Read Hmong Njua Yauj 36 Bible Online

Yauj 36 - Hmong Njua bible

Yauj 36

¹Elihus has ntxiv tas, “Koj ua sab ntev noog kuv has, tej lug nuav yog kuv sawv cev Vaajtswv has rua koj.

³Kuv muaj kev txawj ntse heev; kuv yuav qha koj lawv le kuv paub has tas Vaajtswv tug kws tsim kuv yog tug ncaaj nceeg.

⁴Tej lug kws kuv has rua koj tsi yog lug cuav; tug kws nyob ntawm koj hauv ntej nuav yog ib tug tuabneeg ncaaj hab ntse heev.

⁵“Vaajtswv yog tug muaj zug luj zug nchaav! Nwg tsi xaiv leejtwg ntsejmuag; tsi muaj ib yaam kws Vaajtswv tsi paub le.

⁶Vaajtswv tsi pub tug tuabneeg txhum ua neej nyob, tabsis nwg ua ncaaj rua tug tuabneeg txomnyem.

⁷Vaajtswv tsomkwm cov tuabneeg ncaaj nceeg; nwg ca puab kaav lwm tug ib yaam le tej vaajntxwv, hab ca luas fwm puab moog ibtxhis.

⁸Tabsis qhov kws puab raug luas cuab luas khi, hab raug txomnyem yog vim tej kws puab ua.

⁹Vaajtswv txhaj qha puab tej kev txhum hab puab tej kev khaavtheeb rua puab.

¹⁰Vaajtswv ua rua puab noog Vaajtswv tej lug ntuag, hab tso puab tej kev phem kev qas tseg.

¹¹Yog puab noog Vaajtswv lug hab pehawm nwg, puab lub neej yuav vaammeej hab nyob kaaj sab lug.

¹²Tabsis yog puab tsi noog Vaajtswv lug, puab yuav tuag rua nav ntaaj nav rag vim puab tsi quavntsej Vaajtswv.

¹³“Cov tuabneeg kws tsi fwm Vaajtswv, puab tsuas npautawg taag moog le xwb, txawm yog thaus puab raug txim los puab tsi thov Vaajtswv le.

¹⁴Puab tuag taag rua thaus puab tseem hluas, puab lub neej puamtsuaj taag txaajmuag ntsuav.

¹⁵Tabsis Vaajtswv ca kev txomnyem lug qha tuabneeg ua neej hab siv txujkev ntxhuv sab lug qheb tuabneeg lub qhovmuag.

¹⁶“Vaajtswv tso koj dlim kev nyuaj sab, hab pub kuas koj nyob tso sab lug; sau koj lub rooj muaj zaub mov nplua mag.

¹⁷Tabsis nwgnuav tsimnyog koj raug txim lawv le tej kws koj ua.

¹⁸Ceevfaaj tsi xob ca luas tej nyaj xab ntxag tau koj; lossis tsi xob ca kev npluanuj coj tau koj moog yuam kev.

¹⁹Tej nyaj xab ntawd yuav tsi paab koj thaus koj thov kuv paab; txawm yog koj siv taagnrho koj tug zug los paab tsi tau koj dlim.

²⁰Tsi xob tog has tas muaj ib mos, txhua tsaav tuabneeg yuav raug kev puamtsuaj.

²¹Ceevfaaj tsi xob raus teg rua kev ua phem ua qas; qhov kws koj raug txomnyem yog ua kuas koj tso kev txhum tseg.

²²“Ncu ntsoov has tas Vaajtswv yog tug kws muaj fwjchim luj kawg nkaus; nwg yog tug xwbfwb kws zoo tshaaj tej xwbfwb huv tuabsi.

²³Tsi muaj leejtwg has kuas Vaajtswv ua le nuav le u; lossis lam has tas Vaajtswv ua txhum.

²⁴Luas ibtxwm qhuas tej kws Vaajtswv ua; koj los yuavtsum qhuas nwg hab.

²⁵Txhua tug puavleej pum tej kws Vaajtswv ua lawm; tabsis peb tsuas tuaj dleb saib xwb.

²⁶Peb tsi paub Vaajtswv lub fwjchim, lossis tsi paub has tas Vaajtswv nyob thaus twg lug lawm.

²⁷“Vaajtswv yog tug nqaa tej dlej huv nplajteb nuav moog hab tso naag lug rua lub nplajteb.

²⁸Vaajtswv tso naag huv tej tauv fuab lug rua tuabneeg nplajteb.

²⁹Tsi muaj leejtwg paub has tas yog le caag fuab txhaj txawj txaav, lossis yog le caag xub txhaj nroo sau ntuj qhov chaw kws Vaajtswv nyob tuaj.

³⁰Vaajtswv ua kuas muaj tsaglig xub laim thoob ntuj, tabsis huv qaab thu havtxwv tseem tsaus ntuj nti.

³¹Qhov ntawd qha has tas, Vaajtswv pub txhua tsaav tuabneeg muaj noj muaj haus nplua mag.

³²Vaajtswv sau zog tej tsaglig xub rua huv nwg xibteg hab tso tej tsaglig xub ntawd moog raug qhov chaw kws nwg kom tseg.

³³Thaus xub nroo yog ceebtoom has tas, yuav lug naag xub naag cua, txawm yog tej tsaj los tub paub has tas naag xub naag cua yuav lug.