Read Hmong Njua Yauj 39 Bible Online

Yauj 39 - Hmong Njua bible

Yauj 39

¹“Koj paub thaus twg sai yug mivnyuas? Koj saib ntsoov muaslwj yug mivnyuas los?

²Koj puas paub tej tsaj ntawd suab mivnyuas pistsawg hli? Hab thaus twg puab yug mivnyuas?

³Koj puas paub thaus twg tej tsaj qus nyob tsawg ndlua yug mivnyuas?

⁴Tej mivnyuas tsaj ntawd luj hlub muaj zug nyob nruab zoo nruab tsuag; puab moog hab tsi rov lug le lawm.

⁵“Leejtwg ca tej neeg luav qus nyob ywj sab? Leejtwg dlaws hlua hab tso puab moog?

⁶Kuv ca taj suabpuam ua tej neeg luav lub chaw nyob, hab ca puab nyob huv lub taj ntsev.

⁷Tej neeg luav ntawd nyam moog nyob dleb tej nroog kuas tsi muaj suab ntshu, kuas tsi muaj leejtwg muab puab cob thauj nraa.

⁸Toj roob hauv peg yog puab tej tshaav zaub; hab yog puab tej chaw ncig nrhav noj.

⁹“Nyuj qus puas hai ntoo rua koj? Nwg puas lug nyob huv koj lub nkuaj ib mos?

¹⁰Koj puas muab hlua khi tau nwg caab moog laij teb? Lossis koj puas siv tau nwg caab khais haiv koj thaaj teb?

¹¹Koj ca sab rua nwg tug zug luj zug nchaav, hab xaav has tas nwg yuav ua koj tej num nyaav nua los?

¹²Koj xaav has tas nwg yuav thauj tej qoob kws koj sau, hab tej nplej huv koj lub tshaav nplej lug tsev nua los?

¹³“Noog ntxhuav ntxuaj tis thawv zoo le yuav yaa taug! Tabsis nwg yaa tsi taug le tug us dlej yaa.

¹⁴Noog ntxhuav nteg qai rua huv aav hab ca aav ncu kuas dlaug.

¹⁵Nwg tsi paub txhawj has tas nyob tsaam luas tsuj, lossis nyob tsaam tej tsaj nruab nraag lug muab ua tawg.

¹⁶Nwg ua ib yaam le tej qai ntawd tsi yog nwg le, nwg tsi mob sab has tas, nyob tsaam nkim nwg tug zug.

¹⁷Tub yog kuv tsim kuas nwg ruag le ntawd, hab tsi pub nwg muaj tswvyim.

¹⁸Tabsis thaus twg nwg dlha, nwg luag tug neeg hab tug tuabneeg kws caij neeg plig.

¹⁹“Yauj, koj puas yog tug kws ua kuas neeg muaj zug hab cog txoob rua neeg?

²⁰Puas yog koj ua kuas neeg txawj tuam tau le kooj hab hee ua rua tuabneeg ceeb pis nkaus?

²¹Tej neeg ntawd txauj aav xyivfaab hlo nraag taj; puab dlha tsaus tsi kawg puab tug zug moog rua huv tshaav rog.

²²Puab tsi paub ntshai dlaabtsi le, hab tsi muaj ib raab ntaaj kws ua rua puab thim rov qaab.

²³Cov tuabneeg caij neeg, tej cuabyeej ua rog nrov zum zawg hab tej nav ntaaj ci nplaag.

²⁴Puab phoom pis yog dlha rua tom hauv ntej; thaus puab nov suab raaj suab xyu nrov puab nyob tsi tswm le.

²⁵Thaus puab nov suab raaj suab xyu nrov puab hee quas lawg; thaus tseem moog tsi tau txug huv tshaav rog puab tub nov ntxhab lawm, hab puab noog quas ntsoov cov thawj tubrog lub suab nthe.

²⁶“Thaus laj nthuav tis yaa rua nraag qaabteb, puas yog koj qha nwg yaa?

²⁷Puas yog dlaav tog koj has nwg, nwg maam moog ua zeg rua sau tej roob sab?

²⁸Nwg ua zeg rua sau tej roob tsuas sab, hab ua chaw nkaum rua sau tej nkav zeb.

²⁹Nwg nyob rawv zuv saib dleb hab ze, saib puas pum ib tug tsaj nyob qhov twg kws nwg yuav muab tau lug noj.

³⁰Cov dlaav ntawd yaa poog ntwg vij tej tsaj tuag, hab tej mivnyuas dlaav zuv rawv haus tej tsaj tuag cov ntshaav.”