Read Hmong Njua Yauj 35 Bible Online

Yauj 35 - Hmong Njua bible

Yauj 35

¹Elihus has ntxiv tas, “Koj has tas koj tsi tau ua txhum taabmeeg Vaajtswv, koj has le ntawd tsi yog lawm,

³lossis nug Vaajtswv has tas, ‘Kuv tej kev txhum ua le caag rua koj? Yog kuv tsi ua txhum, kuv tsua tau dlaabtsi?’

⁴Kuv yuav teb koj hab koj cov phoojywg tej lug huv tuabsi.

⁵“Ca le saib sau nruab ntug! Saib tej fuab nyob sab npaum le caag!

⁶Txawm yog koj ua txhum los yeej tsi mob Vaajtswv le. Yog koj ua txhum ntau zag, puas ua le caag rua Vaajtswv.

⁷Yog koj ua ncaaj nceeg, puas paab tau Vaajtswv dlaabtsi? Tsi muaj ib yaam dlaabtsi kws Vaajtswv xaav tau ntawm koj le.

⁸Koj tej kev txhum yuav raug tug kws zoo le koj, hab koj txujkev ua zoo paab tau nwg.

⁹“Thaus tuabneeg raug tsimtxom puab quaj ntsuag; puab quaj thov kuas lwm tug cawm puab.

¹⁰Tabsis puab tsi moog cuag Vaajtswv tug kws tsim puab, tug kws pub puab muaj kev ca sab thaus puab raug kev tsaus ntuj.

¹¹Puab tsi moog cuag Vaajtswv tug kws pub kev txawj ntse rua puab, kuas ntse tshaaj tej tsaj hab tej noog.

¹²Puab quaj thov kev paab, tabsis Vaajtswv tsi teb, rua qhov puab sab phem hab khaavtheeb heev.

¹³Qhov kws puab quaj tsi muaj qaabhau; Vaajtswv tug kws muaj Fwjchim Luj kawg nkaus tsi pum lossis tsi nov le.

¹⁴“Yauj, koj has tas, koj tsi pum Vaajtswv; tabsis koj ua sab ntev tog, koj rooj plaub yeej nyob ntawm Vaajtswv lawm.

¹⁵Koj xaav has tas Vaajtswv yuav tsi rau txim rua tuabneeg hab nwg tsi quavntsej tuabneeg tej kev txhum nua los?

¹⁶Txawm yog koj has lug ntau los tsi muaj qaabhau; rua qhov koj tsi paub has tas koj has dlaabtsi.”