Read Hmong Njua Yauj 38 Bible Online

Yauj 38 - Hmong Njua bible

Yauj 38

¹Tug TSWV teb Yauj huv nthwv cua dlaaj cua dlub tuaj. Tug TSWV has tas,

²“Koj yog leejtwg, koj txhaj tuaj nug kuv lub tswvyim, koj tej lug tsi muaj hauvpaug hauvntsis le los sav?

³Nwgnuav koj ca le sawv khov kho ib yaam le tug txivneej yawg hab ca le teb tej lug kws kuv yuav nug koj.

⁴Thaus kuv tsim lub nplajteb koj puas nyob ntawd? Yog koj paub txhij paub txhua ca le qha rua kuv saib.

⁵Leejtwg yog tug kws has tas, yuav tsim lub nplajteb luj le caag? Leejtwg yog tug muab hlua ntsuag lub nplajteb? Koj paub tej nuav huv tuabsi los?

⁶Yaam dlaabtsi tuav tej ncej kws txheem lub nplajteb nuav kuas khov? Leejtwg yog tug txhus tug ncej zeb kws txheem lub nplajteb?

⁷Nub ntawd thaus kaaj ntug txoog, tej nubqub hu nkauj ua ke, hab tej timtswv sau ntuj qw zoo sab.

⁸“Leejtwg yog tug kws kaw rooj qho havtxwv thaus havtxwv phwj yog huv nruab tivtxwv tuaj?

⁹Kuv yog tug kws ua kuas fuab laum nkaus havtxwv hab ua kuas qhov tsaus ntuj qhwv nkaus dlej havtxwv.

¹⁰Kuv tu kuas muaj nrim dlej nrim aav rua havtxwv nyob, hab muaj ntsa laag lub rooj qho tsi pub dlej tawm.

¹¹Kuv has rua dlej has tas, ‘Kuv tsuas pub koj puv txug nuav xwb, tsi pub puv dlhau! Koj tug zug kws ndlaas tuaj, tsuas pub ndlaas txug nuav xwb.’

¹²“Yauj, txij thaus koj xeevxwm ua neej lug txug nwgnuav, koj puas tau has kuas lub nub tawm tuaj?

¹³Thaus sawv ntxuv, koj puas tau has kuas tshaav ntuj ci tuaj zab nplajteb, hab cu kuas cov tuabneeg sab phem tawm huv tej chaw kws puab nkaum lug?

¹⁴Tej dluab tshaav ntuj ntawd ua rua suavdlawg pum tej toj roob hauv peg sawv ntshais ntsho ib yaam le tej ntaub kws luas muab nthuav pum tej nre tais meej nplhav hab pum tseeb le lub yeem homthawj kws luas nas rua aav nplaum.

¹⁵Nruab nub pum kev ua rua cov tuabneeg sab phem ua tsi tau phem, hab txwv tsi pub puab ua nruj ua tsiv.

¹⁶“Koj tub moog txug huv qhov kws havtxwv txhawv lawm los? Koj moog tau huv qaab thu havtxwv lug lawm los?

¹⁷Tub muaj tuabneeg coj koj moog saib lub roojvaag kws quas tubtuag teb kws tsaus ntuj nti lawm los?

¹⁸Koj puas paub has tas lub nplajteb nuav luj le caag? Yog koj paub, koj ca le qha kuv saib!

¹⁹“Koj puas paub has tas tug dluab ci yog ci qhov twg tuaj? lossis qhov tsaus ntuj yog lug qhov twg lug?

²⁰Koj puas qha tau kuas tej dluab ci hab dluab tsaus ci hab tsaus moog txug txij twg, lossis has kuas rov lug nyob qhov qub?

²¹Kuv xaav has tas koj ua tau, rua qhov koj tub laug heev lawm, hab thaus tsim nplajteb, koj tub nyob ntawd ntaag!

²²“Koj puas tau moog pum tej txhaab kws kuv ca ntim dlaus hab lawg?

²³Kuv npaaj tej ntawd ca rua lub sijhawm kws muaj kev txomnyem hab nub kws muaj kev tsuv kev rog.

²⁴Koj tub moog txug ntawm qhov chaw kws lub nub tawm tuaj, lossis ntawm qhov chaw kws cov cua saab nubtuaj ntsawj tuaj lawm los?

²⁵“Leejtwg yog tug khawb kwj rua naag lug hab qheb kev rua xub nroo?

²⁶Leejtwg yog tug tso naag lug rua tej toj roob hauv peg kws tsi muaj tuabneeg nyob?

²⁷Leejtwg yog tug ywg dlej rua thaaj aav kws qhuav nkig nkuav kuas tej nroj ntsuag hlub taug?

²⁸Leejtwg yog tej naag hab tej lwg txiv?

²⁹Leejtwg yog tej dlej nkoog hab tej te nam?

³⁰Tej ntawd ua rua dlej khov tawv cuag pobzeb, hab ua rua nplaim havtxwv nkoog khov kho.

³¹“Koj puas yog tug kws muab cov nubqub txhaj Txiv Mim lug teeb ua ib ntsau, lossis muab cov Nubqub Puj Sua Kwv ntaas cais nyag nyob nyag?

³²Puas yog koj ua rua tej nubqub tig tau moog lug hum lub caij lub nyoog? Lossis qha kev rua tej Nubqub Ntsauv Luj hab Ntsauv Miv?

³³Koj paub tej kevcai kws luas tswjfwm sau ntuj hab koj muab tau tej kevcai ntawd lug siv rua huv lub nplajteb nua los?

³⁴“Koj puas has tau kuas tej fuab tso naag lug rua koj?

³⁵Yog koj has kuas tsaglig xub laim, nwg puas tawm tuaj has rua koj tas, ‘Kuv nyob ntawm nuav?’

³⁶Leejtwg qha rua tug qab dleg has tas, tug dlej Niles yuav fuam tuaj, lossis leejtwg qha rua tug lauv qab has tas, naag yuav lug?

³⁷Leejtwg muaj kev txawj ntse suav txheeb tej fuab, hab has kuas tej fuab ntawd tso naag lug

³⁸rua tej plauv aav kuas nplaum ua tej thooj?

³⁹“Koj puas nrhav tau nqaj rua tej tsuv ntxhuav noj, hab ua kuas tej mivnyuas tsuv ntxhuav tsau plaab.

⁴⁰thaus puab nkaum huv qhov tsua lossis pw huv puab tej qhov?

⁴¹Thaus uab laag tshaib plaab hab yaa rua nuav rua u, leejtwg yog tug pub rua uab laag, hab pub rua uab laag tej mivnyuas kws quaj thov kuv, noj?