²¹Vaajtswv saib ntsoov txhua tug tuabneeg rhais ruj moog kev.

²²Tsi muaj ib qhov tsaus ntuj kws thaiv tau Vaajtswv tsi pum tug tuabneeg txhum le.

²³Vaajtswv tsi tau teem ib lub sijhawm rua tuabneeg moog rua Vaajtswv txav txim.

²⁴Vaajtswv muab ib cov thawjcoj rhu hab muab ib cov lug hloov, tsi taag yuav taug puab lub neej le.

²⁵Rua qhov Vaajtswv yeej paub tej kws puab ua huv tuabsi lawm; thaus tsaus ntuj nwg muab puab ntsawm hab tsuj ntag tseg.

²⁶Vaajtswv rau txim rua tuabneeg txhum rua suavdlawg saib ntsoov,

²⁷Rua qhov puab tso nwg tseg hab tsi quavntsej nwg tej lug saamfwm.

²⁸Puab quab yuam tej tuabneeg pluag, ua rua cov tuabneeg pluag lub suab quaj moog txug Vaajtswv hab Vaajtswv nov puab lub suab quaj thov paab.

²⁹Yog Vaajtswv txav txim sab tsi ua ib yaam dlaabtsi los yeej tsi muaj leejtwg thuam tau nwg le. Yog Vaajtswv tsiv nkaum lawm, yeej tsi muaj leejtwg nrhav tau, tsi has ib tug twg lossis ib tsaav tuabneeg twg le.

³⁰Ntau tsaav tuabneeg ua tsi tau ib yaam dlaabtsi rua cov tuabneeg ua phem ua qas kuas cov tuabneeg fwm Vaajtswv tsi xob tswjfwm puab.

³¹Yauj, koj puas leeg koj tej kev txhum rua Vaajtswv, hab coglug has tas koj yuav tsi ua ntxiv lawm?

³²Koj puas tau thov Vaajtswv qha koj tej kev txhum rua koj, hab koj puas txaus sab tso koj tej kev phem kev qas tseg?

³³Rua qhov koj tsi leeg paub tej kws Vaajtswv ua, koj yuav ua le caag kuas Vaajtswv ua lawv le koj xaav tau? Koj yog tug txav txim sab, tsi yog kuv; ca le qha tej kws koj xaav rua kuv.

³⁴Tug tuabneeg kws thoob tsib to nrog yeej noog kuv has, tug tuabneeg muaj tswvyim kws nov kuv has yuav has tas,

³⁵tej lug kws Yauj has tsi yog lug txawj ntse, hab tej kws nwg has tsi muaj qaabhau dlaabtsi.

³⁶Mej ua tuab zoo noog tej kws Yauj has, mej yuav pum has tas, nwg has le tug tuabneeg sab phem has.

³⁷Yauj ntxeev sab tsub ntxiv rua nwg tej kev txhum; nwg ua saib tsi taug Vaajtswv taabmeeg peb.