Read Hmong Njua Yauj 37 Bible Online

Yauj 37 - Hmong Njua bible

Yauj 37

¹“Naag xub naag cua ua rua kuv lub sab tshee nyo.

²Mej txhua tug ca le noog Vaajtswv lub suab, yog lub suab xub nroo kws tawm ntawm nwg lub qhovncauj tuaj.

³Vaajtswv ua tsaglig xub laim ci thoob plawg sau nruab ntug, saab ntuj tim nuav moog ti nkaus saab ntuj tim u.

⁴Ces nov nwg lub suab nrov nroo ntwg tuaj, yog lub suab xub nroo kws txaus ntshai, thaus kws muaj tsaglig xub laim tuaj.

⁵Vaajtswv ua kuas muaj tej txujci tseemceeb tshwm hab muaj ntau yaam kws peb xaav tsi thoob le.

⁶Vaajtswv tso dlaus, tso naag tshauv hab tuamtsaam naag lug rua lub nplajteb.

⁷Txhua tug kws Vaajtswv tsim yuav paub Vaajtswv teg num; Vaajtswv tsi pub tuabneeg ua tau teg num kws Vaajtswv ua.

⁸Tej tsaj qus nkaag moog nkaum rua huv puab tej qhov.

⁹Cua dlaaj cua dlub ntsawj saab qaabteb tuaj, hab cov cua kws txag heev ntsawj saab qaumteb tuaj.

¹⁰Vaajtswv tshuab paa ua rua dlej nkoog taag, hab muab dlej hloov ua kuas khov ua tej thooj.

¹¹Tsaglig xub laim ci nplaag huv tej tauv fuab tuaj,

¹²tej fuab ntawd txaav moog lawv le Vaajtswv sab nyam. Tej fuab ntawd ua lawv le Vaajtswv tej lug saamfwm thoob plawg qaab ntuj.

¹³Vaajtswv tso naag lug ywg lub nplajteb, tej zag yog Vaajtswv tso lug rau txim, lossis tso lug qha kuas tuabneeg paub nwg txujkev hlub.

¹⁴“Yauj, koj su ib plag hab ua tuab zoo noog; ua tuab zoo saib tej txujci tseemceeb kws Vaajtswv ua.

¹⁵Koj puas paub has tas Vaajtswv yog tug saamfwm hab ua kuas muaj tsaglig xub laim huv tej tauv fuab tuaj?

¹⁶Koj puas paub has tas ua le caag tej fuab txhaj nyob tau ntaa yeeg sau nruab ntug, tsi yog Vaajtswv tej txujci kws tseemceeb hab xaav tsi thoob los?

¹⁷Koj tsuas paub tiv cua kub txomnyem ntsuav thaus cua ntsawj saab qaabteb tuaj rua thaaj aav.

¹⁸Koj puas paab tau Vaajtswv nthuav lub ntuj, hab ua kuas lub ntuj ntawd tawv le tooj hab dlu le av?

¹⁹Koj qha rua peb saib yuav has le caag rua Vaajtswv; peb tsi muaj tswvyim, hab tsi paub has.

²⁰Kuv yuav tsi nrug Vaajtswv has; vim le caag kuv yuav ca nwg rhuav kuv?

²¹“Thaus cua ntsawj lub ntuj kaaj huv si, lub nub kws nyob sau nruab ntug ci heev tsi muaj leejtwg saib taug.

²²Muaj ib qhov ci ntsaa ab saab qaumteb tuaj, hab Vaajtswv tug tshwjchim ci ntsaa ab tuaj ua rua peb ntshai kawg le.

²³Vaajtswv lub fwjchim luj luj heev ua rua peb txaav tsi tau ze nwg; Vaajtswv yeej ua ncaaj ua nceeg thaus nwg txav txim rua tuabneeg.

²⁴Tub yog vim le ntawd, tuabneeg txhaj fwm nwg hab nwg tsi quavntsej cov tuabneeg kws khaav has tas puab ntse.”